'ਮਾਂ ਹੁੰਦੀ ਐ ਮਾਂ ਹੋ ਦੁਨੀਆਂ ਵਾਲਿਓ', ਪੁਲਿਸ ਦੀ ਡਿਊਟੀ ਨਿਭਾ ਰਹੀ ਮਾਂ ਨੇ ਕੀਤੀ ਮਿਸਾਲ ਪੇਸ਼ 

File Photo

ਉੱਤਰ ਪ੍ਰਦੇਸ਼ - ਕੋਰੋਨਾ ਦੇ ਇਸ ਸੰਕਟ ਕਾਲ ਦੌਰਾਨ ਸਾਰਾ ਦੇਸ਼ ਲਾਕਡਾਊਨ ਕਾਰਨ ਘਰਾਂ 'ਚ ਕੈਦ ਹੋ ਗਏ ਹਨ। ਦੇਸ਼ 'ਚ ਮਹਾਂਮਾਰੀ ਦੇ ਕਹਿਰ ਨੂੰ ਰੋਕਣ ਦੀ ਜ਼ਿੰਮੇਵਾਰੀ ਜਿਨ੍ਹਾਂ ਲੋਕਾਂ 'ਤੇ ਜਾਂ ਪੁਲਿਸ 'ਤੇ ਹੈ। ਉਨ੍ਹਾਂ 'ਚ ਸਭ ਤੋਂ ਚੁਣੌਤੀਪੂਰਨ ਸਥਿਤੀ ਪੁਲਿਸ ਕਰਮਚਾਰੀਆਂ ਦੀ ਹੈ, ਜੋ ਆਪਣੇ ਪਰਿਵਾਰ ਦਾ ਧਿਆਨ ਰੱਖਣ ਦੇ ਨਾਲ-ਨਾਲ ਡਿਊਟੀ ਦੀ ਵੱਡੀ ਜ਼ਿੰਮੇਵਾਰੀ ਵੀ ਨਿਭਾ ਰਹੇ ਹਨ।

ਡਿਊਟੀ ਦੀ ਇਸ ਚੁਣੌਤੀ ਦੀ ਮਿਸਾਲ ਉੱਤਰ ਪ੍ਰਦੇਸ਼ 'ਚ ਦੇਖਣ ਨੂੰ ਮਿਲੀ, ਜਿੱਥੇ ਐੱਸ.ਆਈ.ਈ ਨੀਸ਼ੂ ਕਡਿਆਨ ਆਪਣੀ ਇਕ ਸਾਲ ਦੀ ਧੀ ਨੂੰ ਗੋਦ 'ਚ ਚੁੱਕ ਕੇ ਸੜਕ 'ਤੇ ਡਿਊਟੀ ਕਰ ਰਹੀ ਦਿਖਾਈ ਦਿੱਤੀ। ਨੀਸ਼ੂ ਫਿਲਹਾਲ ਕੋਰੋਨਾ ਦੇ ਸੰਕਟ ਕਾਲ 'ਚ ਮੁਰਾਦਾਬਾਦ ਜ਼ਿਲ੍ਹੇ ਦੇ ਲਾਕਡਾਊਨ ਦਾ ਪਾਲਣ ਕਰਵਾਉਣ ਨੂੰ ਲਾਈ ਗਈ ਪੁਲਿਸ ਫੋਰਸ ਦਾ ਹਿੱਸਾ ਹੈ।

ਨੀਸ਼ੂ ਦੀ ਤੈਨਾਤੀ ਇੱਥੋ ਦੇ 24ਵੀਂ ਵਾਹਿਨੀ ਪੀ.ਏ.ਸੀ ਕੈਂਪ ਦੇ ਬਾਹਰ ਸੀ। ਨੀਸ਼ੂ ਦੀ ਧੀ 2 ਦਿਨਾਂ ਤੋਂ ਬੀਮਾਰ ਸੀ। ਇਸ ਲਈ ਨੀਸ਼ੂ ਉਸ ਨੂੰ ਘਰ ਛੱਡਣ ਲਈ ਤਿਆਰ ਨਹੀਂ ਸੀ। ਪੁਲਿਸ ਦੀ ਡਿਊਟੀ ਦੀ ਜ਼ਿੰਮੇਵਾਰੀ ਵੀ ਵੱਡੀ ਸੀ ਇਸ ਲਈ ਉਸ ਨੇ ਇਕ ਸਾਲ ਦੀ ਧੀ ਨੂੰ ਗੋਦ ਚੁੱਕ ਕੇ ਆਪਣੀ ਡਿਊਟੀ ਪੂਰੀ ਕੀਤੀ।

ਨੀਸ਼ੂ ਦੀ ਇਸ ਤਸਵੀਰ ਨੂੰ ਦੇਖ ਕੇ ਹਰ ਕੋਈ ਭਾਵੁਕ ਹੋ ਰਿਹਾ ਹੈ। ਗੋਦ 'ਚ ਧੀ ਨੂੰ ਚੁੱਕ ਕੇ ਡਿਊਟੀ ਕਰ ਰਹੀ ਪੁਲਿਸ ਅਧਿਕਾਰੀ ਦੇ ਜਜ਼ਬੇ ਨੂੰ ਹਰ ਕੋਈ ਸਲਾਮ ਕਰ ਰਿਹਾ ਸੀ। ਪੁਲਸ ਦੇ ਬੈਰੀਕੇਡ 'ਤੇ ਧੀ ਦੇ ਨਾਲ ਮੌਜੂਦ ਐੱਸ.ਆਈ.ਈ ਨੀਸ਼ੂ ਨੇ ਇੱਥੇ ਨਿਕਲ ਰਹੇ ਲੋਕਾਂ ਨੂੰ ਘਰ 'ਚ ਰਹਿਣ ਦੀ ਅਪੀਲ ਕੀਤੀ।