ਕੁਸ਼ੀਨਗਰ 'ਚ ਫਿਰ ਪੈਰ ਪਸਾਰ ਰਿਹੈ ਇੰਸੇਫੇਲਾਈਟਿਸ, ਮਰੀਜ਼ਾਂ ਦੀ ਗਿਣਤੀ 'ਚ ਹੋਇਆ ਵਾਧਾ

up number of encephalitis patients increased in kushinagar

ਕੁਸ਼ੀਨਗਰ (ਉਤਰ ਪ੍ਰਦੇਸ਼) : ਉਤਰ ਪ੍ਰਦੇਸ਼ ਦੇ ਕੁਸ਼ੀਨਗਰ ਵਿਚ ਇੰਸੇਫੇਲਾਈਟਿਸ ਫਿਰ ਪੈਰ ਪਸਾਰ ਰਿਹਾ ਹੈ। ਇਸ ਵਾਰ ਆਫ਼ ਸੀਜ਼ਨ ਵਿਚ ਹੀ ਇੰਸੇਫੇਲਾਈਟਿਸ ਦੇ ਮਰੀਜ਼ਾਂ ਦੀ ਗਿਣਤੀ ਵਧਦੀ ਜਾ ਰਹੀ ਹੈ। ਹਰ ਦਿਨ ਜ਼ਿਲ੍ਹਾ ਹਸਪਤਾਲ ਵਿਚ ਔਸਤਨ 10 ਮਰੀਜ਼ ਭਰਤੀ ਹੋ ਰਹੇ ਹਨ, ਜਿਨ੍ਹਾਂ ਵਿਚ ਦੋ ਤੋਂ ਤਿੰਨ ਦੀ ਖ਼ਰਾਬ ਹਾਲਤ ਹੋਣ ਕਾਰਨ ਆਈਸੀਯੂ ਵਾਰਡ ਵਿਚ ਰੱਖਣਾ ਪੈ ਰਿਹਾ ਹੈ। ਇਹ ਸਿਲਸਿਲਾ ਇਕ ਹਫ਼ਤੇ ਤੋਂ ਚੱਲ ਰਿਹਾ ਹੈ। 

ਜ਼ਿਲ੍ਹਾ ਹਸਪਤਾਲ ਵਿਚ 10 ਬੈੱਡ ਦਾ ਏਈਐਸ ਵਾਰਡ ਅਤੇ 10 ਬੈੱਡ ਆਈਸੀਯੂ ਹੈ। ਸਨਿਚਰਵਾਰ ਸਵੇਰੇ ਏਈਐਸ ਵਾਰਡ ਫੁਲ ਸੀ, ਜਦਕਿ ਆਈਸੀਯੂ ਵਿਚ ਇੰਸੇਫੇਲਾਈਟਿਸ ਦੇ ਤਿੰਨ ਗੰਭੀਰ ਮਰੀਜ਼ਾਂ ਦਾ ਇਲਾਜ ਚੱਲ ਰਿਹਾ ਸੀ। ਇਹ ਤਿੰਨੇ 10 ਸਾਲ ਤੋਂ ਘੱਟ ਉਮਰ ਦੇ ਬੱਚੇ ਹਨ। ਡਾਕਟਰਾਂ ਮੁਤਾਬਕ ਰੋਜ਼ ਔਸਤਨ 10 ਮਰੀਜ਼ ਆ ਰਹੇ ਹਨ, ਜਿਨ੍ਹਾਂ ਵਿਚੋਂ ਦੋ ਤੋਂ ਤਿੰਨ ਨੂੰ ਇਕ ਦੋ ਦਿਨ ਆਈਸੀਯੂ ਵਿਚ ਰੱਖਣਾ ਪੈ ਰਿਹਾ ਹੈ। 

ਸਾਰੇ ਸੀਐਚਸੀ ਅਤੇ ਪੀਐਚਸੀ 'ਤੇ ਇੰਸੇਫੇਲਾਈਟਿਸ ਲਈ 4-4 ਬੈੱਡ ਰਾਖਵੇਂ ਹਨ। ਮੁੱਖ ਮੈਡੀਕਲ ਅਧਿਕਾਰੀ ਡਾ. ਬਜਰੰਗੀ ਪਾਂਡੇ ਨੇ ਦਸਿਆ ਕਿ ਜ਼ਿਲ੍ਹਾ ਹਸਪਤਾਲ ਵਿਚ ਏਈਐਸ ਅਤੇ ਆਈਸੀਯੂ ਸਰਗਰਮ ਹਨ। ਮਰੀਜ਼ਾਂ ਦੇ ਆਉਣ ਦਾ ਸਿਲਸਿਲਾ ਲਗਾਤਾਰ ਬਣਿਆ ਹੋਇਆ ਹੈ।

ਦਸ ਦਈਏ ਕਿ ਕੁਸ਼ੀਨਗਰ ਗੋਰਖ਼ਪੁਰ ਨਾਲ ਜੁੜਿਆ ਹੋਇਆ ਜ਼ਿਲ੍ਹਾ ਹੈ ਅਤੇ ਇਹ ਜ਼ਿਲ੍ਹਾ ਪਹਿਲਾਂ ਵੀ ਇੰਸੇਫੇਲਾਈਟਿਸ ਦਾ ਕਹਿਰ ਝੱਲ ਚੁੱਕਾ ਹੈ।