ਕੋਰੋਨਾ ਨੇ ਲਈ 9 ਮਹੀਨੇ ਦੇ ਬੱਚੇ ਦੀ ਜਾਨ, ਅੰਨ੍ਹੇ ਮਾਂ-ਬਾਪ ਦਾ ਇਕਲੌਤਾ ਚਿਰਾਗ਼ ਬੁਝਿਆ

 Baby

ਨਵੀਂ ਦਿੱਲੀ : ਅਪਣੇ ਨੇਤਰਹੀਣ ਮਾਤਾ-ਪਿਤਾ ਦੀ ਇਕਲੌਤੀ ਔਲਾਦ 9 ਮਹੀਨੇ ਦੇ ਕ੍ਰਿਸ਼ੂ ਦੀ ਦਿੱਲੀ ਦੇ ਇਕ ਸਰਕਾਰੀ ਹਸਪਤਾਲ ’ਚ ਕੋਰੋਨਾ ਕਾਰਨ ਮੌਤ ਹੋ ਗਈ, ਜਦੋਂ ਕਿ ਉਸ ਦਾ ਪਿਤਾ ਇਕ ਹੋਰ ਹਸਪਤਾਲ ’ਚ ਲਾਗ ਨਾਲ ਲੜ ਰਿਹਾ ਹੈ।

ਸਾਬਕਾ ਭਾਜਪਾ ਵਿਧਾਇਕ ਜਿਤੇਂਦਰ ਸਿੰਘ ‘ਸ਼ੰਟੀ’ ਨੇ ਵੀਰਵਾਰ ਸ਼ਾਮ ਉਲਡ ਸੀਮਾਪੁਰੀ ਦੇ ਇਕ ਸ਼ਮਸ਼ਾਨਘਾਟ ’ਚ ਕਿ੍ਰਸ਼ੂ ਨੂੰ ਦਫਨਾਇਆ। 2 ਦਿਨਾਂ ’ਚ ਇਹ ਦੂਜੀ ਵਾਰ ਹੈ, ਜਦੋਂ ਸਿੰਘ ਨੇ ਇੰਨੇ ਛੋਟੇ ਬੱਚੇ ਨੂੰ ਦਫਨਾਇਆ ਹੈ। ਕੋਰੋਨਾ ਦੀ ਦੂਜੀ ਲਹਿਰ ਦੌਰਾਨ, 2 ਹਜ਼ਾਰ ਤੋਂ ਵੱਧ ਅਣਜਾਣ ਲੋਕਾਂ ਦਾ ਸਨਮਾਨਪੂਰਵਕ ਅੰਤਿਮ ਸਸਕਾਰ ਕਰ ਚੁਕੇ ਸਿੰਘ (59) ਨੇ ਬੁਧਵਾਰ ਸ਼ਾਮ ਉਸੇ ਜਗ੍ਹਾ ਕੋਲ 5 ਮਹੀਨਿਆਂ ਦੀ ਪਰੀ ਨੂੰ ਦਫਨਾਇਆ ਸੀ, ਜਿਥੇ ਕ੍ਰਿਸ਼ੂ ਹੁਣ ਹਮੇਸ਼ਾ ਲਈ ਸੌਂ ਗਿਆ ਹੈ। 

 ਬੱਚੇ ਕ੍ਰਿਸ਼ੂ ਦੇ ਇਕ ਰਿਸ਼ਤੇਦਾਰ ਨੇ ਦਸਿਆ ਕਿ ਉਹ ਅਪਣੇ ਮਾਤਾ-ਪਿਤਾ ਦੀ ਇਕਲੌਤੀ ਔਲਾਦ ਸੀ, ਜੋ ਪੂਰਬੀ ਦਿੱਲੀ ’ਚ ਦਿਲਸ਼ਾਦ ਗਾਰਡਨ ’ਚ ਰਹਿੰਦੇ ਹਨ। ਉਨ੍ਹਾਂ ਰੋਂਦੇ ਹੋਏ ਕਿਹਾ,‘‘ਦੋਵੇਂ ਮਾਤਾ-ਪਿਤਾ ਨੇਤਰਹੀਣ ਹਨ।’’ ਰਿਸ਼ਤੇਦਾਰ ਨੇ ਦਸਿਆ ਕਿ ਕ੍ਰਿਸ਼ੂ ਦੀ ਮਾਂ ਕਰੀਬ 18 ਦਿਨ ਪਹਿਲਾਂ ਕੋਰੋਨਾ ਵਾਇਰਸ ਨਾਲ ਪੀੜਤ ਹੋਈ ਸੀ ਅਤੇ ਉਸ ਨੇ ਬੱਚੇ ਨੂੰ ਬ੍ਰੈਸਟ ਫੀਡਿੰਗ ਕਰਵਾਈ ਸੀ ਤਾਂ ਉਹ ਵੀ ਬੀਮਾਰ ਹੋ ਗਿਆ।

ਕੁੱਝ ਦਿਨ ਪਹਿਲਾਂ ਕਿ੍ਰਸ਼ੂ ਨੂੰ ਗੁਰੂ ਤੇਗ ਬਹਾਦਰ ਹਸਪਤਾਲ ’ਚ ਦਾਖ਼ਲ ਕਰਵਾਇਆ ਗਿਆ, ਜਿਥੇ ਵੀਰਵਾਰ ਤੜਕੇ ਉਸ ਦੀ ਮੌਤ ਹੋ ਗਈ। ਬੱਚੇ ਦੇ ਪਿਤਾ ਸ਼ਸ਼ਾਂਕ ਸ਼ੇਖਰ (26) ਤਾਹਿਰਪੁਰ ਦੇ ਰਾਜੀਵ ਗਾਂਧੀ ਸੁਪਰ ਸਪੈਸ਼ਲਿਟੀ ਹਸਪਤਾਲ ’ਚ ਜ਼ਿੰਦਗੀ ਅਤੇ ਮੌਤ ਨਾਲ ਜੰਗ ਲੜ ਰਹੇ ਹਨ। ਬੱਚੇ ਦੀ ਮਾਂ ਜੋਤੀ ਨੇ ਰੋਂਦੇ ਹੋਏ ਕਿਹਾ,‘‘ਉਨ੍ਹਾਂ ਨੂੰ ਨਹੀਂ ਪਤਾ ਕਿ ਅੱਜ ਉਨ੍ਹਾਂ ਨੇ ਅਪਣਾ ਪਿਆਰ ਕਿ੍ਰਸ਼ੂ ਗੁਆ ਦਿਤਾ ਹੈ। ਕਿ੍ਰਪਾ ਉਨ੍ਹਾਂ ਨੂੰ ਨਾ ਦੱਸਣਾ। ਹੁਣ ਮੈਂ ਉਨ੍ਹਾਂ ਨੂੰ ਵੀ ਗੁਆਉਣਾ ਨਹੀਂ ਚਾਹੁੰਦੀ।’’