ਪ੍ਰਧਾਨ ਮੰਤਰੀ ਨੇ ਉਲੀਕੀ ਭਾਰਤ ਦੇ ਪੁਲਾੜ ਖੋਜ ਯਤਨਾਂ ਦੇ ਭਵਿੱਖ ਦੀ ਰੂਪਰੇਖਾ, ਜਾਣੋ ਵਿਗਿਆਨੀਆਂ ਨੂੰ ਦਿਤੇ ਦੋ ਮਹੱਤਵਪੂਰਨ ਟੀਚੇ

ISRO's TV-D1 test flight of Mission Gaganyaan and PM Modi

ਨਵੀਂ ਦਿੱਲੀ: ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਮੰਗਲਵਾਰ ਨੂੰ ਵਿਗਿਆਨੀਆਂ ਨੂੰ ਕਿਹਾ ਕਿ ਉਹ 2035 ਤਕ ਭਾਰਤੀ ਪੁਲਾੜ ਸਟੇਸ਼ਨ ਸਥਾਪਤ ਕਰਨ ਅਤੇ 2040 ਤਕ ਚੰਨ ’ਤੇ ਪਹਿਲੇ ਭਾਰਤੀ ਨੂੰ ਭੇਜਣ ਦਾ ਟੀਚਾ ਰੱਖਣ। ਮੋਦੀ ਨੇ ਗਗਨਯਾਨ ਮਿਸ਼ਨ ਅਤੇ 21 ਅਕਤੂਬਰ ਨੂੰ ਹੋਣ ਵਾਲੇ ਪੁਲਾੜ ਯਾਤਰੀ ਬਚਾਅ ਪ੍ਰਣਾਲੀ ਟੈਸਟ ਵਹੀਕਲ ਦੀ ਪਹਿਲੀ ਪ੍ਰਦਰਸ਼ਨੀ ਉਡਾਣ ਦੀਆਂ ਤਿਆਰੀਆਂ ਦੀ ਸਮੀਖਿਆ ਕਰਨ ਲਈ ਮੀਟਿੰਗ ਦੌਰਾਨ ਇਹ ਹਦਾਇਤਾਂ ਦਿਤੀਆਂ। ਬਿਆਨ ’ਚ ਕਿਹਾ ਗਿਆ, ‘‘ਮੀਟਿੰਗ ’ਚ ਮਿਸ਼ਨ ਦੀਆਂ ਤਿਆਰੀਆਂ ਦੀ ਸਮੀਖਿਆ ਕੀਤੀ ਗਈ ਅਤੇ 2025 ’ਚ ਇਸ ਦੀ ਸ਼ੁਰੂਆਤ ਦੀ ਪੁਸ਼ਟੀ ਕੀਤੀ ਗਈ।’’

ਮੀਟਿੰਗ ਦੌਰਾਨ ਪ੍ਰਧਾਨ ਮੰਤਰੀ ਨੇ ਭਾਰਤ ਦੇ ਪੁਲਾੜ ਖੋਜ ਯਤਨਾਂ ਦੇ ਭਵਿੱਖ ਦੀ ਰੂਪਰੇਖਾ ਉਲੀਕੀ ਅਤੇ ਵਿਗਿਆਨੀਆਂ ਨੂੰ ਸ਼ੁੱਕਰ ਆਰਬਿਟਰ ਮਿਸ਼ਨ ਅਤੇ ਮੰਗਲ ਲੈਂਡਰ ਸਮੇਤ ਵੱਖ-ਵੱਖ ਅੰਤਰ-ਗ੍ਰਹਿ ਮਿਸ਼ਨਾਂ ’ਤੇ ਕੰਮ ਕਰਨ ਦੀ ਅਪੀਲ ਕੀਤੀ। ਬਿਆਨ ’ਚ ਕਿਹਾ ਗਿਆ, ‘‘ਪਿੱਛੇ ਜਿਹੇ ਚੰਦਰਯਾਨ-3 ਅਤੇ ਆਦਿਤਿਆ ਐਲ1 ਮਿਸ਼ਨਾਂ ਸਮੇਤ ਭਾਰਤੀ ਪੁਲਾੜ ਪਹਿਲਕਦਮੀਆਂ ਦੀ ਸਫਲਤਾ ਦੇ ਮੱਦੇਨਜ਼ਰ, ਪ੍ਰਧਾਨ ਮੰਤਰੀ ਨੇ ਹਦਾਇਤ ਦਿਤੀ ਹੈ ਕਿ ਭਾਰਤ ਨੂੰ ਹੁਣ 2035 ਤਕ ‘ਭਾਰਤੀ ਪੁਲਾੜ ਸਟੇਸ਼ਨ’ ਸਥਾਪਤ ਕਰਨ ਲਈ ਕਦਮ ਚੁੱਕਣੇ ਚਾਹੀਦੇ ਹਨ ਅਤੇ 2040 ਤਕ ਚੰਨ ’ਤੇ ਪਹਿਲੇ ਭਾਰਤੀ ਨੂੰ ਭੇਜਣ ਦੇ ਨਵੇਂ ਅਤੇ ਮਹੱਤਵਪੂਰਨ ਟੀਚੇ ਨਿਰਧਾਰਤ ਕੀਤੇ ਜਾਣੇ ਚਾਹੀਦੇ ਹਨ।’’

ਦਸਿਆ ਗਿਆ ਕਿ ਇਸ ਸੋਚ ਨੂੰ ਸਾਕਾਰ ਕਰਨ ਲਈ ਪੁਲਾੜ ਵਿਭਾਗ ਚੰਨ ’ਤੇ ਉਤਰਨ ਲਈ ਬਲੂਪ੍ਰਿੰਟ ਤਿਆਰ ਕਰੇਗਾ। ਬਿਆਨ ’ਚ ਕਿਹਾ ਗਿਆ ਹੈ, ‘‘ਇਸ ’ਚ ਚੰਦਰਯਾਨ ਮਿਸ਼ਨਾਂ ਦੀ ਇਕ ਲੜੀ, ਅਗਲੀ ਪੀੜ੍ਹੀ ਦੇ ਲਾਂਚ ਵਾਹਨ (ਐਨ.ਜੀ.ਐਲ.ਵੀ.) ਦਾ ਵਿਕਾਸ, ਇਕ ਨਵੇਂ ਲਾਂਚ ਪੈਡ ਦਾ ਨਿਰਮਾਣ, ਮਨੁੱਖੀ-ਕੇਂਦ੍ਰਿਤ ਪ੍ਰਯੋਗਸ਼ਾਲਾਵਾਂ ਦੀ ਸਥਾਪਨਾ ਅਤੇ ਸੰਬੰਧਤ ਤਕਨਾਲੋਜੀ ਸ਼ਾਮਲ ਹੋਵੇਗੀ।’’

ਪੁਲਾੜ ਵਿਭਾਗ ਨੇ ਗਗਨਯਾਨ ਮਿਸ਼ਨ ਦੀ ਸਮੁੱਚੀ ਝਲਕ ਪੇਸ਼ ਕੀਤੀ, ਜਿਸ ’ਚ ਹੁਣ ਤਕ ਵਿਕਸਤ ਵੱਖ-ਵੱਖ ਤਕਨੀਕਾਂ ਜਿਵੇਂ ਕਿ ‘ਮਨੁੱਖੀ ਰੇਟਡ ਲਾਂਚ ਵਹੀਕਲ’ ਅਤੇ ਸਿਸਟਮ ਕੁਸ਼ਲਤਾ ਨੂੰ ਉਜਾਗਰ ਕੀਤਾ ਗਿਆ। ਇਹ ਨੋਟ ਕੀਤਾ ਗਿਆ ਸੀ ਕਿ ‘ਹਿਊਮਨ ਰੇਟਡ ਲਾਂਚ ਵਹੀਕਲ’ (ਐਚ.ਐਲ.ਐਮ.ਵੀ.ਐਮ.-3) ਦੇ ਤਿੰਨ ਮਨੁੱਖ ਰਹਿਤ ਮਿਸ਼ਨਾਂ ਸਮੇਤ ਲਗਭਗ 20 ਵੱਡੇ ਤਜਰਬਿਆਂ ਦੀ ਯੋਜਨਾ ਬਣਾਈ ਗਈ ਹੈ। ਪ੍ਰਧਾਨ ਮੰਤਰੀ ਮੋਦੀ ਨੇ ਭਾਰਤ ਦੀਆਂ ਸਮਰੱਥਾਵਾਂ ’ਚ ਭਰੋਸਾ ਪ੍ਰਗਟਾਇਆ ਅਤੇ ਪੁਲਾੜ ਖੋਜ ’ਚ ਨਵੀਂਆਂ ਉਚਾਈਆਂ ਨੂੰ ਸਰ ਕਰਨ ਲਈ ਦੇਸ਼ ਦੀ ਵਚਨਬੱਧਤਾ ਦੀ ਪੁਸ਼ਟੀ ਕੀਤੀ।