ਇੰਡੀਆ ਸਮਾਰਟ ਸਿਟੀ ਐਵਾਰਡ ਮੁਕਾਬਲੇ 'ਚ ਚੰਡੀਗੜ੍ਹ ਨੂੰ ਮਿਲਿਆ ਸਭ ਤੋਂ ਵਧੀਆ UT ਦਾ ਖ਼ਿਤਾਬ 

Chandigarh wins Best UT title in India Smart City Awards

ਕੇਂਦਰੀ ਮੰਤਰੀ ਹਰਦੀਪ ਪੁਰੀ ਨੇ ਨਗਰ ਨਿਗਮ ਕਮਿਸ਼ਨਰ ਅਨਿੰਦਿਤਾ ਮਿਤਰਾ ਨੂੰ ਸੌਂਪਿਆ ਪੁਰਸਕਾਰ 

ਚੰਡੀਗੜ੍ਹ : ਸਵੱਛ ਸਰਵੇਖਣ 2022 'ਚ ਦਰਜਾਬੰਦੀ ਵਿੱਚ ਸੁਧਾਰ ਕਰਨ ਦੀਆਂ ਤਿਆਰੀਆਂ ਦਰਮਿਆਨ ਚੰਡੀਗੜ੍ਹ ਨੂੰ ਵੱਡਾ ਸਨਮਾਨ ਮਿਲਿਆ ਹੈ। ਚੰਡੀਗੜ੍ਹ ਨੇ ਇੰਡੀਆ ਸਮਾਰਟ ਸਿਟੀ ਅਵਾਰਡ ਮੁਕਾਬਲੇ (ISAC) 2020 ਵਿੱਚ ਸਭ ਤੋਂ ਵਧੀਆ ਯੂਟੀ ਐਵਾਰਡ ਹਾਸਲ ਕੀਤਾ ਹੈ। ਚੰਡੀਗੜ੍ਹ ਸਮਾਰਟ ਸਿਟੀ ਲਿਮਟਿਡ ਦੀ ਸੀਈਓ ਅਤੇ ਨਗਰ ਨਿਗਮ ਕਮਿਸ਼ਨਰ ਅਨਿੰਦਿਤਾ ਮਿਤਰਾ ਨੇ ਸੂਰਤ (ਗੁਜਰਾਤ) ਵਿੱਚ ਹੋਏ ਐਵਾਰਡ ਪ੍ਰੋਗਰਾਮ ਦੌਰਾਨ ਇਹ ਪੁਰਸਕਾਰ ਪ੍ਰਾਪਤ ਕੀਤਾ। ਭਾਰਤ ਸਰਕਾਰ ਦੇ ਮਕਾਨ ਉਸਾਰੀ ਅਤੇ ਸ਼ਹਿਰੀ ਮਾਮਲਿਆਂ ਦੇ ਕੇਂਦਰੀ ਮੰਤਰੀ ਹਰਦੀਪ ਸਿੰਘ ਪੁਰੀ ਨੇ ਉਨ੍ਹਾਂ ਨੂੰ ਇਹ ਸਨਮਾਨ ਦਿੱਤਾ।

ਇੰਡੀਆ ਸਮਾਰਟ ਸਿਟੀਜ਼ ਅਵਾਰਡ ਮੁਕਾਬਲਾ-2020 ਸਮਾਰਟ ਸਿਟੀਜ਼ ਮਿਸ਼ਨ, ਆਵਾਸ ਅਤੇ ਸ਼ਹਿਰੀ ਮਾਮਲਿਆਂ ਦੇ ਮੰਤਰਾਲੇ, ਭਾਰਤ ਸਰਕਾਰ ਦੇ ਅਧੀਨ 25 ਅਗਸਤ 2020 ਤੋਂ 24 ਫਰਵਰੀ 2021 ਤੱਕ ਦੇ ਸਮੇਂ ਲਈ ਆਯੋਜਿਤ ਕੀਤਾ ਗਿਆ ਸੀ। ਇਹ ਮੁਕਾਬਲਾ ਮਿਸ਼ਨ ਦੇ ਤਹਿਤ ਕੀਤੀਆਂ ਗਈਆਂ ਮਹੱਤਵਪੂਰਨ ਗਤੀਵਿਧੀਆਂ ਵਿੱਚੋਂ ਇੱਕ ਸੀ। ਚੰਡੀਗੜ੍ਹ ਨੂੰ ਇੰਡੀਆ ਸਾਈਕਲ 4 ਚੇਂਜ ਚੈਲੇਂਜ, ਕਲਾਈਮੇਟ ਸਮਾਰਟ ਸਿਟੀਜ਼ ਚੈਲੇਂਜ, ਸਟ੍ਰੀਟਸ 4 ਪੀਪਲ ਚੈਲੇਂਜ, ਟੂਲਿਪ ਅਤੇ ਡੇਟਾਸਮਾਰਟ ਸਿਟੀਜ਼ ਵਿੱਚ ਪ੍ਰਦਰਸ਼ਨ ਦੇ ਆਧਾਰ ਉੱਤੇ ਸਰਵੋਤਮ ਯੂਟੀ ਐਵਾਰਡ ਦਿੱਤਾ ਗਿਆ ਹੈ।

ISAC-2020 ਸ਼ਹਿਰਾਂ, ਪ੍ਰੋਜੈਕਟਾਂ ਅਤੇ ਨਵੀਨਤਾਕਾਰੀ ਵਿਚਾਰਾਂ ਨੂੰ ਮਾਨਤਾ ਅਤੇ ਸਨਮਾਨ ਦਿੰਦਾ ਹੈ ਜੋ ਭਾਰਤ ਦੇ ਸ਼ਹਿਰੀ ਖੇਤਰਾਂ ਵਿੱਚ ਟਿਕਾਊ ਵਿਕਾਸ ਨੂੰ ਚਲਾ ਰਹੇ ਹਨ। ਇਸ ਦੇ ਨਾਲ ਹੀ, ਇਹ ਬਰਾਬਰ, ਸੁਰੱਖਿਅਤ, ਸਿਹਤਮੰਦ ਅਤੇ ਸਹਿਯੋਗੀ ਸ਼ਹਿਰਾਂ ਨੂੰ ਉਤਸ਼ਾਹਿਤ ਕਰਦਾ ਹੈ। ਇਸ ਵਿੱਚ ਕਈ ਪੁਰਸਕਾਰ ਸ਼੍ਰੇਣੀਆਂ ਸ਼ਾਮਲ ਹਨ। ਇਹਨਾਂ ਵਿੱਚ ਪ੍ਰੋਜੈਕਟ ਅਵਾਰਡ, ਸਿਟੀ ਲੀਡਰਸ਼ਿਪ ਅਵਾਰਡ, ਬੈਸਟ ਸਟੇਟ/ਯੂਟੀ ਅਵਾਰਡ, ਇਨੋਵੇਸ਼ਨ ਅਵਾਰਡ, ਕੋਵਿਡ ਇਨੋਵੇਸ਼ਨ ਅਵਾਰਡ ਅਤੇ ਸਿਟੀ ਅਵਾਰਡ ਸ਼ਾਮਲ ਹਨ।

ਚੰਡੀਗੜ੍ਹ ਨੇ ਇਸ ਮੁਕਾਬਲੇ ਵਿੱਚ ਹਿੱਸਾ ਲਿਆ ਅਤੇ ਯੂਨੈਸਕੋ ਦੁਆਰਾ ਘੋਸ਼ਿਤ ਵਿਰਾਸਤੀ ਸਥਾਨ, ਕੈਪੀਟਲ ਕੰਪਲੈਕਸ ਪ੍ਰੋਜੈਕਟ ਲਈ ਸੱਭਿਆਚਾਰ ਸ਼੍ਰੇਣੀ ਵਿੱਚ ਪੁਰਸਕਾਰ ਜਿੱਤੇ। ਜ਼ਿਕਰਯੋਗ ਹੈ ਕਿ 100 ਏਕੜ ਵਿੱਚ ਫੈਲਿਆ ਕੈਪੀਟਲ ਕੰਪਲੈਕਸ ਆਧੁਨਿਕ ਵਿਰਾਸਤ ਦੀ ਬਹਾਲੀ ਦਾ ਉੱਚ ਪੱਧਰੀ ਪ੍ਰੋਜੈਕਟ ਹੈ। ਦੂਜੇ ਪਾਸੇ ਚੰਡੀਗੜ੍ਹ ਨਗਰ ਨਿਗਮ ਦੇ ਵਧੀਕ ਕਮਿਸ਼ਨਰ ਰੁਪੇਸ਼ ਕੁਮਾਰ ਨੇ ਫਰੀਡਮ 2 ਵਾਕ ਅਤੇ ਸਾਈਕਲ ਈਵੈਂਟ ਸ਼੍ਰੇਣੀ ਵਿੱਚ ਸਿਟੀ ਲੀਡਰਾਂ ਵਿੱਚੋਂ ਸੁਪਰਹੀਰੋ ਐਵਾਰਡ ਪ੍ਰਾਪਤ ਕੀਤਾ। ਇਹ ਸਮਾਗਮ ਆਜ਼ਾਦੀ ਦੇ ਅੰਮ੍ਰਿਤ ਮਹੋਤਸਵ ਦੌਰਾਨ ਕਰਵਾਏ ਗਏ।