ਚੀਨ ਨੇ 90 ਦਿਨਾਂ ਲਈ ਪੁਲਾੜ ਯਾਤਰਾ 'ਤੇ ਭੇਜੇ 3 ਪੁਲਾੜ ਯਾਤਰੀ

China sent three astronauts into orbit on Thursday

ਬੀਜਿੰਗ - ਚੀਨ ਨੇ ਤਿੰਨ ਪੁਲਾੜ ਯਾਤਰੀਆਂ ਨੂੰ ਵੀਰਵਾਰ ਨੂੰ ਆਪਣੇ ਉਸਾਰੀ ਅਧੀਨ ਪੁਲਾੜ ਸਟੇਸ਼ਨ ਦੀ ਮੁਰੰਮਤ ਲਈ ਰਵਾਨਾ ਕੀਤਾ ਹੈ। ਇਹ ਪੁਲਾੜ ਯਾਤਰੀ ਉੱਥੇ ਤਿੰਨ ਮਹੀਨੇ ਤੱਕ ਉਸ ਦੇ ਕੋਰ ਮੋਡਿਊਲ ਤਿਆਨਹੇ ਵਿਚ ਰਹਿਣਗੇ। ਪੰਜ ਸਾਲ ਵਿਚ ਚੀਨ ਦਾ ਇਹ ਪਹਿਲਾ ਮਿਸ਼ਨ ਹੈ ਜਿਸ ਵਿਚ ਉਸ ਨੇ ਕਿਸੇ ਇਨਸਾਨ ਨੂੰ ਪੁਲਾੜ ਵਿਚ ਭੇਜਿਆ ਹੈ। 'ਤਿਆਨਹੇ' ਚੀਨ ਵੱਲੋਂ ਭੇਜਿਆ ਗਿਆ ਤੀਜਾ ਅਤੇ ਸਭ ਤੋਂ ਵੱਡਾ ਪੁਲਾੜ ਸਟੇਸ਼ਨ ਹੈ। 

ਇਸ ਦੇ ਕੋਰ ਮੋਡਿਊਲ ਨੂੰ 29 ਅਪ੍ਰੈਲ ਨੂੰ ਆਰਬਿਟ ਵਿਚ ਸਥਾਪਿਤ ਕੀਤਾ ਗਿਆ ਸੀ। ਇਹ ਪੁਲਾੜ ਯਾਤਰੀ ਪੁਲਾੜ ਗੱਡੀ 'ਸ਼ੇਨਝੇਉ-12' ਵਿਚ ਸਵਾਰ ਹਨ ਜਿਸ ਨੂੰ ਉੱਤਰੀ-ਪੱਛਮੀ ਜਿਯੁਕਵਾਨ ਲਾਂਚ ਕੇਂਦਰ ਤੋਂ ਲੌਂਗ ਮਾਰਚ-2 ਐੱਫ ਰਾਕੇਟ ਜ਼ਰੀਏ ਲਾਂਚ ਕੀਤਾ ਗਿਆ। ਇਹ ਤਿੰਨੇ ਯਾਤਰੀ ਹੈਸ਼ੇਂਗ, ਲਿਯੂ ਬੋਮਿੰਗ ਅਤੇ ਤਾਂਗ ਹੋਂਗਬੋ ਹਨ। ਲਾਂਚ ਦੇ ਕੁਝ ਮਿੰਟ ਬਾਅਦ ਹੀ ਇਸ ਨੂੰ ਸਫਲ ਘੋਸ਼ਿਤ ਕਰ ਦਿੱਤਾ ਗਿਆ।

'ਚਾਈਨਾ ਮੈਨਡ ਸਪੇਸ ਏਜੰਸੀ' (CMSA) ਮੁਤਾਬਕ,''ਚੀਨ ਨੇ ਸੱਤਵੀਂ ਵਾਰ ਪੁਲਾੜ ਵਿਚ ਆਪਣੇ ਯਾਤਰੀ ਭੇਜੇ ਹਨ ਪਰ ਪੁਲਾੜ ਸਟੇਸ਼ਨ ਦੇ ਨਿਰਮਾਣ ਦੌਰਾਨ ਪੁਲਾੜ ਯਾਤਰੀਆਂ ਨੂੰ ਲੈਕੇ ਲਿਜਾਣ ਵਾਲਾ ਇਹ ਪਹਿਲਾ ਚੀਨੀ ਮਿਸ਼ਨ ਹੈ।'' ਚੀਨ ਨੇ ਕਰੀਬ ਪੰਜ ਸਾਲ ਪਹਿਲਾਂ 2016 ਵਿਚ ਆਖਰੀ ਵਾਰ ਕਿਸੇ ਇਨਸਾਨ ਨੂੰ ਪੁਲਾੜ ਵਿਚ ਭੇਜਿਆ ਸੀ। 2016 ਵਿਚ ਦੋ ਪੁਰਸ਼ ਪੁਲਾੜ ਯਾਤਰੀ ਸ਼ੇਨਝੋਊ-11 ਵਿਚ ਪੁਲਾੜ ਗਏ ਸਨ ਅਤੇ 33 ਦਿਨ ਉੱਥੇ ਰਹੇ।

ਅੱਜ ਗਏ ਤਿੰਨ ਮੈਂਬਰੀ ਦਲ ਦੇ ਉਸ ਰਿਕਾਰਡ ਨੂੰ ਤੋੜਨ ਦੀ ਆਸ ਹੈ। ਇਹ ਪੁਲਾੜ ਯਾਤਰੀ ਤਿੰਨ ਮਹੀਨੇ ਤੱਕ ਪੁਲਾੜ ਵਿਚ ਰਹਿਣਗੇ ਅਤੇ ਇਸ ਦੌਰਾਨ ਉਹ ਮੁਰੰਮਤ ਅਤੇ ਨਿਗਰਾਨੀ ਜਿਹੇ ਕੰਮ ਕਰਨਗੇ। ਇਹ ਪੁਲਾੜ ਸਟੇਸ਼ਨ ਆਸਾਮਾਨ ਤੋਂ ਚੀਨ ਲਈ ਦੁਨੀਆ 'ਤੇ ਨਜ਼ਰ ਰੱਖੇਗਾ ਅਤੇ ਪੁਰਾਣੇ ਹੁੰਦੇ ਅੰਤਰਰਾਸ਼ਟਰੀ ਪੁਲਾੜ ਸਟੇਸ਼ਨ (ISS) ਨਾਲ ਮੁਕਾਬਲਾ ਕਰੇਗਾ। ISS ਨਾਸਾ (ਅਮਰੀਕਾ), Roscosmos (ਰੂਸ), JAXA (ਜਾਪਾਨ), ESA (ਯੂਰਪ) and CSA (ਕੈਨੇਡਾ) ਦਾ ਪ੍ਰਾਜੈਕਟ ਹੈ।