ਐਂਟੀ ਕੁਰੱਪਸ਼ਨ ਬਿਊਰੋ ਦੀ ਟੀਮ ਵੱਡੀ ਕਾਰਵਾਈ ਕਰਦਿਆਂ ਇਕ ਤਹਿਸੀਲਦਾਰ ਨੂੰ ਇਕ ਕਰੋੜ 10 ਲੱਖ ਰੁਪਏ ਦੀ ਰਿਸ਼ਵਤ ਲੈਂਦਿਆਂ ਰੰਗੇ ਹੱਥੀਂ ਗ੍ਰਿਫ਼ਤਾਰ ਕੀਤਾ। ਮਾਮਲਾ ਤੇਲੰਗਾਨਾ ਸੂਬੇ ਦਾ ਏ। ਤਹਿਸੀਲਦਾਰ ਦਾ ਨਾਮ ਈ ਬਾਲਾਰਾਜੂ ਨਾਗਾਰਾਜੂ ਹੈ ਜੋ ਮਡਚਲ ਮਲਕਾਜਗਿਰੀ ਜ਼ਿਲ੍ਹੇ ਦੀ ਕਿਸਾਰਾ ਤਹਿਸੀਲ ਵਿਚ ਤਹਿਸੀਲਦਾਰ ਹੈ।
ਇਹ ਜ਼ਿਲ੍ਹਾ ਹੈਦਰਾਬਾਦ ਤੋਂ ਕੱਢ ਕੇ ਬਣਾਇਆ ਗਿਆ। ਏਸੀਬੀ ਅਨੁਸਾਰ 14 ਅਗਸਤ ਦੀ ਰਾਤ ਨੂੰ ਨਾਗਾਰਾਜੂ ਦੇ ਘਰ ਛਾਪਾ ਮਾਰਿਆ ਗਿਆ, ਜਿਸ ਦੌਰਾਨ ਉਸ ਨੂੰ ਰਿਸ਼ਵਤ ਲੈਂਦੇ ਰੰਗੇ ਹੱਥੀਂ ਗ੍ਰਿਫ਼ਤਾਰ ਕੀਤਾ ਗਿਆ।
ਛਾਪੇ ਦੀ ਕਾਰਵਾਈ 15 ਅਗਸਤ ਦੀ ਸਵੇਰ ਤੱਕ ਚੱਲੀ। ਇਸ ਛਾਪੇਮਾਰੀ ਦਾ ਇਕ ਵੀਡੀਓ ਸੋਸ਼ਲ ਮੀਡੀਆ 'ਤੇ ਕਾਫੀ ਜ਼ਿਆਦਾ ਵਾਇਰਲ ਹੋ ਰਿਹਾ ਜਿਸ ਵਿਚ ਇਕ ਮੰਜੇ 'ਤੇ ਨੋਟਾਂ ਦੀਆਂ ਗੱਥੀਆਂ ਪਈਆਂ ਦਿਖਾਈ ਦੇ ਰਹੀਆਂ ਨੇ।
ਇਨ੍ਹਾਂ ਨੋਟਾਂ ਵਿਚ ਜ਼ਿਆਦਾਦਰ 500 ਰੁਪਏ ਦੀਆਂ ਗੱਥੀਆਂ ਨੇ। ਕੁੱਝ ਗੱਥੀਆਂ 50, 100 ਅਤੇ 200 ਰੁਪਏ ਦੇ ਨੋਟਾਂ ਦੀਆਂ ਵੀ ਦਿਖਾਈ ਦੇ ਰਹੀਆਂ ਨੇ। ਇਕ ਹੋਰ ਵੀਡੀਓ ਵਿਚ ਨੋਟਾਂ ਨਾਲ ਭਰਿਆ ਹੋਇਆ ਬੈਗ ਵੀ ਦਿਖਾਈ ਦੇ ਰਿਹਾ। ਨੋਟਾਂ ਨਾਲ ਭਰੇ ਅਜਿਹੇ ਕਰੀਬ 3-4 ਬੈਗ ਇਸ ਤਹਿਸੀਲਦਾਰ ਦੇ ਘਰੋਂ ਮਿਲੇ ਨੇ।
ਦੋਸ਼ ਹੈ ਕਿ ਤਹਿਸੀਲਦਾਰ ਨੇ 28 ਏਕੜ ਜ਼ਮੀਨ ਨਾਲ ਜੁੜੀ ਫਾਈਲ ਨੂੰ ਪਾਸ ਕਰਨ ਦੇ ਬਦਲੇ ਇਹ ਰਿਸ਼ਵਤ ਮੰਗੀ ਸੀ। ਏਸੀਬੀ ਨੇ ਤਹਿਸੀਲਦਾਰ ਦੇ ਨਾਲ ਹੀ ਦੇਹਾਤ ਆਮਦਨ ਅਧਿਕਾਰੀ ਬੀ ਸਾਈਰਾਜ ਅਤੇ ਰਿਅਲ ਅਸਟੇਟ ਏਜੰਟਾਂ ਨੂੰ ਵੀ ਛਾਪੇ ਤੋਂ ਬਾਅਦ ਹਿਰਾਸਤ ਵਿਚ ਲੈ ਲਿਆ। ਤਹਿਸੀਲਦਾਰ ਦੇ ਘਰ ਤੋਂ ਜ਼ਬਤ ਹੋਈ ਰਕਮ ਨੂੰ ਗਿਣਨ ਦੇ ਲਈ ਏਸੀਬੀ ਅਧਿਕਾਰੀਆਂ ਨੂੰ ਨੋਟ ਗਿਣਨ ਵਾਲੀ ਮਸ਼ੀਨ ਮੰਗਵਾਉਣੀ ਪਈ।
ਅਧਿਕਾਰੀਆਂ ਦਾ ਕਹਿਣਾ ਕਿ ਨਾਗਾਰਾਜੂ ਨੇ ਰਿਸ਼ਵਤ ਵਿਚ ਦੋ ਕਰੋੜ ਰੁਪਏ ਦੀ ਮੰਗ ਕੀਤੀ ਸੀ। ਦੱਸਿਆ ਜਾਂਦਾ ਕਿ ਸਵਾ ਕਰੋੜ ਰੁਪਏ ਵਿਚ ਗੱਲਬਾਤ ਤੈਅ ਹੋ ਗਈ। ਏਸੀਬੀ ਨੂੰ ਤਹਿਸੀਲਦਾਰ ਦੇ ਘਰ ਤੋਂ ਇਕ ਕਰੋੜ 10 ਲੱਖ ਰੁਪਏ ਤੋਂ ਇਲਾਵਾ 28 ਲੱਖ ਰੁਪਏ ਨਕਦ ਅਤੇ ਸੋਨਾ ਵੀ ਮਿਲਿਆ।
ਦੱਸ ਦਈਏ ਕਿ ਤੇਲੰਗਾਨਾ ਵਿਚ ਕਿਸੇ ਅਧਿਕਾਰੀ ਵੱਲੋਂ ਰਿਸ਼ਵਤ ਲਏ ਜਾਣ ਦਾ ਇਹ ਕੋਈ ਨਵਾਂ ਜਾਂ ਪਹਿਲਾ ਮਾਮਲਾ ਨਹੀਂ। ਇਸ ਤੋਂ ਪਹਿਲਾਂ ਏਸੀਬੀ ਇਸੇ ਸਾਲ ਦੀ ਸ਼ੁਰੂ ਵਿਚ ਦੋ ਮਹਿਲਾ ਤਹਿਸੀਲਦਾਰਾਂ ਨੂੰ 93 ਅਤੇ 30 ਲੱਖ ਰੁਪਏ ਦੀ ਰਿਸ਼ਵਤ ਲੈਣ ਦੇ ਦੋਸ਼ ਵਿਚ ਫੜ ਚੁੱਕੀ ਹੈ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।