ਅੰਤਰਰਾਸ਼ਟਰੀ ਅਥਲੀਟ ਪਰਵਿੰਦਰ ਚੌਧਰੀ ਨੇ ਕੀਤੀ ਖੁਦਕੁਸ਼ੀ, ਹੋਸਟਲ 'ਚ ਮਿਲੀ ਲਾਸ਼
ਦੋਸਤਾਂ ਮੁਤਾਬਕ ਪਰਵਿੰਦਰ ਕਾਫੀ ਮਿਲਣਸਾਰ ਸੁਭਾਅ ਦਾ ਸੀ। ਕਿਸੇ ਨੂੰ ਵੀ ਉਸ ਦੀ ਖ਼ੁਦਕੁਸ਼ੀ ਦਾ ਕਾਰਨ ਸਮਝ ਵਿਚ ਨਹੀਂ ਆ ਰਿਹਾ ਹੈ।
ਨਵੀਂ ਦਿੱਲੀ , ( ਭਾਸ਼ਾ ) : ਅੰਤਰਰਾਸ਼ਟਰੀ ਅਥਲੀਟ ਪਰਵਿੰਦਰ ਚੌਧਰੀ ਨੇ ਦਿੱਲੀ ਵਿਖੇ ਨਹਿਰੂ ਸਟੇਡੀਆਮ ਦੇ ਹੋਸਟਲ ਵਿਚ ਖੁਦਕੁਸ਼ੀ ਕਰ ਲਈ। ਪਰਵਿੰਦਰ ਨੇ ਹੋਸਟਲ ਦੇ ਕਮਰੇ ਵਿਚ ਫਾਹਾ ਲਗਾ ਕੇ ਜਾਨ ਦੇ ਦਿਤੀ। ਦੱਸ ਦਈਏ ਕਿ ਪਰਵਿੰਦਰ ਅਲੀਗੜ੍ਹ ਦਾ ਰਹਿਣ ਵਾਲਾ ਸੀ ਅਤੇ ਇਥੇ ਇਕ ਕੈਂਪ ਵਿਚ ਹਿੱਸਾ ਲੈਣ ਆਇਆ ਹੋਇਆ ਸੀ। 18 ਸਾਲ ਦੇ ਪਰਵਿੰਦਰ ਦੀ ਚੋਣ ਕੁਝ ਚਿਰ ਪਹਿਲਾਂ ਹੀ ਖੇਡਾਂ ਦੇ ਕੋਟੋ ਵਿਚੋਂ ਹੋਈ ਸੀ।
ਉਸ ਦੇ ਇਸ ਕਦਮ ਨਾਲ ਉਸ ਦੇ ਦੋਸਤ ਸਦਮੇ ਵਿਚ ਹਨ। ਦੋਸਤਾਂ ਮੁਤਾਬਕ ਪਰਵਿੰਦਰ ਕਾਫੀ ਹਸਮੁਖ ਅਤੇ ਮਿਲਣਸਾਰ ਸੁਭਾਅ ਦਾ ਸੀ। ਕਿਸੇ ਨੂੰ ਵੀ ਉਸ ਦੀ ਖ਼ੁਦਕੁਸ਼ੀ ਦਾ ਕਾਰਨ ਸਮਝ ਵਿਚ ਨਹੀਂ ਆ ਰਿਹਾ ਹੈ। ਉਥੇ ਹੀ ਹਾਦਸੇ ਦੀ ਖ਼ਬਰ ਮਿਲਦੇ ਹੀ ਮੌਕੇ ਤੇ ਪੁੱਜੀ ਪੁਲਿਸ ਨੇ ਲਾਸ਼ ਨੂੰ ਕਬਜ਼ੇ ਵਿਚ ਲੈ ਕੇ ਪੋਸਟਮਾਰਟਮ ਲਈ ਭੇਜ ਦਿਤਾ। ਪੁਲਿਸ ਨੇ ਕਮਰੇ ਨੂੰ ਸੀਲ ਕਰਕੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿਤੀ ਹੈ।
ਭਾਰਤੀ ਖੇਡ ਅਥਾਰਿਟੀ ਮੁਤਾਬਕ ਕੱਲ ਸਵੇਰੇ ਪਰਵਿੰਦਰ ਚੌਧਰੀ ਦੀ ਅਪਣੇ ਪਿਤਾ ਨਾਲ ਕਿਸੇ ਮਾਮਲੇ ਦੇ ਸਬੰਧ ਵਿਚ ਗੱਲਬਾਤ ਹੋਈ ਸੀ। ਗੱਲਬਾਤ ਦੌਰਾਨ ਦੋਹਾਂ ਪਿਓ-ਪੁੱਤ ਵਿਚਕਾਰ ਕਿਸੇ ਗੱਲ ਤੇ ਵਿਵਾਦ ਹੋਇਆ ਦੱਸਿਆ ਜਾ ਰਿਹਾ ਹੈ। ਜਿਸ ਤੋਂ ਬਾਅਦ ਪਰਵਿੰਦਰ ਦੀ ਭੈਣ ਨੇ ਉਸ ਨਾਲ ਫੋਨ ਤੇ ਗੱਲ ਵੀ ਕੀਤੀ ਸੀ। ਇਸ ਦੌਰਾਨ ਵੀ ਦੋਹਾਂ ਵਿਚਕਾਰ ਕਿਸੇ ਵਿਵਾਦ ਨੂੰ ਲੈ ਕੇ ਗੱਲਬਾਤ ਹੋਈ ਸੀ।
ਪਰ ਕਿਸੇ ਨੂੰ ਵੀ ਉਸ ਵੱਲੋਂ ਚੁੱਕੇ ਗਏ ਇਸ ਖਤਰਨਾਕ ਕਦਮ ਬਾਰੇ ਪਤਾ ਨਹੀਂ ਲਗ ਸਕਿਆ। ਹਾਦਸੇ ਤੋਂ ਬਾਅਦ ਮੌਕੇ ਤੇ ਪੁੱਜੀ ਪੁਲਿਸ ਨੇ ਇਸ ਦੀ ਸੂਚਨਾ ਪਰਵਿੰਦਰ ਦੇ ਪਰਵਾਰ ਵਾਲਿਆਂ ਨੂੰ ਦਿਤੀ।