ਹੋਲੀ ਮੌਕੇ ਨੱਚਦੇ ਹੋਏ ਨੌਜਵਾਨ ਨੇ ਆਪਣੀ ਹੀ ਛਾਤੀ ’ਚ ਮਾਰਿਆ ਚਾਕੂ, ਤੜਫ਼-ਤੜਫ਼ ਗਈ ਜਾਨ
ਘਟਨਾ ਦੀ ਵੀਡੀਓ ਹੋਈ ਵਾਇਰਲ
ਇੰਦੌਰ: ਕਈ ਵਾਰ ਇਨਸਾਨ ਸਟੰਟ ਦਿਖਾਉਣ ਦੇ ਚੱਕਰ ਵਿੱਚ ਕੋਈ ਅਜਿਹਾ ਕੰਮ ਕਰ ਬੈਠਦਾ ਹੈ ਜਿਸ ਨਾਲ ਉਸ ਦੀ ਜਾਨ ਚਲੀ ਜਾਂਦੀ ਹੈ। ਹਾਲ ਹੀ 'ਚ ਅਜਿਹੀ ਹੀ ਇਕ ਘਟਨਾ ਮੱਧ ਪ੍ਰਦੇਸ਼ ਦੇ ਇੰਦੌਰ ਜ਼ਿਲੇ ਦੇ ਬਾਂਗੰਗਾ ਥਾਣਾ ਖੇਤਰ ਤੋਂ ਸਾਹਮਣੇ ਆਈ ਹੈ, ਜਿਥੇ ਹੋਲੀ ਦੇ ਪ੍ਰੋਗਰਾਮ 'ਚ ਇਕ ਸ਼ਰਾਬੀ ਵਿਅਕਤੀ ਚਾਕੂ ਨਾਲ ਨੱਚ ਰਿਹਾ ਸੀ। ਡਾਂਸ ਕਰਦੇ ਹੋਏ ਵਿਅਕਤੀ ਨੇ ਛਾਤੀ 'ਤੇ ਛੁਰਾ ਮਾਰਨ ਦਾ ਸਟੰਟ ਦਿਖਾਇਆ। ਜਿਸ ਕਾਰਨ ਸ਼ਰਾਬੀ ਵਿਅਕਤੀ ਨੇ ਖ਼ੁਦ ਨੂੰ ਜ਼ਖਮੀ ਕਰ ਲਿਆ, ਜਿਸ ਨੂੰ ਬਾਅਦ 'ਚ ਹਸਪਤਾਲ ਲਿਜਾਇਆ ਗਿਆ। ਜਿੱਥੇ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ।
ਬਾਂਗੰਗਾ ਪੁਲਿਸ ਮੁਤਾਬਕ ਕੁਸ਼ਵਾਹਾ ਨਗਰ ਨਿਵਾਸੀ 38 ਸਾਲਾ ਗੋਪਾਲ ਨਸ਼ੇ 'ਚ ਧੁੱਤ ਸੀ, ਜੋ ਵੀਰਵਾਰ ਦੁਪਹਿਰ 3 ਵਜੇ ਆਪਣੇ ਦੋਸਤਾਂ ਅਤੇ ਪਰਿਵਾਰਕ ਮੈਂਬਰਾਂ ਨਾਲ ਡੀਜੇ 'ਤੇ ਡਾਂਸ ਕਰ ਰਿਹਾ ਸੀ। ਇਸ ਦੌਰਾਨ ਉਸ ਨੇ ਚਾਕੂ ਕੱਢ ਲਿਆ ਅਤੇ ਛਾਤੀ 'ਤੇ ਵਾਰ ਕਰਨ ਦੇ ਸਟੰਟ ਮਾਰਨ ਲੱਗਾ। 3, 4 ਵਾਰ ਛਾਤੀ 'ਤੇ ਵਾਰ ਕਰਨ ਦੌਰਾਨ ਚਾਕੂ ਗੋਪਾਲ ਦੀ ਛਾਤੀ 'ਚ ਡੂੰਘਾ ਜਾ ਲੱਗਾ, ਜਿਸ ਕਾਰਨ ਉਸ ਦੀ ਛਾਤੀ 'ਚੋਂ ਖੂਨ ਵਹਿਣ ਲੱਗਾ।
ਹਾਲਾਂਕਿ ਇਸ ਤੋਂ ਤੁਰੰਤ ਬਾਅਦ ਉਸਦੇ ਦੋਸਤ ਉਸਨੂੰ ਔਰਬਿੰਦੋ ਹਸਪਤਾਲ ਲੈ ਗਏ ਜਿੱਥੇ ਇਲਾਜ ਦੌਰਾਨ ਉਸਦੀ ਮੌਤ ਹੋ ਗਈ। ਇਸ ਘਟਨਾ ਦੌਰਾਨ ਪਰਿਵਾਰਕ ਮੈਂਬਰ ਵੀਡੀਓ ਬਣਾ ਰਹੇ ਸਨ ਜਿਸ ਵਿੱਚ ਘਟਨਾ ਪੂਰੀ ਤਰ੍ਹਾਂ ਕੈਦ ਹੋ ਗਈ ਸੀ। ਇਹ ਪਹਿਲੀ ਵਾਰ ਨਹੀਂ ਹੈ ਜਦੋਂ ਕਿਸੇ ਵਿਅਕਤੀ ਨੇ ਨਸ਼ਾ ਕਰਕੇ ਆਪਣੀ ਜਾਨ ਗਵਾਈ ਹੋਵੇ। ਅਕਸਰ ਅਜਿਹੇ ਮਾਮਲੇ ਸਾਹਮਣੇ ਆਉਂਦੇ ਰਹਿੰਦੇ ਹਨ, ਜਿਸ 'ਚ ਕੋਈ ਵਿਅਕਤੀ ਨਸ਼ੇ 'ਚ ਅਜਿਹਾ ਕੁਝ ਕਰ ਜਾਂਦਾ ਹੈ, ਜਿਸ ਕਾਰਨ ਉਸ ਦੀ ਜਾਨ ਚਲੀ ਜਾਂਦੀ ਹੈ।