'60 ਸਾਲ ਦੀ ਉਮਰ ਤੱਕ ਜੀਅ ਕੇ ਕੀ ਕਰਨਾ' ਕਹਿ ਕੇ AIIMS ਦੇ ਡਾਕਟਰ ਨੇ ਕੀਤੀ ਖੁਦਕੁਸ਼ੀ
ਡਾ. ਮੋਹਿਤ ਆਖਰੀ ਵਾਰ ਮੰਗਲਵਾਰ ਨੂੰ ਡਿਊਟੀ 'ਤੇ ਏਮਜ਼ ਗਿਆ ਸੀ।
ਨਵੀਂ ਦਿੱਲੀ - ਸ਼ੁੱਕਰਵਾਰ ਨੂੰ ਆਲ ਇੰਡੀਆ ਇੰਸਟੀਚਿਊਟ ਆਫ ਮੈਡੀਕਲ ਸਾਇੰਸਜ਼ ( AIIMS) ਨਵੀਂ ਦਿੱਲੀ ਤੋਂ ਡਾਕਟਰ ਵੱਲੋਂ ਖੁਦਕੁਸ਼ੀ ਕਰਨ ਦਾ ਤੀਸਰਾ ਮਾਮਲਾ ਸਾਹਮਣੇ ਆਇਆ ਹੈ, ਜਦੋਂ ਕਿ ਪਿਛਲੇ ਦੋ ਮਹੀਨਿਆਂ ਵਿਚ ਏਮਜ਼ ਵਿੱਚ ਇਹ ਖ਼ੁਦਕੁਸ਼ੀ ਦਾ ਪੰਜਵਾਂ ਕੇਸ ਹੈ। ਏਮਜ਼ ਦੇ ਇੱਕ 40 ਸਾਲਾ ਡਾਕਟਰ ਦੀ ਲਾਸ਼ ਸ਼ੁੱਕਰਵਾਰ ਦੁਪਹਿਰ ਨੂੰ ਦੱਖਣੀ ਦਿੱਲੀ ਦੇ ਹੌਜ਼ ਖਾਸ ਖੇਤਰ ਵਿਚ ਕਿਰਾਏ ਦੇ ਮਕਾਨ ਵਿੱਚ ਲਟਕਦੀ ਮਿਲੀ।
ਜਦੋਂ ਇਹ ਖਬਰ ਪੁਲਿਸ ਨੂੰ ਮਿਲੀ ਤਾਂ ਪੁਲਿਸ ਮੌਕੇ ਤੇ ਘਟਨਾ ਵਾਲੀ ਜਗ੍ਹਾ ਤੇ ਪਹੁੰਚ ਗਈ। ਪੁਲਿਸ ਨੂੰ ਮੌਕੇ ਤੇ ਇਕ ਸੁਸਾਈਡ ਨੋਟ ਮਿਲਿਆ। ਖੁਦਕੁਸ਼ੀ ਕਰਨ ਤੋਂ ਪਹਿਲਾਂ ਡਾਕਟਰ ਨੇ ਸੁਸਾਈਡ ਨੋਟ ਵਿਚ ਲਿਖਿਆ ਹੈ ਕਿ ਉਹ 60-65 ਸਾਲਾਂ ਦੀ ਜ਼ਿੰਦਗੀ ਜੀਉਣ ਤੋਂ ਬਾਅਦ ਕੀ ਕਰੇਗਾ। ਪਰਿਵਾਰਕ ਮੈਂਬਰਾਂ ਤੋਂ ਪੁੱਛਗਿੱਛ ਤੋਂ ਪਤਾ ਚੱਲਿਆ ਕਿ ਉਹ ਉਦਾਸ ਰਹਿੰਦਾ ਸੀ ਅਤੇ ਕੁਝ ਸਾਲ ਪਹਿਲਾਂ ਉਹਨਾਂ ਦਾ ਇਲਾਜ ਵੀ ਹੋਇਆ ਸੀ।
ਡਾਕਟਰ ਨੇ ਪਹਿਲਾਂ ਵੀ ਖੁਦਕੁਸ਼ੀ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ। ਹੌਜ਼ ਖਾਸ ਥਾਣਾ ਪੁਲਿਸ ਨੇ ਲਾਸ਼ ਨੂੰ ਪੋਸਟ ਮਾਰਟਮ ਲਈ ਏਮਜ਼ ਵਿੱਚ ਰਖਵਾਇਆ ਹੈ। ਇਸ ਤੋਂ ਪਹਿਲਾਂ ਦੋ ਡਾਕਟਰਾਂ ਨੇ ਖੁਦਕੁਸ਼ੀ ਕਰ ਲਈ ਸੀ। ਦੱਖਣੀ ਜ਼ਿਲ੍ਹਾ ਡੀਸੀਪੀ ਅਤੁਲ ਕੁਮਾਰ ਠਾਕੁਰ ਨੇ ਦੱਸਿਆ ਕਿ ਡਾ: ਮੋਹਿਤ ਸਿੰਗਲਾ (40) ਮੂਲ ਰੂਪ ਵਿਚ ਪੰਚਕੂਲਾ, ਚੰਡੀਗੜ੍ਹ ਦਾ ਰਹਿਣ ਵਾਲਾ ਹੈ ਜੋ ਏਮਜ਼ ਵਿਖੇ ਬਾਲ ਰੋਗ ਵਿਭਾਗ ਵਿਚ ਡਾਕਟਰ ਸੀ।
ਉਹ ਗੌਤਮਗਰ, ਹੌਜ਼ਖਾਸ ਵਿਚ ਇਕੱਲਾ ਰਹਿੰਦਾ ਸੀ। ਅਣਵਿਆਹੇ ਡਾਕਟਰ ਮੋਹਿਤ 2006 ਤੋਂ ਇੱਥੇ ਇਕੱਲੇ ਰਹਿ ਰਹੇ ਸਨ। ਪੁਲਿਸ ਨੂੰ ਸ਼ੁੱਕਰਵਾਰ ਦੁਪਹਿਰ ਨੂੰ ਸੂਚਿਤ ਕੀਤਾ ਗਿਆ ਜਦੋਂ ਬਦਬੂ ਉਨ੍ਹਾਂ ਦੇ ਘਰ ਤੋਂ ਬਾਹਰ ਆਉਣੀ ਸ਼ੁਰੂ ਹੋ ਗਈ। ਪੁਲਿਸ ਦਰਵਾਜ਼ਾ ਤੋੜ ਕੇ ਘਰ ਅੰਦਰ ਦਾਖਲ ਹੋਈ ਤਾਂ ਡਾਕਟਰ ਦੀ ਲਾਸ਼ ਲਟਕ ਰਹੀ ਸੀ। ਉਸਨੇ ਆਪਣੇ ਆਪ ਨੂੰ ਇੱਕ ਚੁੰਨੀ ਨਾਲ ਫਾਂਸੀ ਲਗਾਈ ਸੀ। ਸਰੀਰ ਕਾਫ਼ੀ ਹੱਦ ਤੱਕ ਗਲ ਗਿਆ ਸੀ। ਦੱਖਣੀ ਜ਼ਿਲ੍ਹਾ ਪੁਲਿਸ ਅਧਿਕਾਰੀਆਂ ਦੇ ਅਨੁਸਾਰ ਡਾਕਟਰ ਦੇ ਘਰ ਤੋਂ ਸੁਸਾਈਡ ਨੋਟ ਮਿਲਿਆ ਹੈ।
ਸੁਸਾਈਡ ਨੋਟ ਵਿਚ ਲਿਖਿਆ ਹੋਇਆ ਹੈ ਕਿ ਉਹ 60-65 ਸਾਲ ਤੋਂ ਬਾਅਦ ਜੀਵਤ ਰਹਿ ਕੇ ਕੀ ਕਰੇਗਾ। 40 ਸਾਲਾਂ ਦੀ ਉਮਰ ਵੀ ਜੀਉਣ ਲਈ ਕਾਫ਼ੀ ਹੈ। ਹੁਣ ਉਨ੍ਹਾਂ ਦੀ ਜਿਉਣ ਦੀ ਇੱਛਾ ਖ਼ਤਮ ਹੋ ਗਈ ਹੈ। ਸੁਸਾਈਡ ਨੋਟ ਕਿਸੇ ਦੇ ਨਾਮ ਤੇ ਨਹੀਂ ਲਿਖਿਆ ਗਿਆ। ਉਸਦੇ ਮਾਪੇ ਡਾਕਟਰ ਹਨ ਅਤੇ ਉਹ ਪਿਟਮਪੁਰਾ ਵਿਚ ਰਹਿੰਦੇ ਹਨ। ਉਸਦਾ ਛੋਟਾ ਭਰਾ ਵੀ ਇੱਕ ਡਾਕਟਰ ਹੈ ਅਤੇ ਛੋਟੇ ਭਰਾ ਦੀ ਪਤਨੀ ਬੀਐਲਕੇ ਕਪੂਰ ਹਸਪਤਾਲ ਵਿਚ ਰੇਡੀਓਲੌਜੀ ਡਾਕਟਰ ਹੈ। ਜਾਣਕਾਰੀ ਤੋਂ ਬਾਅਦ ਪਰਿਵਾਰਕ ਮੈਂਬਰ ਵੀ ਪਹੁੰਚ ਗਏ ਸਨ। ਪਰਿਵਾਰਕ ਮੈਂਬਰਾਂ ਨੇ ਦੱਸਿਆ ਕਿ ਡਾ: ਮੋਹਿਤ ਦਾ ਡਿਪਰੈਸ਼ਨ ਦਾ ਇਲਾਜ ਕੀਤਾ ਗਿਆ ਸੀ ਅਤੇ ਫਿਰ ਵੀ ਉਹ ਡਿਪਰੈਸ਼ਨ ਵਿਚ ਰਹਿੰਦਾ ਸੀ। ਡਾ. ਮੋਹਿਤ ਆਖਰੀ ਵਾਰ ਮੰਗਲਵਾਰ ਨੂੰ ਡਿਊਟੀ 'ਤੇ ਏਮਜ਼ ਗਿਆ ਸੀ।