ਭਾਰਤ-ਪਾਕਿ ਸਰਹੱਦ ਤੋਂ 300 ਕਰੋੜ ਦੀ 60 ਕਿਲੋ ਹੈਰੋਇਨ ਬਰਾਮਦ

ਕਲਾਨੌਰ/ਡੇਰਾ ਬਾਬਾ ਨਾਨਕ, 19 ਜੁਲਾਈ (ਗੁਰਦੇਵ ਸਿੰਘ ਰਜਾਦਾ) : ਅੱਜ ਭਾਰਤ-ਪਾਕਿਸਤਾਨ ਕੌਮਾਂਤਰੀ ਸਰਹੱਦ ਦੇ ਸੈਕਟਰ ਡੇਰਾ ਬਾਬਾ ਨਾਨਕ ਅਧੀਨ ਆਉਂਦੇ ਨੰਗਲੀ ਚੈੱਕ ਪੋਸਟ ’ਤੇ ਬੀ.ਐਸ.ਐਫ਼. ਦੀ 10 ਬਟਾਲੀਅਨ ਵਲੋਂ ਵੱਡੀ ਮਾਤਰਾ ਵਿਚ ਹੈਰੋਇਨ ਬਰਾਮਦ ਕੀਤੀ ਗਈ, ਜਿਸ ਦੀ ਅੰਤਰਰਾਸ਼ਟਰੀ ਬਾਜ਼ਾਰ ਵਿਚ ਕੀਮਤ 300 ਕਰੋੜ ਰੁਪਏ ਦੱਸੀ ਜਾ ਰਹੀ ਹੈ। ਬੀ.ਐਸ.ਐਫ਼. ਦੇ ਡੀ.ਆਈ.ਜੀ. ਬਾਰਡਰ ਰੇਂਜ ਰਾਜੇਸ਼ ਕੁਮਾਰ ਨੇ ਦਸਿਆ ਕਿ ਅੱਜ ਤੜਕਸਾਰ ਸਰਹੱਦ ’ਤੇ ਰਾਵੀ ਦਰਿਆ ਜੋ ਪਾਕਿਸਤਾਨ ਵਿਚੋਂ ਹੋ ਕੇ ਭਾਰਤ ਵਿਚ ਗੁਜ਼ਰਦਾ ਹੈ,

ਉਸ ਵਿਚ ਕੋਈ ਤੈਰਦੀ ਚੀਜ਼ ਦਿਖਾਈ ਦਿਤੀ ਤਾਂ ਜਵਾਨਾਂ ਵਲੋਂ ਸ਼ੱਕ ਪੈਣ ’ਤੇ ਅਪਣੇ ਅਧਿਕਾਰੀਆਂ ਨੂੰ ਸੂਚਿਤ ਕੀਤਾ ਗਿਆ ਅਤੇ ਕਿਸ਼ਤੀ ਰਾਹੀਂ ਜਾਂਚ ਕੀਤੀ ਗਈ ਤਾਂ ਉਸ ਨੂੰ ਬਰਾਮਦ ਕੀਤਾ ਜਦੋਂ ਉਸ ਦੀ ਤਲਾਸ਼ੀ ਲਈ ਤਾਂ ਉਸ ਵਿਚੋਂ ਫੁੱਟਬਾਲਾਂ ਦੇ ਬਲੈਡਰ ਜੋ ਇਕ ਕਪੜੇ ਦਾ ਪਾਈਪ ਬਣਾ ਕੇ ਵਿਚ ਬੰਨ੍ਹੇ ਹੋਏ ਸਨ, ਵਿਚ ਰੱਖੀ 60 ਪੈਕੇਟ ਹੈਰੋਇਨ ਬਰਾਮਦ ਕੀਤੀ ਗਈ। ਉਨ੍ਹਾਂ ਦਸਿਆ ਕਿ ਇਸ ਬਲੈਡਰਾਂ ਪਿੱਛੇ ਪੰਦਰਾਂ ਸੌ ਮੀਟਰ ਲੰਮੀ ਰੱਸੀ ਬੰਨ੍ਹੀ ਹੋਈ ਸੀ ਤੋਂ ਜੋ ਤਸਕਰ ਫੜ ਸਕਣ ਪਰ ਬੀ.ਐਸ.ਐਫ਼. ਦੇ ਜਵਾਨਾਂ ਦੀ ਮੁਸਤੈਦੀ ਦੇ ਨਾਲ ਉਹ ਅਪਣੇ ਮਿਸ਼ਨ ਵਿਚ ਕਾਮਯਾਬ ਨਹੀਂ ਹੋ ਸਕੇ।