ਪਾਈ-ਪਾਈ ਨੂੰ ਮੁਹਤਾਜ ਹੋਏ ਨੀਰਵ ਮੋਦੀ, ਖਾਤੇ 'ਚ ਸਿਰਫ 236 ਰੁਪਏ!

ਨਵੀਂ ਦਿੱਲੀ : ਭਗੌੜੇ ਨੀਰਵ ਮੋਦੀ ਬਾਰੇ ਵੱਡੀ ਖਬਰ ਸਾਹਮਣੇ ਆਈ ਹੈ ਕਿ ਉਹ ਹੁਣ ਬਹੁਤ ਗਰੀਬ ਹੋ ਗਿਆ ਹੈ ਚੇ ਉਸ ਕੋਲ ਹੁਣ ਇਕ ਪੀਜ਼ਾ ਖਰੀਦਣ ਤੱਕ ਦੇ ਵੀ ਪੈਸੇ ਨਹੀਂ ਹਨ। ਨੀਰਵ ਮੋਦੀ ਕਰੀਬ 14,000 ਕਰੋੜ ਦੀ ਧੋਖਾਧੜੀ ਕਰਕੇ ਵਿਦੇਸ਼ ਭੱਜ ਗਿਆ ਸੀ ਪਰ ਹੁਣ ਉਹ ਇਕ ਪੈਸੇ ਨੂੰ ਵੀ ਤਰਸ ਰਿਹਾ ਹੈ। 
ਨੀਰਵ ਮੋਦੀ ਨੇ ਪੰਜਾਬ ਨੈਸ਼ਨਲ ਬੈਂਕ ਨਾਲ 13,540 ਕਰੋੜ ਰੁਪਏ ਦੀ ਧੋਖਾਧੜੀ ਕੀਤੀ ਸੀ। ਇਸ ਸਮੇਂ ਉਹ ਯੂਕੇ ਦੀ ਜੇਲ੍ਹ ਵਿਚ ਹੈ। ਜੇਲ੍ਹ ਵਿਚ ਵੀ ਉਹ ਕਰਜ਼ਾ ਚੁੱਕ ਕੇ ਆਪਣੇ ਖਰਚੇ ਚਲਾ ਰਿਹਾ ਹੈ। ਫਿਲਹਾਲ ਉਹ ਬ੍ਰਿਟੇਨ ਦੀ ਜੇਲ੍ਹ 'ਚ ਬੰਦ ਹੈ।

ਦੱਸਿਆ ਜਾ ਰਿਹਾ ਹੈ ਕਿ ਨੀਰਵ ਨੂੰ 150,247 ਪੌਂਡ (ਕਰੀਬ 1.47 ਕਰੋੜ ਰੁਪਏ) ਦਾ ਜੁਰਮਾਨਾ ਭਰਨ ਲਈ ਪੈਸੇ ਉਧਾਰ ਲੈਣੇ ਪਏ। ਕਰੋੜਾਂ ਰੁਪਏ ਦਾ ਘੁਟਾਲਾ ਕਰਨ ਵਾਲੇ ਨੀਰਵ ਮੋਦੀ ਦੇ ਅਜਿਹੇ ਬੁਰੇ ਦਿਨ ਚੱਲ ਰਹੇ ਹਨ ਕਿ ਉਸ ਦੇ ਇਕ ਖਾਤੇ 'ਚ ਸਿਰਫ਼ 236 ਰੁਪਏ ਹੀ ਹਨ। ਨੀਰਵ ਮੋਦੀ ਦੇ ਫਾਇਰਸਟਾਰ ਡਾਇਮੰਡ ਇੰਟਰਨੈਸ਼ਨਲ ਪ੍ਰਾਈਵੇਟ ਲਿਮਟਿਡ (FIDPL) ਦੇ ਬੈਂਕ ਖਾਤੇ ਵਿੱਚ ਕਥਿਤ ਤੌਰ 'ਤੇ ਸਿਰਫ਼ 236 ਰੁਪਏ ਬਚੇ ਹਨ। 

ਕੋਟਕ ਮਹਿੰਦਰਾ ਬੈਂਕ ਨੇ ਇਸ ਖਾਤੇ ਤੋਂ 2.46 ਕਰੋੜ ਰੁਪਏ ਦੀ ਰਕਮ ਬਕਾਇਆ ਆਮਦਨ ਟੈਕਸ ਵਜੋਂ SBI ਨੂੰ ਟ੍ਰਾਂਸਫਰ ਕੀਤੀ ਹੈ। ਯੂਨੀਅਨ ਬੈਂਕ ਆਫ਼ ਇੰਡੀਆ ਅਤੇ ਬੈਂਕ ਆਫ਼ ਮਹਾਰਾਸ਼ਟਰ ਨੂੰ ਕੁੱਲ ਬਕਾਏ ਦਾ ਇੱਕ ਹਿੱਸਾ ਵੀ ਅਦਾ ਕੀਤਾ ਹੈ। ਇਨ੍ਹਾਂ ਅਦਾਇਗੀਆਂ ਤੋਂ ਬਾਅਦ ਕੰਪਨੀ ਦੇ ਖਾਤੇ ਵਿਚ ਸਿਰਫ਼ 236 ਰੁਪਏ ਹੀ ਬਚੇ ਹਨ।

ਹੁਣ FIDPL ਲਈ ਨਿਯੁਕਤ ਲਿਕਵੀਡੇਟਰ ਨੇ ਇਕ ਵਾਰ ਫਿਰ ਵਿਸ਼ੇਸ਼ ਅਦਾਲਤ ਤੋਂ ਪੈਸੇ ਦੀ ਰਿਹਾਈ ਦੀ ਮੰਗ ਕੀਤੀ ਹੈ। ਅਗਸਤ 2021 ਵਿੱਚ, ਭਗੌੜੇ ਆਰਥਿਕ ਅਪਰਾਧੀ ਕਾਨੂੰਨ ਦੇ ਤਹਿਤ ਕਾਰਵਾਈ ਕਰਦਿਆਂ, ਅਦਾਲਤ ਨੇ ਦਾਅਵੇਦਾਰ ਪੰਜਾਬ ਨੈਸ਼ਨਲ ਬੈਂਕ ਨੂੰ ਨਿਯੁਕਤ ਲਿਕਵੀਡੇਟਰ ਰਾਹੀਂ FIDPL ਨੂੰ ਪੈਸਾ ਜਾਰੀ ਕਰਨ ਦਾ ਨਿਰਦੇਸ਼ ਦਿੱਤਾ ਸੀ।

ਅਦਾਲਤ ਨੇ ਕਿਹਾ ਇਹ ਸਪੱਸ਼ਟ ਹੈ ਕਿ ਯੂਨੀਅਨ ਬੈਂਕ ਅਤੇ ਬੈਂਕ ਆਫ਼ ਮਹਾਰਾਸ਼ਟਰ ਨੇ ਆਪਣੀ ਮਨਮਰਜ਼ੀ ਕੀਤੀ ਅਤੇ ਅਦਾਲਤ ਦੇ ਆਦੇਸ਼ਾਂ ਦੀ ਪਾਲਣਾ ਨਹੀਂ ਕੀਤੀ। ਅਦਾਲਤ ਨੇ ਕਿਹਾ , 'ਈਡੀ ਨੇ ਵੀ ਇਸ ਅਰਜ਼ੀ ਨੂੰ ਆਗਿਆ ਦੇਣ ਦੀ ਬੇਨਤੀ ਕੀਤੀ ਹੈ। ਅਸਲ ਵਿਚ ਇਹ ਆਦੇਸ਼ ਸਾਰੇ ਬਚਾਅ ਪੱਖ 'ਤੇ ਪਾਬੰਦ ਸੀ। ਇਸ ਲਈ, ਉੱਤਰਦਾਤਾ ਨੂੰ ਨਿਰਦੇਸ਼ ਜਾਰੀ ਕਰਨ ਲਈ ਇਹ ਅਰਜ਼ੀ ਦਾਇਰ ਕਰਨ ਦੀ ਕੋਈ ਲੋੜ ਨਹੀਂ ਸੀ। ਕੋਰਟ ਨੇ ਕੋਟਕ ਮਹਿੰਦਰਾ ਬੈਂਕ ਨੂੰ ਨਿਰਦੇਸ਼ ਜਾਰੀ ਨਹੀਂ ਕੀਤੇ।