ਨੇਪਾਲ ’ਚ ਅਸ਼ਾਂਤੀ ਕਾਰਨ ਭਾਰਤ ’ਚ ਵੜਨ ਦੀ ਕੋਸ਼ਿਸ਼ ਕਰ ਰਹੇ ਜੇਲ੍ਹ ’ਚੋਂ ਫ਼ਰਾਰ ਕੈਦੀ, ਕਈ ਗ੍ਰਿਫ਼ਤਾਰ

ਨਵੀਂ ਦਿੱਲੀ : ਸਸ਼ਸਤਰ ਸੀਮਾ ਬਲ (ਐਸ.ਐਸ.ਬੀ.) ਨੇ ਨੇਪਾਲ ’ਚ ਹਾਲ ਹੀ ’ਚ ਹੋਏ ਸਰਕਾਰ ਵਿਰੋਧੀ ਪ੍ਰਦਰਸ਼ਨਾਂ ਦੌਰਾਨ ਜੇਲ੍ਹਾਂ ਵਿਚੋਂ ਫਰਾਰ ਹੋਣ ਦੇ ਸ਼ੱਕ ’ਚ ਦੋ ਨਾਈਜੀਰੀਅਨ ਅਤੇ ਇਕ ਬ੍ਰਾਜ਼ੀਲ ਦੇ ਨਾਗਰਿਕ ਨੂੰ ਗ੍ਰਿਫਤਾਰ ਕੀਤਾ ਹੈ।

ਅਧਿਕਾਰੀਆਂ ਨੇ ਦਸਿਆ ਕਿ ਭਾਰਤ-ਨੇਪਾਲ ਕੌਮਾਂਤਰੀ ਸਰਹੱਦ ਦੀ ਰਾਖੀ ਕਰ ਰਹੇ ਫੋਰਸ ਅਤੇ ਵੱਖ-ਵੱਖ ਸੂਬਿਆਂ ’ਚ ਪੁਲਿਸ ਨੇ ਹੁਣ ਤਕ 1,751 ਕਿਲੋਮੀਟਰ ਲੰਬੀ ਵਾੜ ਰਹਿਤ ਮੋਰਚੇ ਉਤੇ ਵੱਖ-ਵੱਖ ਥਾਵਾਂ ਤੋਂ 79 ਤੋਂ ਵੱਧ ਲੋਕਾਂ ਨੂੰ ਫੜਿਆ ਹੈ। 

ਇਨ੍ਹਾਂ ਵਿਚ ਦੋ ਨਾਈਜੀਰੀਆਈ ਨਾਗਰਿਕ, ਇਕ ਬ੍ਰਾਜ਼ੀਲੀਅਨ, ਇਕ ਬੰਗਲਾਦੇਸ਼ੀ ਨਾਗਰਿਕ ਅਤੇ ਕੁੱਝ ਭਾਰਤੀ ਸ਼ਾਮਲ ਹਨ। ਅਧਿਕਾਰੀਆਂ ਮੁਤਾਬਕ ਗੁਆਂਢੀ ਦੇਸ਼ ’ਚ ਸਰਕਾਰ ਵਿਰੋਧੀ ਪ੍ਰਦਰਸ਼ਨਾਂ ਤੋਂ ਬਾਅਦ ਵੱਖ-ਵੱਖ ਜੇਲ੍ਹਾਂ ਤੋਂ ਭੱਜਣ ਤੋਂ ਬਾਅਦ ਇਨ੍ਹਾਂ ਲੋਕਾਂ ਨੂੰ ਪਿਛਲੇ ਤਿੰਨ-ਚਾਰ ਦਿਨਾਂ ਤੋਂ ਸਰਹੱਦ ਤੋਂ ਫੜਿਆ ਗਿਆ ਹੈ। 

ਅਧਿਕਾਰੀਆਂ ਨੇ ਦਸਿਆ ਕਿ ਇਨ੍ਹਾਂ ਵਿਚੋਂ 43 ਲੋਕਾਂ ਨੂੰ ਬਿਹਾਰ ਦੀ ਕੌਮਾਂਤਰੀ ਸਰਹੱਦ ਉਤੇ, 22 ਉੱਤਰ ਪ੍ਰਦੇਸ਼ ਤੋਂ, 12 ਉੱਤਰਾਖੰਡ ਅਤੇ ਦੋ ਪਛਮੀ ਬੰਗਾਲ ਤੋਂ ਫੜੇ ਗਏ ਹਨ। ਅਧਿਕਾਰੀਆਂ ਨੇ ਦਸਿਆ ਕਿ ਨਾਈਜੀਰੀਅਨ ਅਤੇ ਬ੍ਰਾਜ਼ੀਲ ਦੇ ਨਾਗਰਿਕਾਂ ਨੂੰ ਸ਼ੁਕਰਵਾਰ ਨੂੰ ਬਿਹਾਰ (ਜੈਨਗਰ) ਤੋਂ ਗ੍ਰਿਫਤਾਰ ਕੀਤਾ ਗਿਆ ਸੀ, ਜਦਕਿ ਬੰਗਲਾਦੇਸ਼ੀ ਨੂੰ ਕੁੱਝ ਦਿਨ ਪਹਿਲਾਂ ਸੂਬੇ ਤੋਂ ਗ੍ਰਿਫਤਾਰ ਕੀਤਾ ਗਿਆ ਸੀ। ਭਾਰਤ-ਨੇਪਾਲ ਸਰਹੱਦ ਪੰਜ ਸੂਬਿਆਂ ਦੇ 20 ਜ਼ਿਲ੍ਹਿਆਂ ਵਿਚ ਫੈਲੀ ਹੋਈ ਹੈ। 

ਐਸ.ਐਸ.ਬੀ. ਨੇ ਨੇਪਾਲ ਵਿਚ ਫਸੇ ਭਾਰਤੀਆਂ ਦੀ ਸਹਾਇਤਾ ਲਈ ਤਿੰਨ ਐਮਰਜੈਂਸੀ ਹੈਲਪਲਾਈਨ ਨੰਬਰ ਜਾਰੀ ਕੀਤੇ ਹਨ। ਹੈਲਪਲਾਈਨ ਨੰਬਰ 1903 ਉੱਤਰ ਪ੍ਰਦੇਸ਼, ਬਿਹਾਰ, ਪਛਮੀ ਬੰਗਾਲ ਅਤੇ ਉੱਤਰਾਖੰਡ ਵਿਚ ਦੋ ਹੋਰ ਲਾਈਨਾਂ - 0522-2728816 ਅਤੇ 0522-298657 ਤੋਂ ਇਲਾਵਾ ਕੰਮ ਕਰ ਰਿਹਾ ਹੈ। 

ਨੇਪਾਲ ਦੇ ਰਾਸ਼ਟਰਪਤੀ ਰਾਮਚੰਦਰ ਪੌਡੇਲ ਦੇ ਦਫ਼ਤਰ ਨੇ ਸਨਿਚਰਵਾਰ ਨੂੰ ਐਲਾਨ ਕੀਤਾ ਕਿ ਨੇਪਾਲ ਦੀਆਂ ਅਗਲੀਆਂ ਸੰਸਦੀ ਚੋਣਾਂ 5 ਮਾਰਚ ਨੂੰ ਹੋਣਗੀਆਂ। ਨੇਪਾਲ ਪੁਲਿਸ ਨੇ ਸ਼ੁਕਰਵਾਰ ਨੂੰ ਕਿਹਾ ਸੀ ਕਿ ਜਨਰਲ ਜ਼ੈਡ ਦੀ ਅਗਵਾਈ ਵਾਲੇ ਪ੍ਰਦਰਸ਼ਨਾਂ ਵਿਚ ਇਕ ਭਾਰਤੀ ਔਰਤ ਸਮੇਤ ਘੱਟੋ-ਘੱਟ 51 ਲੋਕਾਂ ਦੀ ਮੌਤ ਹੋ ਗਈ ਸੀ।