ਔਰੰਗਾਬਾਦ 'ਚ ਤਣਾਅ ਬਰਕਰਾਰ, ਐਸਆਰਪੀਐਫ ਅਤੇ ਦੰਗਾ ਕੰਟਰੋਲ ਬਲਾਂ ਦੀਆਂ 8 ਕੰਪਨੀਆਂ ਤਾਇਨਾਤ

8 company srpf and riot control police deployed in aurangabad

ਔਰੰਗਾਬਾਦ: ਮਹਾਰਾਸ਼ਟਰ ਦੇ ਔਰੰਗਾਬਾਦ ਵਿਚ ਦੋ ਗੁੱਟਾਂ ਵਿਚਕਾਰ ਝੜਪ ਵਿਚ ਦੋ ਲੋਕਾਂ ਦੀ ਮੌਤ ਤੋਂ ਬਾਅਦ ਤਣਾਅ ਬਰਕਰਾਰ ਹੈ। ਔਰੰਗਾਬਾਦ ਦੇ ਕਾਰਜਕਾਰੀ ਕਮਿਸ਼ਨਰ ਅਤੇ ਸਪੈਸ਼ਲ ਆਈਜੀ ਮਿਲਿੰਦ ਭਾਰਾਂਬੇ ਨੇ ਕਿਹਾ ਕਿ ਦੋ ਵਿਚੋਂ ਇਕ ਦੀ ਮੌਤ ਪਲਾਸਟਿਕ ਦੀ ਗੋਲੀ ਲੱਗਣ ਨਾਲ ਹੋਈ ਜਦਕਿ ਦੂਜੇ ਦੀ ਡਿੱਗਣ ਨਾਲ। ਕੁੱਝ ਪੁਲਿਸ ਅਧਿਕਾਰੀਆਂ ਅਤੇ ਕਾਂਸਟੇਬਲਾਂ ਨੂੰ ਵੀ ਸੱਟਾਂ ਵੱਜੀਆਂ ਹਨ। ਸਥਿਤੀ ਹੁਣ ਕਾਬੂ ਵਿਚ ਹੈ। 

ਉਨ੍ਹਾਂ ਕਿਹਾ ਕਿ ਮੌਕੇ 'ਤੇ ਸਟੇਟ ਰਿਜ਼ਰਵ ਪੁਲਿਸ ਫ਼ੋਰਸ (ਐਸਆਰਪੀਐਫ) ਦੀ 7 ਅਤੇ ਦੰਗਾ ਕੰਟਰੋਲ ਪੁਲਿਸ ਦੀ ਇਕ ਕੰਪਨੀ ਤਾਇਨਾਤ ਕੀਤੀ ਗਈ ਹੈ। ਮਿਲਿੰਦ ਭਾਰਾਂਬੇ ਨੇ ਕਿਹਾ ਕਿ ਮਾਮਲੇ ਵਿਚ ਐਫਆਈਆਰ ਦਰਜ ਕਰ ਲਈ ਗਈ ਹੈ। ਕੁੱਝ ਲੋਕਾਂ ਨੂੰ ਹਿਰਾਸਤ ਵਿਚ ਲਿਆ ਗਿਆ ਹੈ ਅਤੇ ਗ੍ਰਿਫ਼ਤਾਰੀ ਤੋਂ ਪਹਿਲਾਂ ਪੂਰੀ ਪੜਤਾਲ ਕੀਤੀ ਜਾ ਰਹੀ ਹੈ। 

‍ਜ਼ਿਕਰਯੋਗ ਹੈ ਕਿ ਔਰੰਗਾਬਾਦ ਵਿਚ ਸ਼ੁਕਰਵਾਰ ਨੂੰ ਦੋ ਗੁੱਆਂ ਵਿਚਕਾਰ ਝੜਪ ਵਿਚ ਦੋ ਲੋਕਾਂ ਦੀ ਮੌਤ ਹੋ ਗਈ ਸੀ। ਪੁਲਿਸ ਅਤੇ ਲੋਕਾਂ ਵਿਚਕਾਰ ਝੜਪ ਵਿਚ ਦਸ ਪੁਲਿਸ ਵਾਲਿਆਂ ਅਤੇ 30 ਤੋਂ ਜ਼ਿਆਦਾ ਲੋਕ ਜ਼ਖ਼ਮੀ ਹੋ ਗਏ ਸਨ। ਵਿਵਾਦ ਦੋ ਗੁੱਟਾਂ ਵਿਚਕਾਰ ਪਾਣੀ ਦੇ ਕੁਨੈਕਸ਼ਨ ਨੂੰ ਲੈ ਕੇ ਸ਼ੁਰੂ ਹੋਇਆ ਸੀ ਅਤੇ ਹੌਲੀ ਹੌਲੀ ਇਹ ਵਧਦਾ ਗਿਆ। ਵਿਵਾਦ ਤੋਂ ਬਾਅਦ ਪਥਰਾਅ ਅਤੇ ਅਗਜ਼ਨੀ ਦੀਆਂ ਘਟਨਾਵਾਂ ਵਾਪਰੀਆਂ।

ਸ਼ਾਹਗੰਜ ਇਲਾਕੇ ਵਿਚ ਕੁੱਝ ਦੁਕਾਨਾਂ ਅਤੇ ਗੱਡੀਆਂ ਨੂੰ ਵੀ ਅੱਗ ਦੇ ਹਵਾਲੇ ਕਰ ਦਿਤਾ ਗਿਆ। ਭੀੜ 'ਤੇ ਕਾਬੂ ਪਾਉਣ ਲਈ ਅੱਥਰੂ ਗੈਸ ਦੀ ਵਰਤੋਂ ਕਰਨੀ ਪਈ। ਪੁਲਿਸ ਨੇ ਇਲਾਕੇ ਵਿਚ ਧਾਰਾ 144 ਲਗਾ ਦਿਤੀ ਹੈ ਅਤੇ ਇੰਟਰਨੈੱਟ ਸੇਵਾ 'ਤੇ ਵੀ ਰੋਕ ਲਗਾ ਦਿਤੀ ਗਈ ਹੈ।