ਥੋਕ ਮੰਹਿਗਾਈ ਦਰ ਮਾਰਚ 'ਚ ਚਾਰ ਮਹੀਨੇ ਦੇ ਹੇਠਲੇ ਪੱਧਰ 'ਇਕ ਫ਼ੀ ਸਦੀ' 'ਤੇ ਰਹੀ

ਨਵੀਂ ਦਿੱਲੀ, 15 ਅਪ੍ਰੈਲ : ਖਾਣ ਦੀਆਂ ਚੀਜ਼ਾਂ ਅਤੇ ਬਾਲਣ ਦੇ ਸਸਤੇ ਹੋਣ ਨਾਲ ਥੋਕ ਮੁੱਲ ਇੰਡੈਕਸ (ਡਬਲਿਊ,ਪੀ.ਆਈ) 'ਤੇ ਆਧਾਰਤ ਮੰਹਿਗਾਈ ਦਰ ਫ਼ਰਵਰੀ ਦੇ 2.26 ਫ਼ੀ ਸਦੀ ਦੇ ਮੁਕਾਬਲੇ ਘੱਟ ਹੋ ਕੇ ਮਾਰਚ 'ਚ ਇਕ ਫ਼ੀ ਸਦੀ 'ਤੇ ਆ ਗਈ। ਇਹ ਥੋਕ ਮੰਹਿਗਾਈ ਦਰ ਦਾ ਚਾਰ ਮਹੀਨੇ ਦਾ ਹੇਠਲਾ ਪੱਧਰ ਹੈ। ਤਾਜ਼ਾ ਅਧਿਕਾਰਿਕ ਅੰਕੜਿਆਂ 'ਚ ਇਸ ਦੀ ਜਾਣਕਾਰੀ ਮਿਲੀ।

ਵਣਜ ਅਤੇ ਉਦਯੋਗ ਮੰਤਰਾਲੇ ਵਲੋਂ ਬੁਧਵਾਰ ਨੂੰ ਜਾਰੀ ਅੰਗੜਿਆਂ ਮੁਤਾਬਕ, ਇਸ ਸਾਲ ਮਾਰਚ 'ਚ ਥੋਕ ਮਹਿੰਗਾਈ ਦਰ ਸਿਰਫ਼ ਇਕ ਫ਼ੀ ਸਦੀ ਰਹੀ। ਇਸ ਤੋਂ ਪਹਿਲਾਂ ਇਹ ਫ਼ਰਵਰੀ 2020 'ਚ 2.26 ਫ਼ੀ ਸਦੀ ਅਤੇ ਮਾਰਚ 2019 'ਚ 3.10 ਫ਼ੀ ਸਦੀ ਰਹੀ ਸੀ।  ਇਹ ਥੋਕ ਮੰਹਿਗਾਈ ਦਰ ਦਾ ਚਾਰ ਮਹੀਨੇ ਦਾ ਹੇਠਲਾ ਪੱਧਰ ਹੈ। ਇਸ ਤੋਂ ਪਹਿਲਾਂ ਨਵੰਬਰ 2019 'ਚ ਇਸ ਦੀ ਦਰ 0.58 ਫ਼ੀ ਸਦੀ ਰਹੀ ਸੀ।

ਅੰਕੜਿਆਂ ਦੇ ਮੁਤਾਬਕ, ਇਸ ਦੌਰਾਨ ਖਾਣ ਦੀਆਂ ਚੀਜ਼ਾਂ ਦੀ ਮੰਹਿਗਾਈ ਦਰ ਡਿੱਗ ਕੇ 4.91 ਫ਼ੀ ਸਦੀ 'ਤੇ ਆ ਗਈ। ਫ਼ਰਵਰੀ 'ਚ ਇਸ ਦੀ ਦਰ 7.79 ਫ਼ੀ ਸਦੀ ਸੀ। ਇਸ ਦੇ ਇਲਾਵਾ ਬਾਲਣ ਅਤੇ ਬਿਜਲੀ 'ਚ 1.76 ਫ਼ੀ ਸਦੀ ਦੀ ਘੱਟ ਮੰਹਿਗਾਈ ਅਤੇ ਨਿਰਮਿਤ ਉਤਪਾਦਾਂ 'ਚ 0.34 ਫ਼ੀ ਸਦੀ ਦੀ ਮੰਹਿਗਾਈ ਦਰ ਰਹੀ। ਕੋਰੋਨਾ ਵਾਇਰਸ ਦੇ ਕਾਰਨ 25 ਮਾਰਚ ਤੋਂ ਸ਼ੁਰੂ ਹੋਏ ਦੇਸ਼ਵਿਆਪੀ ਲਾਕਡਾਊਨ ਦਾ ਅਸਰ ਇਸ ਮਹੀਨੇ ਦੇ ਦੌਰਾਨ ਅੰਕੜੇ ਜਮਾਂ ਕਰਨ 'ਤੇ ਵੀ ਪਿਆ। (ਪੀਟੀਆਈ)