Vikramjit Singh Sahney: 'ਵਿਸਾਖੀ ਸੁਪਰਸਿੱਖ 5K ਮੈਰਾਥਨ' ਦੇ ਤੀਜੇ ਐਡੀਸ਼ਨ ਦਾ ਸਫ਼ਲਤਾਪੂਰਵਕ ਕੀਤਾ ਗਿਆ ਆਯੋਜਨ

Vikramjit Singh Sahney:  ਵਿਸ਼ਵ ਪੰਜਾਬੀ ਸੰਗਠਨ ਅਤੇ ਸੰਨ ਫਾਊਂਡੇਸ਼ਨ ਨੇ ਰਾਜ ਸਭਾ ਦੇ ਮੈਂਬਰ, ਡਾ. ਵਿਕਰਮਜੀਤ ਸਿੰਘ ਸਾਹਨੀ ਦੀ ਸਰਪ੍ਰਸਤੀ ਹੇਠ, ਨਵੀਂ ਦਿੱਲੀ ਦੇ ਕਨਾਟ ਪਲੇਸ ਵਿਖੇ 'ਵਿਸਾਖੀ ਸੁਪਰਸਿੱਖ 5K ਮੈਰਾਥਨ' ਦੇ ਤੀਜੇ ਐਡੀਸ਼ਨ ਦਾ ਸਫਲਤਾਪੂਰਵਕ ਆਯੋਜਨ ਕੀਤਾ। ਇਸ ਸਮਾਗਮ ਵਿੱਚ ਹਰ ਉਮਰ ਸਮੂਹ ਦੇ 3000 ਤੋਂ ਵੱਧ ਨਾਗਰਿਕਾਂ ਦੀ ਉਤਸ਼ਾਹੀ ਭਾਗੀਦਾਰੀ ਦੇਖਣ ਨੂੰ ਮਿਲੀ, ਜਿਸ ਵਿੱਚ "ਨਸ਼ਿਆਂ ਨੂੰ ਨਾਂਹ ਕਹੋ ਅਤੇ ਫਿੱਟ ਇੰਡੀਆ" ਥੀਮ ਨਾਲ ਵਿਸਾਖੀ ਦੇ ਜੀਵੰਤ ਤਿਉਹਾਰ ਦਾ ਜਸ਼ਨ ਮਨਾਇਆ ਗਿਆ।

ਡਾ. ਸਾਹਨੀ ਨੇ ਕਿਹਾ ਕਿ ਫਿੱਟ ਇੰਡੀਆ ਦੇ ਸੰਦੇਸ਼ ਨੂੰ ਅਪਣਾਉਣ ਵਿੱਚ ਨਾਗਰਿਕਾਂ ਵੱਲੋਂ ਇੰਨਾ ਵੱਡਾ ਉਤਸ਼ਾਹ ਦੇਖਣਾ ਖ਼ੁਸ਼ੀ ਦੀ ਗੱਲ ਹੈ। ਵਿਸਾਖੀ ਦੇ ਪਵਿੱਤਰ ਮੌਕੇ 'ਤੇ, ਅਸੀਂ ਆਪਣੇ ਸਮਾਜ ਦੀ ਸਰੀਰਕ ਅਤੇ ਮਾਨਸਿਕ ਤੰਦਰੁਸਤੀ ਲਈ ਅਸੀ ਏਕਤਾ ,ਸ਼ਕਤੀ ਅਤੇ ਜੀਵਨ ਮੁੱਲਾਂ ਪ੍ਰਤੀ ਆਪਣੇ ਆਪ ਨੂੰ ਵਚਨਬੱਧ ਕਰਦੇ ਹਾਂ, ਜਿਸ ਦਾ ਇਹ ਤਿਉਹਾਰ ਪ੍ਰਤੀਕ ਹੈ।

ਡਾ. ਸਾਹਨੀ ਨੇ ਜ਼ੋਰ ਦੇ ਕੇ ਕਿਹਾ ਕਿ ਇਹ ਮੈਰਾਥਨ ਸਿਰਫ਼ ਇੱਕ ਦੌੜ ਨਹੀਂ ਹੈ, ਸਗੋਂ ਇਹ ਸਾਡੇ ਨੌਜਵਾਨਾਂ ਅਤੇ ਸਮਾਜ ਨੂੰ ਨਸ਼ਿਆਂ ਤੋਂ ਨਾਂਹ ਕਹਿਣ ਲਈ ਜਾਗਰੂਕ ਕਰਨ ਦੀ ਇੱਕ ਲਹਿਰ ਹੈ। ਅੱਜ ਦੇ ਸਮੇਂ ਵਿੱਚ, ਜਦੋਂ ਨਸ਼ਿਆਂ ਦੀ ਦੁਰਵਰਤੋਂ ਕਾਰਨ ਬਹੁਤ ਸਾਰੀਆਂ ਨੌਜਵਾਨ ਜ਼ਿੰਦਗੀਆਂ ਨੂੰ ਆਪਣੀ ਲਪੇਟ ਵਿੱਚ ਲੈਣ ਦਾ ਖ਼ਤਰਾ ਹੈ, ਸਾਨੂੰ ਸਰਗਰਮੀ ਨਾਲ ਕੰਮ ਕਰਨਾ ਚਾਹੀਦਾ ਹੈ। ਬੱਚਿਆਂ ਨੂੰ ਜਲਦੀ ਸਿੱਖਿਅਤ ਕਰਨਾ ਅਤੇ ਪਰਿਵਾਰਾਂ ਅਤੇ ਭਾਈਚਾਰਿਆਂ ਨੂੰ ਸਸ਼ਕਤ ਬਣਾਉਣਾ ਨਸ਼ਾ ਮੁਕਤ ਭਾਰਤ ਬਣਾਉਣ ਦਾ ਸਭ ਤੋਂ ਪ੍ਰਭਾਵਸ਼ਾਲੀ ਤਰੀਕਾ ਹੈ।

ਇਸ ਮੌਕੇ ’ਤੇ ਭਾਗੀਦਾਰਾਂ ਦੇ ਬੇਮਿਸਾਲ ਯਤਨਾਂ ਨੂੰ ਮਾਨਤਾ ਦੇਣ ਲਈ, ਵੱਖ-ਵੱਖ ਸ਼੍ਰੇਣੀਆਂ ਦੇ ਤਹਿਤ ਬਹੁਤ ਸਾਰੇ ਭਾਗੀਦਾਰਾਂ ਨੂੰ ਇਨਾਮ ਵੀ ਪ੍ਰਦਾਨ ਕੀਤੇ  ਗਏ। ਪੁਰਸ਼ ਸ਼੍ਰੇਣੀ ਲਈ ਪਹਿਲਾ ਇਨਾਮ ਚੰਦਰਪਾਲ ਚੌਧਰੀ ਨੂੰ ਦਿੱਤਾ ਗਿਆ ਅਤੇ ਮਹਿਲਾ ਸ਼੍ਰੇਣੀ ਵਿੱਚ, ਭਾਰਤੀ ਨੇ ਪਹਿਲਾ ਇਨਾਮ ਪ੍ਰਾਪਤ ਕੀਤਾ।

ਡਾ. ਸਾਹਨੀ ਨੇ ਜੇਤੂਆਂ ਨੂੰ ਨਿੱਜੀ ਤੌਰ 'ਤੇ ਸਨਮਾਨਿਤ ਕੀਤਾ ਅਤੇ ਤੰਦਰੁਸਤੀ ਅਤੇ ਸਮਾਜਿਕ ਜਾਗਰੂਕਤਾ ਪ੍ਰਤੀ ਉਨ੍ਹਾਂ ਦੇ ਸਮਰਪਣ ਦੀ ਸ਼ਲਾਘਾ ਕੀਤੀ। ਉਹਨਾਂ ਕਿਹਾ ਕਿ ਹਰ ਬੀਤਦੇ ਸਾਲ ਦੇ ਨਾਲ, ਵਿਸਾਖੀ ਸੁਪਰਸਿੱਖ ਮੈਰਾਥਨ ਇੱਕ ਬਿਹਤਰ ਕੱਲ੍ਹ ਲਈ ਭਾਈਚਾਰਕ ਭਾਵਨਾ, ਤੰਦਰੁਸਤੀ ਅਤੇ ਸਮੂਹਿਕ ਕਾਰਵਾਈ ਦੇ ਇੱਕ ਪ੍ਰਕਾਸ਼ ਵਜੋਂ ਵਧ ਰਿਹਾ ਹੈ।