ਇੰਤਜ਼ਾਰ ਖ਼ਤਮ ! RBI 25 ਅਗਸਤ ਨੂੰ ਲੈ ਕੇ ਆ ਰਿਹਾ 200 ਰੁਪਏ ਦਾ ਨੋਟ

ਨਵੀਂ ਦਿੱਲੀ: 23 ਅਗਸਤ ਨੂੰ ਵਿੱਤ ਮੰਤਰਾਲੇ ਵੱਲੋਂ ਸਪੱਸ਼ਟ ਕੀਤੇ ਜਾਣ ਦੇ ਬਾਅਦ 200 ਰੁਪਏ ਦੇ ਨੋਟ ਜਾਰੀ ਹੋਣਗੇ। ਇਸ ਵਿਚਕਾਰ ਖਬਰ ਮਿਲੀ ਹੈ ਕਿ ਭਾਰਤੀ ਰਿਜ਼ਰਵ ਬੈਂਕ (ਆਰ. ਬੀ. ਆਈ.) ਸ਼ੁੱਕਰਵਾਰ ਨੂੰ 200 ਰੁਪਏ ਦੇ ਨੋਟ ਜਾਰੀ ਕਰ ਦੇਵੇਗਾ। ਆਰ. ਬੀ. ਆਈ. ਵੱਲੋਂ ਕੋਸ਼ਿਸ਼ ਹੈ ਕਿ ਕਿਸੇ ਤਰ੍ਹਾਂ ਨਕਲੀ ਨੋਟਾਂ ‘ਤੇ ਲਗਾਮ ਲਾਈ ਜਾ ਸਕੇ, ਇਸ ਲਈ ਪਹਿਲੀ ਵਾਰ 200 ਰੁਪਏ ਦਾ ਨੋਟ ਲਿਆਂਦਾ ਜਾ ਰਿਹਾ ਹੈ।

ਜਾਣਕਾਰਾਂ ਮੁਤਾਬਕ ਕਾਲੇ ਧਨ ਨੂੰ ਰੋਕਣ ਲਈ ਇਹ ਕਦਮ ਚੁੱਕੇ ਜਾ ਰਹੇ ਹਨ। ਦੱਸ ਦਈਏ ਕਿ 200 ਰੁਪਏ ਦੇ 50 ਕਰੋੜ ਨੋਟ ਬਾਜ਼ਾਰ ‘ਚ ਲਿਆਂਦੇ ਜਾਣਗੇ।

ਇਕ ਸੂਤਰ ਮੁਤਾਬਕ, 100 ਰੁਪਏ ਅਤੇ 500 ਰੁਪਏ ਵਿਚਕਾਰ ਦਾ ਕੋਈ ਨੋਟ ਅਜੇ ਤੱਕ ਉਪਲੱਬਧ ਨਹੀਂ ਹੈ, ਇਸ ਲਈ ਆਰ. ਬੀ. ਆਈ. ਦਾ ਮੰਨਣਾ ਹੈ ਕਿ 200 ਰੁਪਏ ਦਾ ਨੋਟ ਬਹੁਤ ਫਾਇਦੇਮੰਦ ਹੋਵੇਗਾ ਅਤੇ ਇਸ ਨਾਲ ਨੋਟਾਂ ਦੀ ਉਪਲੱਬਧਾ ਵੀ ਯਕੀਨੀ ਕੀਤੀ ਜਾ ਸਕੇਗੀ। ਸਾਹਮਣੇ ਤੋਂ ਦੇਖਣ ਤੇ ਇਸ ਵਿਚ ਨੇੜੇ ਨਜ਼ਰ ਆਉਣ ਵਾਲਾ 200 ਲਿਖਿਆ ਨਜ਼ਰ ਆਵੇਗਾ। ਇੱਕ 200 ਅੰਕਾਂ ਦੀ ਨਵੀ ਫੋਟੋ ਵੀ ਦਿਖਾਈ ਦੇਵੇਗੀ। ਨੋਟ ਦੇ ਵਿਚ ਮਹਾਤਮਾ ਗਾਂਧੀ ਦੀ ਤਸਵੀਰ ਹੋਵੇਗੀ।

ਇਕ ਬੈਂਕ ਅਧਿਕਾਰੀ ਮੁਤਾਬਿਕ, 200 ਰੁਪਏ ਦੇ ਨੋਟ ਆਉਣ ਦੇ ਦੋ ਫਾਇਦੇ ਹੋਣਗੇ, ਇਕ ਤਾਂ ਨਕਦ ਲੈਣ-ਦੇਣ ‘ਚ ਆਸਾਨੀ ਹੋਵੇਗੀ ਅਤੇ ਦੂਜਾ ਇਸ ਨਾਲ ਕੁੱਲ ਕਰੰਸੀ ‘ਚ ਛੋਟੇ ਨੋਟਾਂ ਦੀ ਗਿਣਤੀ ਵੱਧ ਜਾਵੇਗੀ। ਦੱਸ ਦਈਏ ਕਿ ਨੋਟਬੰਦੀ ਤੋਂ ਪਹਿਲਾਂ 500 ਦੇ 1,717 ਕਰੋੜ ਨੋਟ ਸਨ ਅਤੇ 1000 ਦੇ 686 ਕਰੋੜ ਸਨ। ਐੱਸ. ਬੀ. ਆਈ. ਦੇ ਸੋਧ ਮੁਤਾਬਿਕ, ਨੋਟਬੰਦੀ ਦੇ ਬਾਅਦ ਵੱਡੇ ਨੋਟਾਂ ਦੇ ਹਿੱਸੇ ‘ਚ 70 ਫੀਸਦੀ ਦੀ ਕਮੀ ਆਈ ਹੈ। ਨੋਟ ਵਿਚ ਸੁਰੱਖਿਆ ਧਾਗਾ India ਅਤੇ ਭਾਰਤ ਲਿਖਿਆ ਜਾਵੇਗਾ। ਇਸ ਧਾਗੇ ਦਾ ਰੰਗ ਹਰੇ ਤੋਂ ਨੀਲੇ ਵਿਚ ਬਦਲੇਗਾ।