BJP issued show-cause notice to former Union Minister and MP Jayant Sinha

Jayant Sinha News:: ਭਾਜਪਾ ਨੇ ਸਾਬਕਾ ਕੇਂਦਰੀ ਮੰਤਰੀ ਜਯੰਤ ਸਿਨਹਾ ਨੂੰ ਵੋਟ ਨਾ ਪਾਉਣ ਲਈ ਕਾਰਨ ਦੱਸੋ ਨੋਟਿਸ ਭੇਜਿਆ ਹੈ। ਪਾਰਟੀ ਨੇ ਉਨ੍ਹਾਂ ਨੂੰ ਨੋਟਿਸ 'ਤੇ ਦੋ ਦਿਨਾਂ ਦੇ ਅੰਦਰ ਅਪਣਾ ਸਟੈਂਡ ਸਪੱਸ਼ਟ ਕਰਨ ਦੇ ਨਿਰਦੇਸ਼ ਦਿਤੇ ਹਨ।

ਮਨੀਸ਼ ਜੈਸਵਾਲ ਨੂੰ ਝਾਰਖੰਡ ਦੀ ਹਜ਼ਾਰੀਬਾਗ ਸੀਟ ਤੋਂ ਭਾਜਪਾ ਦਾ ਉਮੀਦਵਾਰ ਐਲਾਨੇ ਜਾਣ ਤੋਂ ਬਾਅਦ ਜਯੰਤ ਸਿਨਹਾ ਪਾਰਟੀ ਦੇ ਕੰਮ ਵਿਚ ਹਿੱਸਾ ਨਹੀਂ ਲੈ ਰਹੇ ਹਨ ਅਤੇ ਨਾ ਹੀ ਪ੍ਰਚਾਰ ਵਿਚ ਨਜ਼ਰ ਆ ਰਹੇ ਹਨ। ਪਾਰਟੀ ਨੇ ਨੋਟਿਸ ਵਿਚ ਇਸ ਦਾ ਜ਼ਿਕਰ ਵੀ ਕੀਤਾ ਹੈ।

ਜਯੰਤ ਸਿਨਹਾ ਇਸ ਸਮੇਂ ਹਜ਼ਾਰੀਬਾਗ ਸੀਟ ਤੋਂ ਸੰਸਦ ਮੈਂਬਰ ਹਨ। ਉਨ੍ਹਾਂ ਮਾਰਚ ਵਿਚ ਲੋਕ ਸਭਾ ਚੋਣ ਨਾ ਲੜਨ ਦੀ ਇੱਛਾ ਪ੍ਰਗਟਾਈ ਸੀ। ਹਾਲਾਂਕਿ ਬਾਅਦ 'ਚ ਖ਼ਬਰ ਆਈ ਕਿ ਉਹ ਟਿਕਟ ਚਾਹੁੰਦੇ ਹਨ ਅਤੇ ਟਿਕਟ ਨਾ ਮਿਲਣ 'ਤੇ ਗੁੱਸੇ ਹਨ।
ਭਾਜਪਾ ਦੇ ਸੂਬਾ ਜਨਰਲ ਸਕੱਤਰ ਆਦਿਤਿਆ ਸਾਹੂ ਨੇ ਇਕ ਨੋਟਿਸ ਵਿੱਚ ਲਿਖਿਆ, “ਜਦੋਂ ਤੋਂ ਪਾਰਟੀ ਨੇ ਮਨੀਸ਼ ਜੈਸਵਾਲ ਨੂੰ ਹਜ਼ਾਰੀਬਾਗ ਲੋਕ ਸਭਾ ਸੀਟ ਤੋਂ ਉਮੀਦਵਾਰ ਐਲਾਨਿਆ ਹੈ, ਤੁਸੀਂ ਸੰਗਠਨਾਤਮਕ ਕੰਮ ਅਤੇ ਚੋਣ ਪ੍ਰਚਾਰ ਵਿਚ ਕੋਈ ਦਿਲਚਸਪੀ ਨਹੀਂ ਲੈ ਰਹੇ ਹੋ। ਤੁਸੀਂ ਅਪਣੀ ਵੋਟ ਦੀ ਵਰਤੋਂ ਕਰਨ ਦੀ ਲੋੜ ਵੀ ਨਹੀਂ ਸਮਝੀ। ਇਸ ਨਾਲ ਪਾਰਟੀ ਦਾ ਅਕਸ ਖਰਾਬ ਹੋਇਆ ਹੈ। ਪਾਰਟੀ ਨੇ ਜਯੰਤ ਸਿਨਹਾ ਨੂੰ ਦੋ ਦਿਨਾਂ ਅੰਦਰ ਅਪਣਾ ਸਟੈਂਡ ਸਪੱਸ਼ਟ ਕਰਨ ਲਈ ਕਿਹਾ ਹੈ। ਅਜੇ ਤਕ ਸਿਨਹਾ ਨੇ ਪਾਰਟੀ ਦੇ ਨੋਟਿਸ ਦਾ ਜਵਾਬ ਨਹੀਂ ਦਿਤਾ ਹੈ।

ਜਯੰਤ ਸਿਨਹਾ ਨੇ 2 ਮਾਰਚ ਨੂੰ ਐਕਸ 'ਤੇ ਇਕ ਪੋਸਟ ਵਿਚ ਬੀਜੇਪੀ ਮੁਖੀ ਜੇਪੀ ਨੱਡਾ ਨੂੰ ਲਿਖਿਆ ਸੀ, "ਕੀ ਮੈਨੂੰ ਮੇਰੇ ਚੁਣਵਾਈ ਫਰਜ਼ਾ ਤੋਂ ਮੁਕਤ ਕਰ ਦਿਤਾ ਜਾਵੇ"। ਉਨ੍ਹਾਂ ਲਿਖਿਆ ਸੀ, "ਮੈਂ ਭਾਰਤ ਅਤੇ ਦੁਨੀਆ ਭਰ ਵਿਚ ਗਲੋਬਲ ਜਲਵਾਯੂ ਤਬਦੀਲੀ ਨਾਲ ਨਜਿੱਠਣ 'ਤੇ ਅਪਣੀਆਂ ਕੋਸ਼ਿਸ਼ਾਂ ਉਤੇ ਧਿਆਨ ਕੇਂਦਰਿਤ ਕਰਨਾ ਚਾਹੁੰਦਾ ਹਾਂ।"

ਕੁੱਝ ਘੰਟਿਆਂ ਬਾਅਦ ਭਾਜਪਾ ਨੇ ਮਨੀਸ਼ ਜੈਸਵਾਲ ਨੂੰ ਹਜ਼ਾਰੀਬਾਗ ਤੋਂ ਅਪਣਾ ਉਮੀਦਵਾਰ ਐਲਾਨ ਦਿਤਾ। ਫਿਲਹਾਲ ਇਹ ਸਪੱਸ਼ਟ ਨਹੀਂ ਹੈ ਕਿ ਜਯੰਤ ਸਿਨਹਾ ਪਾਰਟੀ ਦੇ ਕੰਮ ਵਿਚ ਹਿੱਸਾ ਕਿਉਂ ਨਹੀਂ ਲੈ ਰਹੇ ਹਨ। ਹਾਲਾਂਕਿ ਮੰਨਿਆ ਜਾ ਰਿਹਾ ਹੈ ਕਿ ਉਨ੍ਹਾਂ ਦੀ ਟਿਕਟ ਕੱਟੇ ਜਾਣ 'ਤੇ ਨਾਰਾਜ਼ਗੀ ਦੇ ਚੱਲਦਿਆਂ ਇਹ ਚੁੱਕਿਆ ਗਿਆ ਕਦਮ ਹੋ ਸਕਦਾ ਹੈ।

(For more Punjabi news apart from BJP issued show-cause notice to former Union Minister and MP Jayant Sinha , stay tuned to Rozana Spokesman)