Patna News : ਰਾਹੁਲ ਗਾਂਧੀ ਬਿਹਾਰ ’ਚ ਭਲਕੇ ਸ਼ੁਰੂ ਕਰਨਗੇ ‘ਵੋਟ ਅਧਿਕਾਰ ਯਾਤਰਾ’

ਰਾਹੁਲ ਗਾਂਧੀ ਬਿਹਾਰ ’ਚ ਭਲਕੇ ਸ਼ੁਰੂ ਕਰਨਗੇ ‘ਵੋਟ ਅਧਿਕਾਰ ਯਾਤਰਾ’

Patna News in Punjabi : ਕਾਂਗਰਸ ਨੇਤਾ ਰਾਹੁਲ ਗਾਂਧੀ ਬਿਹਾਰ ’ਚ ਵੋਟਰ ਸੂਚੀਆਂ ਦੀ ਵਿਸ਼ੇਸ਼ ਸੋਧ ਰਾਹੀਂ ਲੋਕਾਂ ਦੇ ਵੋਟ ਦੇ ਅਧਿਕਾਰ ਉਤੇ ਕਥਿਤ ਹਮਲੇ ਨੂੰ ਉਜਾਗਰ ਕਰਨ ਲਈ ਐਤਵਾਰ ਨੂੰ ਇਕ ਯਾਤਰਾ ਸ਼ੁਰੂ ਕਰਨਗੇ।

ਸੂਬਾ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਅਖਿਲੇਸ਼ ਪ੍ਰਸਾਦ ਸਿੰਘ ਨੇ ਇੱਥੇ ਇਕ ਪ੍ਰੈਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਲੋਕ ਸਭਾ ਵਿਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਦੇ 1 ਸਤੰਬਰ ਨੂੰ ਪਟਨਾ ਵਿਚ ਇਕ ਰੈਲੀ ਨਾਲ ‘ਵੋਟ ਅਧਿਕਾਰ ਯਾਤਰਾ’ ਸਮਾਪਤ ਹੋਣ ਤਕ ਇਕ ਪੰਦਰਵਾੜੇ ਤੋਂ ਵੱਧ ਸਮੇਂ ਲਈ ਸੂਬੇ ਵਿਚ ਰਹਿਣ ਦੀ ਸੰਭਾਵਨਾ ਹੈ। 

ਰਾਜ ਸਭਾ ਮੈਂਬਰ ਨੇ ਕਿਹਾ, ‘‘ਕੱਲ੍ਹ ਰਾਹੁਲ ਗਾਂਧੀ ਸਾਸਾਰਾਮ ਤੋਂ ਯਾਤਰਾ ਦੀ ਸ਼ੁਰੂਆਤ ਕਰਨਗੇ। ਸਬੰਧਤ ਅਧਿਕਾਰੀਆਂ ਤੋਂ ਸਾਰੀਆਂ ਲੋੜੀਂਦੀਆਂ ਇਜਾਜ਼ਤਾਂ ਲੈ ਲਈਆਂ ਗਈਆਂ ਹਨ। ਇਹ ਯਾਤਰਾ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ‘ਇੰਡੀਆ’ ਬਲਾਕ ਦੇ ਪੱਖ ’ਚ ਇਕ ਗਤੀ ਪੈਦਾ ਕਰੇਗੀ।’’

ਇਕ ਸਵਾਲ ਦੇ ਜਵਾਬ ’ਚ ਉਨ੍ਹਾਂ ਕਿਹਾ ਕਿ ਰਾਹੁਲ ਗਾਂਧੀ ਦੇ ਯਾਤਰਾ ਦੀ ਅਗਵਾਈ ਕਰਨ ਲਈ ਲਗਭਗ 15 ਦਿਨ ਬਿਹਾਰ ’ਚ ਰਹਿਣ ਦੀ ਸੰਭਾਵਨਾ ਹੈ, ਜੋ 20, 25 ਅਤੇ 31 ਅਗੱਸਤ ਨੂੰ ਤਿੰਨ ‘ਛੁੱਟੀਆਂ’ ਦੇ ਨਾਲ ਸੂਬੇ ਦੇ 25 ਜ਼ਿਲ੍ਹਿਆਂ ’ਚ ਜਾਵੇਗੀ।

ਉਨ੍ਹਾਂ ਕਿਹਾ ਕਿ ਸਾਸਾਰਾਮ ’ਚ ਰਾਹੁਲ ਗਾਂਧੀ ਦੇ ਨਾਲ ਬਿਹਾਰ ’ਚ ਵਿਰੋਧੀ ਧਿਰ ਦੇ ਨੇਤਾ ਤੇਜਸਵੀ ਯਾਦਵ ਤੋਂ ਇਲਾਵਾ ਤਿੰਨ ਖੱਬੇਪੱਖੀ ਪਾਰਟੀਆਂ ਸਮੇਤ ਸਾਡੇ ਹੋਰ ਗਠਜੋੜ ਭਾਈਵਾਲਾਂ ਦੇ ਸ਼ਾਮਲ ਹੋਣ ਦੀ ਸੰਭਾਵਨਾ ਹੈ। 1 ਸਤੰਬਰ ਨੂੰ ਪਟਨਾ ’ਚ ਹੋਣ ਵਾਲੀ ਆਖਰੀ ਰੈਲੀ ਲਈ ਅਸੀਂ ਵੱਧ ਤੋਂ ਵੱਧ ਹਮਖਿਆਲੀ ਪਾਰਟੀਆਂ ਦੇ ਨੇਤਾਵਾਂ ਨੂੰ ਲਿਆਉਣ ਦੀ ਕੋਸ਼ਿਸ਼ ਕਰਾਂਗੇ। 

 (For more news apart from  Rahul Gandhi to start 'Voting Rights Yatra' in Bihar tomorrow News in Punjabi, stay tuned to Rozana Spokesman)