‘ਨੀਟ’ ਇਮਤਿਹਾਨ ਵਿਰੁਧ ਪੂਰੇ ਤਮਿਲਨਾਡੂ ’ਚ ਭੁੱਖ ਹੜਤਾਲ ਸ਼ੁਰੂ
ਤਮਿਲਨਾਡੂ ਨੂੰ ‘ਨੀਟ’ ਇਮਤਿਹਾਨ ਤੋਂ ਛੋਟ ਮਿਲਣ ਤਕ ਡੀ.ਐਮ.ਕੇ. ਦਾ ਪ੍ਰਦਰਸ਼ਨ ਜਾਰੀ ਰਹੇਗਾ : ਮੁੱਖ ਮੰਤਰੀ ਸਟਾਲਿਨ
ਚੇਨਈ: ਸੱਤਾਧਾਰੀ ਦ੍ਰਵਿੜ ਮੁਨੇਤਰ ਕਸ਼ਗਮ (ਡੀ.ਐੱਮ.ਕੇ.) ਦੀ ਕੌਮੀ ਪਾਤਰਤਾ ਅਤੇ ਦਾਖ਼ਲਾ ਇਮਤਿਹਾਨ (ਨੀਟ) ਨੂੰ ਰੱਦ ਕਰਨ ਦੀ ਮੰਗ ਨੂੰ ਲੈ ਕੇ ਸੂਬਾ ਪੱਧਰੀ ਭੁੱਖ ਹੜਤਾਲ ਐਤਵਾਰ ਨੂੰ ਤੂਰੇ ਤਮਿਲਨਾਡੂ ’ਚ ਸ਼ੁਰੂ ਹੋ ਗਈ।
ਪਾਰਟੀ ਪ੍ਰਧਾਨ ਅਤੇ ਤਮਿਲਨਾਡੂ ਦੇ ਮੁੱਖ ਮੰਤਰੀ ਐਮ.ਕੇ. ਸਟਾਲਿਨ ਨੇ ਐਤਵਾਰ ਨੂੰ ਸੂਬੇ ਲਈ ‘ਨੀਟ’ ਤੋਂ ਛੋਟ ਲਈ ਹਰ ਸੰਭਵ ਕੋਸ਼ਿਸ਼ ਕਰਨ ਦਾ ਵਾਅਦਾ ਕੀਤਾ। ਹੜਤਾਲ ਦੀ ਅਗਵਾਈ ਸਟਾਲਿਨ ਦੇ ਪੁੱਤਰ ਅਤੇ ਕੈਬਿਨੇਟ ਮੰਤਰੀ ਉਦੈਨਿਧੀ ਕਰ ਰਹੇ ਹਨ।
ਸਟਾਲਿਨ ਨੇ ਇਕ ਵਿਆਹ ਪ੍ਰੋਗਰਾਮ ’ਚ ਕਿਹਾ ਕਿ ਤਮਿਲਨਾਡੂ ਨੂੰ ਕੇਂਦਰੀ ਦਾਖ਼ਲਾ ਇਮਤਿਹਾਨ ਤੋਂ ਛੋਟ ਮਿਲਣ ਤਕ ਡੀ.ਐਮ.ਕੇ. ਨਹੀਂ ਰੁਕੇਗੀ।
ਜਦਕਿ ਵਿਰੋਧੀ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਨੇ ‘ਨੀਟ’ ਦਾ ‘ਸਿਆਸੀਕਰਨ’ ਕਰਨ ਲਈ ਸੂਬੇ ਅੰਦਰ ਸੱਤਾਧਾਰੀ ਪਾਰਟੀ ਦੀ ਆਲੋਚਨਾ ਕੀਤੀ।
ਸਟਾਲਿਨ ਨੇ ਤਮਿਲਨਾਡੂ ਦੇ ਰਾਜਪਾਲ ਆਰ.ਐਨ. ਰਵੀ ’ਤੇ ਉਨ੍ਹਾਂ ਦੀਆਂ ਪਿੱਛੇ ਜਿਹੇ ਕੀਤੀਆਂ ਟਿਪਣੀਆਂ ਲਈ ਨਿਸ਼ਾਨਾ ਲਾਇਆ ਅਤੇ ਕਿਹਾ ਕਿ ਉਹ ਸੂਬੇ ਦੇ ‘ਨੀਟ’ ਵਿਰੋਧੀ ਬਿਲ ’ਤੇ ਕਦੇ ਹਸਤਾਖ਼ਰ ਨਹੀਂ ਕਰਨਗੇ।
ਸਟਾਲਿਨ ਨੇ ਕਿਹਾ ਕਿ ਇਹ ਮਾਮਲਾ ਹੁਣ ਰਾਸ਼ਟਰਪਤੀ ਕੋਲ ਹੈ ਅਤੇ ਰਾਜਪਾਲ ਦਾ ਕੰਮ ਸਿਰਫ਼ ‘ਡਾਕੀਏ’ ਦਾ ਹੈ, ਜਿਨ੍ਹਾਂ ਨੂੰ ਸੂਬਾ ਵਿਧਾਨ ਸਭਾ ਵਲੋਂ ਪਾਸ ਮਾਮਲਿਆਂ ਨੂੰ ਰਾਸ਼ਟਰਪਤੀ ਭਵਨ ਭੇਜਣਾ ਪੈਂਦਾ ਹੈ।
ਸੱਤਾਧਾਰੀ ਪਾਰਟੀ ਦੀ ਭੁੱਖ ਹੜਤਾਲ ਮਦੁਰੈ ਤੋਂ ਇਲਾਵਾ ਪੂਰੇ ਸੂਬੇ ’ਚ ਹੋ ਰਹੀ ਹੈ ਜਿੱਥੇ ਵਿਰੋਧੀ ਅੰਨਾ ਡੀ.ਐਮ.ਕੇ. ਅੱਜ ਅਪਣਾ ਵਿਸ਼ਾਲ ਸੂਬਾ ਸੰਮੇਲਨ ਕਰ ਰਹੀ ਹੈ।
ਪਾਰਟੀ ਦੇ ਯੂਥ ਵਿੰਗ ਦੇ ਮੁਖੀ ਉਦੈਨਿਧੀ ਦੇ ਨਾਲ ਡੀ.ਐਮ.ਕੇ. ਦੇ ਸੀਨੀਅਰ ਨੇਤਾਵਾਂ ਅਤੇ ਕੈਬਨਿਟ ਮੰਤਰੀ ਦੁਰਈਮੁਰੂਗਨ, ਐਮ. ਸੁਬਰਾਮਨੀਅਮ ਅਤੇ ਪੀ.ਕੇ. ਸੇਖਰ ਬਾਬੂ, ਪਾਰਟੀ ਦੇ ਸੰਸਦ ਮੈਂਬਰਾਂ, ਵਿਧਾਇਕਾਂ ਅਤੇ ਚੇਨਈ ਦੀ ਮੇਅਰ ਪ੍ਰਿਆ ਆਰ ਨੇ ਵੀ ਇੱਥੇ ਵਾਲੂਵਰ ਕੋਟਮ ਵਿੱਚ ਪ੍ਰਦਰਸ਼ਨ ਵਿੱਚ ਹਿੱਸਾ ਲਿਆ।
‘ਨੀਟ’ ਕਾਰਨ ਕਥਿਤ ਤੌਰ ’ਤੇ ਖੁਦਕੁਸ਼ੀ ਕਰਨ ਵਾਲੇ ਉਮੀਦਵਾਰਾਂ ਦੀ ਤਸਵੀਰ ਮੰਚ ’ਤੇ ਲਗਾਈ ਗਈ ਅਤੇ ਉਨ੍ਹਾਂ ਨੂੰ ਸ਼ਰਧਾ ਦੇ ਫੁੱਲ ਭੇਟ ਕੀਤੇ ਗਏ।
ਪਿਛਲੇ ਹਫ਼ਤੇ ਇਕ ਉਮੀਦਵਾਰ ਦੀ ਕਥਿਤ ਖ਼ੁਦਕੁਸ਼ੀ ਦੇ ਮੱਦੇਨਜ਼ਰ ਇਸ ਕੇਂਦਰੀ ਦਾਖ਼ਲਾ ਪ੍ਰੀਖਿਆ ਨੂੰ ਰੱਦ ਕਰਨ ਦੀ ਮੰਗ ਨੂੰ ਲੈ ਕੇ ਸੂਬੇ ਭਰ ’ਚ ਭੁੱਖ ਹੜਤਾਲ ਕੀਤੀ ਗਈ ਹੈ।