ਪੰਜ ਤੋਂ ਛੇ ਲੱਖ ਡੇਰਾ ਪ੍ਰੇਮੀ ਪਹੁੰਚ ਸਕਦੇ ਹਨ ਪੰਚਕੂਲਾ 'ਚ

ਚੰਡੀਗੜ੍ਹ/ਪੰਚਕੂਲਾ, 24 ਅਗੱਸਤ (ਅੰਕੁਰ): ਪੰਚਕੂਲਾ ਸਥਿਤ ਸੀ.ਬੀ.ਆਈ. ਦੀ ਵਿਸ਼ੇਸ਼ ਅਦਾਲਤ 'ਚ 25 ਅਗੱਸਤ ਨੂੰ ਸਾਧਵੀ ਸਰੀਰਕ ਸ਼ੋਸ਼ਣ ਮਾਮਲੇ 'ਚ ਸੌਦਾ ਸਾਧ ਗੁਰਮੀਤ ਰਾਮ ਰਹੀਮ ਸਿੰਘ ਨੂੰ ਕੋਰਟ 'ਚ ਪੇਸ਼ ਹੋਣ ਦੇ ਆਦੇਸ਼ ਦਿਤੇ ਗਏ ਹਨ ਅਤੇ ਜਿਥੇ ਅਦਾਲਤ ਨੇ ਫ਼ੈਸਲਾ ਸੁਣਾਉਣਾ ਹੈ। ਇਸ ਨੂੰ ਦੇਖਦੇ ਹੋਏ ਪੰਜਾਬ, ਹਰਿਆਣਾ ਅਤੇ ਹੋਰ ਸੂਬਿਆਂ ਤੋਂ ਡੇਰਾ ਪ੍ਰੇਮੀਆਂ ਦਾ ਪੰਚਕੂਲਾ ਪਹੁੰਚਣ ਦਾ ਸਿਲਸਿਲਾ ਪਿਛਲੇ ਦੋ ਦਿਨਾਂ ਤੋਂ ਲਗਾਤਾਰ ਜਾਰੀ ਹੈ। ਸੀ.ਆਈ.ਡੀ. ਦੀ ਮੰਨੀਏ ਤਾਂ ਬੁਧਵਾਰ ਸ਼ਾਮ ਤਕ ਕਰੀਬ 3 ਲੱਖ ਡੇਰਾ ਪ੍ਰੇਮੀ ਪੰਚਕੂਲਾ ਪਹੁੰਚ ਚੁਕੇ ਹਨ ਅਤੇ ਹੋਰਾਂ ਦੇ ਆਉਣ ਦਾ ਸਿਲਸਿਲਾ ਜਾਰੀ ਹੈ। ਡੇਰਾ ਪ੍ਰੇਮੀਆਂ ਨੇ ਇਥੇ ਅਪਣੇ ਲੰਗਰ ਦੇ ਬੰਦੋਬਸਤ ਕਰ ਲਏ ਹਨ। 
ਅਨੁਮਾਨ ਲਗਾਇਆ ਜਾ ਰਿਹਾ ਹੈ ਕਿ 5 ਤੋਂ 6 ਲੱਖ ਡੇਰਾ ਪ੍ਰੇਮੀ 25 ਅਗੱਸਤ ਤਕ ਪੰਚਕੂਲਾ ਪਹੁੰਚ ਸਕਦੇ ਹਨ। ਪੰਚਕੂਲਾ ਦੀਆਂ ਸੜਕਾਂ 'ਤੇ ਡੇਰਾ ਪ੍ਰੇਮੀਆਂ ਦੀਆਂ ਟੋਲੀਆਂ, ਦਰੱਖ਼ਤਾਂ ਦੇ ਹੇਠ, ਪਾਰਕਾਂ, ਡਿਵਾਈਡਰਾਂ 'ਤੇ, ਖ਼ਾਲੀ ਪਈਆਂ ਪਾਰਕਿੰਗਾਂ ਦੀਆਂ ਜਗ੍ਹਾ ਆਦਿ ਜਿਥੇ ਵੀ ਕਿਸੇ ਨੂੰ ਜਗ੍ਹਾ ਮਿਲ ਰਹੀ ਹੈ, ਉਥੇ ਹੀ ਡੇਰਾ ਲਗਾ ਰਹੇ ਹਨ। ਹੱਦ ਤਾਂ ਉਸ ਸਮੇਂ ਹੋ ਗਈ ਜਦੋਂ ਸੈਕਟਰ-4 ਦੇ ਸਰਕਾਰੀ ਸਕੂਲ 'ਚ ਛੁੱਟੀ ਕਰ ਦਿਤੀ ਗਈ, ਅਤੇ ਡੇਰਾ ਪ੍ਰੇਮੀਆਂ ਨੇ ਜ਼ਬਰਦਸਤੀ ਅਪਣਾ ਡੇਰਾ ਜਮਾ ਲਿਆ। ਪੁਲਿਸ ਕਮਿਸ਼ਨਰ ਏ.ਐਸ. ਚਾਵਲਾ ਸਮੇਤ ਹੋਰ ਪੁਲਿਸ ਅਧਿਕਾਰੀ ਪੰਚਕੂਲਾ 'ਚ 43 ਥਾਵਾਂ 'ਤੇ ਨਾਕਿਆਂ ਨੂੰ ਚੈੱਕ ਕਰਦੇ ਹੋਏ ਅਤੇ ਕਾਨੂੰਨ ਵਿਵਸਥਾ ਦਾ ਜਾਇਜ਼ਾ ਲੈਂਦੇ ਹੋਏ ਵਿਖਾਈ ਦਿਤੇ ਕਿਉਂਕਿ ਕੋਰਟ ਕੰਪਲੈਕਸ ਸੈਕਟਰ-1 'ਚ ਹੈ। ਲਿਹਾਜ਼ਾ ਪੁਲਿਸ ਅਤੇ ਪੈਰਾ ਮਿਲਟਰੀ ਫ਼ੋਰਸ ਵਲੋਂ ਚਾਰੋਂ ਪਾਸੇ ਕੰਡੇਦਾਰ ਤਾਰਾਂ ਲਗਾ ਕੇ ਕਿਲ੍ਹਾਬੰਦੀ ਕਰ ਦਿਤੀ ਗਈ ਹੈ।