ਭਾਰਤੀ ਸਿਰਾਮਿਕ ਟਾਇਲ ਉਦਯੋਗ ’ਤੇ ਪਛਮੀ ਏਸ਼ੀਆ ’ਚ ਜੰਗ ਦਾ ਬੁਰਾ ਅਸਰ
ਆਮਦਨ ’ਚ 1-2 ਫ਼ੀ ਸਦੀ ਕਮੀ ਦੀ ਸੰਭਾਵਨਾ
ਜੇ ਹਾਲਾਤ ਦੋ-ਤਿੰਨ ਹਫ਼ਤੇ ਹੋਰ ਚੱਲੇ, ਤਾਂ ਲੰਮੇ ਸਮੇਂ ਲਈ ਫੈਕਟਰੀਆਂ ਬੰਦ ਹੋ ਸਕਦੀਆਂ ਹਨ : ਕ੍ਰਿਸਿਲ ਰੇਟਿੰਗਜ਼
ਨਵੀਂ ਦਿੱਲੀ : ਭਾਰਤੀ ਸਿਰਾਮਿਕ ਟਾਇਲ ਉਦਯੋਗ ਇਸ ਵਿੱਤੀ ਸਾਲ ਵਿਚ 1-2 ਫੀ ਸਦੀ ਆਮਦਨ ਦੀ ਕਮੀ ਦਾ ਸਾਹਮਣਾ ਕਰ ਸਕਦਾ ਹੈ। ਇਹ ਲਗਾਤਾਰ ਦੂਜਾ ਸਾਲ ਹੋਵੇਗਾ ਜਦੋਂ ਉਦਯੋਗ ਦੀ ਆਮਦਨ ਘਟੇਗੀ। ਕਾਰਨ ਹੈ ਪਛਮੀ ਏਸ਼ੀਆ ਵਿਚ ਚੱਲ ਰਹੇ ਜੰਗ ਕਾਰਨ ਉਤਪਾਦਨ ਅਤੇ ਨਿਰਯਾਤ ’ਤੇ ਪੈ ਰਹੇ ਅਸਰ।
ਕ੍ਰਿਸਿਲ ਰੇਟਿੰਗਜ਼ ਨੇ ਕਿਹਾ ਕਿ ਉਦਯੋਗ ਦਾ 40 ਫੀ ਸਦੀ ਹਿੱਸਾ ਨਿਰਯਾਤ ਤੋਂ ਆਉਂਦਾ ਹੈ, ਜਿਸ ’ਚੋਂ 15 ਫੀ ਸਦੀ ਮੱਧ-ਪੂਰਬ ਵਲ ਜਾਂਦਾ ਹੈ। ਪਰ ਹੋਰਮੁਜ਼ ਜਲਡਮਰੂਮੱਧ ਦੇ ਬੰਦ ਹੋਣ ਨਾਲ ਨਿਰਯਾਤ 6-7 ਫੀ ਸਦੀ ਘਟ ਸਕਦਾ ਹੈ। ਇਸ ਨਾਲ ਨਾ ਸਿਰਫ਼ ਮੱਧ-ਪੂਰਬ ਵਲ ਭੇਜਣ ਰੁਕ ਗਏ ਹਨ, ਸਗੋਂ ਹੋਰ ਖੇਤਰਾਂ ਵਲ ਭੇਜਣ ਦੀ ਲਾਗਤ ਵੀ ਵਧ ਗਈ ਹੈ। ਗੈਸ ਸਪਲਾਈ ਘਟਣ ਕਾਰਨ ਕਈ ਫੈਕਟਰੀਆਂ ਬੰਦ ਹੋ ਰਹੀਆਂ ਹਨ। ਰੀਪੋਰਟ ਵਿਚ ਦਰਸਾਇਆ ਗਿਆ, ‘‘ਮਾਰਚ ਵਿਚ ਉਤਪਾਦਨ ਲਗਭਗ ਰੁਕ ਗਿਆ ਹੈ, ਜਿਸ ਨਾਲ ਘਰੇਲੂ ਖਪਤ ਵੀ ਹੌਲੀ ਹੋਵੇਗੀ।’’
ਕ੍ਰਿਸਿਲ ਰੇਟਿੰਗਜ਼ ਦੇ ਡਾਇਰੈਕਟਰ ਨਿਤਿਨ ਕਾਂਸਲ ਨੇ ਕਿਹਾ, ‘‘ਸਿਰਾਮਿਕ ਉਦਯੋਗ ਲਈ ਸੱਭ ਤੋਂ ਵੱਡੀ ਚੁਨੌਤੀ ਗੈਸ ਸਪਲਾਈ ਦੀ ਘਾਟ, ਮੱਧ-ਪੂਰਬ ਤੋਂ ਮੰਗ ਦੀ ਕਮੀ ਅਤੇ ਹੋਰ ਖੇਤਰਾਂ ਲਈ ਵਧੇਰੇ ਲਾਜਿਸਟਿਕ ਖਰਚੇ ਹਨ। ਜੇ ਹਾਲਾਤ ਦੋ-ਤਿੰਨ ਹਫ਼ਤੇ ਹੋਰ ਚੱਲੇ, ਤਾਂ ਲੰਮੇ ਸਮੇਂ ਲਈ ਫੈਕਟਰੀਆਂ ਬੰਦ ਹੋ ਸਕਦੀਆਂ ਹਨ।’’ ਰੀਪੋਰਟ ਅਨੁਸਾਰ, ਉਦਯੋਗ ਦੀ ਕਾਰੋਬਾਰੀ ਲਾਭ 9.3-9.5 ਫੀ ਸਦੀ ਤਕ ਘਟ ਸਕਦੀ ਹੈ, ਜੋ ਪਿਛਲੇ ਪੰਜ ਸਾਲਾਂ ਵਿਚ ਸੱਭ ਤੋਂ ਘੱਟ ਹੈ।
ਗੈਸ ਸਪਲਾਈ ਰੁਕਣ ਕਾਰਨ ਗੁਜਰਾਤ ’ਚ 400 ਸਿਰਾਮਿਕ ਇਕਾਈਆਂ ਤਿੰਨ ਹਫ਼ਤਿਆਂ ਲਈ ਬੰਦ
ਮੋਰਬੀ : ਪਛਮੀ ਏਸ਼ੀਆ ਵਿਚ ਚੱਲ ਰਹੇ ਜੰਗ ਕਾਰਨ ਰੁਕੀ ਗੈਸ ਸਪਲਾਈ ਦੇ ਨਤੀਜੇ ਵਜੋਂ ਮੋਰਬੀ ਦੀਆਂ ਲਗਭਗ 430 ਸਿਰਾਮਿਕ ਯੂਨਿਟ ਤਿੰਨ ਹਫ਼ਤਿਆਂ ਲਈ ਬੰਦ ਰਹਿਣਗੇ। ਮੋਰਬੀ, ਜੋ ਦੁਨੀਆਂ ਦਾ ਦੂਜਾ ਸੱਭ ਤੋਂ ਵੱਡਾ ਸਿਰਾਮਿਕ ਕੇਂਦਰ ਹੈ, ਇੱਥੇ 670 ’ਚੋਂ 450 ਫੈਕਟਰੀਆਂ ਪਹਿਲਾਂ ਹੀ ਬੰਦ ਹੋ ਚੁਕੀਆਂ ਹਨ। ਮੋਰਬੀ ਸਿਰਾਮਿਕ ਨਿਰਮਾਣ ਐਸੋਸੀਏਸ਼ਨ ਦੇ ਪ੍ਰਧਾਨ ਮਨੋਜ ਅਰਵਾਡੀਆ ਨੇ ਕਿਹਾ, ‘‘ਹੁਣ 430 ਯੂਨਿਟਾਂ ਨੇ ਇਕੱਠੇ ਫੈਸਲਾ ਕੀਤਾ ਹੈ ਕਿ ਉਹ 10-15 ਅਪ੍ਰੈਲ ਤਕ ਬੰਦ ਰਹਿਣਗੇ ਅਤੇ ਇਸ ਸਮੇਂ ਦੌਰਾਨ ਮਸ਼ੀਨਾਂ ਦੀ ਮੁਰੰਮਤ ਕਰਨਗੇ।’’ ਉਨ੍ਹਾਂ ਨੇ ਜੋੜਿਆ ਕਿ ਕਾਰੋਬਾਰ ਮੁੜ ਸ਼ੁਰੂ ਹੋਣਾ ਗੈਸ ਸਪਲਾਈ ਦੀ ਉਪਲਬਧਤਾ ’ਤੇ ਨਿਰਭਰ ਕਰੇਗਾ।