ਟਮਾਟਰ ਅਤੇ ਪਿਆਜ਼ ਤੋਂ ਬਾਅਦ ਹੁਣ ਵਧਣਗੇ ਦਾਲਾਂ ਦੇ ਭਾਅ

ਨਵੀਂ ਦਿੱਲੀ, 22 ਅਗੱਸਤ: ਸਰਕਾਰ ਨੇ ਮਾਂਹ ਅਤੇ ਮੁੰਗੀ ਦੀ ਦਾਲ ਦੇ ਆਯਾਤ ਨੂੰ ਵਚਨਬੱਧ ਸ਼੍ਰੇਣੀ 'ਚ ਪਾ ਦਿਤਾ ਹੈ ਅਤੇ ਇਨ੍ਹਾਂ ਦੀ ਦਰਾਮਦ ਸੀਮਾ ਤਿੰਨ ਲੱਖ ਟਨ ਤੈਅ ਕਰ ਦਿਤੀ ਹੈ। ਸਰਕਾਰ ਦੇ ਇਸ ਕਦਮ ਨਾਲ ਘਰੇਲੂ ਕੀਮਤਾਂ ਨੂੰ ਸਥਿਰ ਰੱਖਣ 'ਚ ਮਦਦ ਮਿਲੇਗੀ। ਇਨ੍ਹਾਂ ਦਾਲਾਂ ਦੀਆਂ ਘਰੇਲੂ ਕੀਮਤਾਂ ਨਿਊਨਤਮ ਸਮਰਥਨ ਮੁੱਲ ਤੋਂ ਹੇਠਾਂ ਚਲੀਆਂ ਗਈਆਂ ਹਨ ਜਿਸ ਨਾਲ ਕਿਸਾਨਾਂ ਨੂੰ ਨੁਕਸਾਨ ਪਹੁੰਚ ਰਿਹਾ ਹੈ।
ਵਪਾਰਕ ਮੰਤਰਾਲੇ ਦੇ ਤਹਿਤ ਆਉਣ ਵਾਲੇ ਵਿਦੇਸ਼ ਵਪਾਰ ਮਹਾਨਿਦੇਸ਼ਾਲਿਆ (ਡੀ. ਜੀ. ਐਫ਼. ਟੀ.) ਨੇ ਵੀ ਕਿਹਾ ਕਿ ਇਨ੍ਹਾਂ ਦਾਲਾਂ ਦੇ ਦਰਾਮਦ ਦਾ ਸਾਲਾਨਾ ਕੋਟਾ ਤਿੰਨ ਲੱਖ ਟਨ ਦਾ ਹੋਵੇਗਾ। ਡੀ. ਜੀ. ਐਫ਼. ਟੀ. ਨੇ ਇਕ ਅਧਿਸੂਚਨਾ 'ਚ ਕਿਹਾ ਕਿ ਮਾਂਹ ਅਤੇ ਮੁੰਗੀ ਦੀ ਦਾਲ ਦਾ ਦਰਾਮਦ ਵਚਨਬੱਧ ਕੀਤਾ ਜਾਂਦਾ ਹੈ। ਪਹਿਲਾਂ ਇਹ ਮੁਫ਼ਤ ਸ਼੍ਰੇਣੀ 'ਚ ਸਨ। ਇਸ 'ਚ ਕਿਹਾ ਗਿਆ ਹੈ ਕਿ ਇਹ ਵਚਨਬੱਧ ਕਿਸੇ ਦੋ-ਪੱਖੀ ਅਤੇ ਖੇਤਰੀ ਸਮਝੌਤੇ ਤਹਿਤ ਸਰਕਾਰ ਦੀਆਂ ਦਰਾਮਦ ਵਚਨਬੱਧਤਾਵਾਂ 'ਤੇ ਲਾਗੂ ਨਹੀਂ ਹੋਵੇਗਾ।  
ਜੂਨ 'ਚ ਖ਼ਤਮ ਹੋਣ ਵਾਲੀ ਫ਼ਸਲ ਸਾਲ 2016-17 'ਚ ਮੁੰਗੀ ਦਾ  ਉਤਪਾਦਨ ਰੀਕਾਰਡ 20.7 ਲੱਖ ਟਨ ਹੋ ਗਿਆ ਜੋ ਪਿਛਲੇ ਸਾਲ 'ਚ 15.9 ਲੱਖ ਟਨ ਦਾ ਸੀ। ਭਾਰਤ ਦੁਨੀਆਂ 'ਚ ਦਾਲਾਂ ਦਾ ਸੱਭ ਤੋਂ ਵੱਡਾ ਉਤਪਾਦਨ ਅਤੇ ਦਰਾਮਦ ਕਰਨ ਵਾਲਾ ਦੇਸ਼ ਹੈ। ਇਸ ਮਹੀਨੇ ਦੇ ਸ਼ੁਰੂ 'ਚ ਸਰਕਾਰ ਨੇ ਅਰਹਰ ਦਾਲ ਦੇ ਦਰਾਮਦ ਨੂੰ ਵੀ ਵਚਨਬੱਧ ਸ਼੍ਰੇਣੀ 'ਚ ਦਿਤਾ ਹੈ।  
(ਏਜੰਸੀ)