Adulterated Ghee Seized From Jaipur DMart Store

Jaipur News: ਜੈਪੁਰ ਸ਼ਹਿਰ ਦੇ ਮਸ਼ਹੂਰ ਡੀ-ਮਾਰਟ ਅਤੇ ਇਪਰ ਮਾਰਟ 'ਤੇ ਨਕਲੀ ਘਿਓ ਵੇਚਿਆ ਜਾ ਰਿਹਾ ਹੈ। ਅੱਜ ਲਗਾਤਾਰ ਦੂਜੇ ਦਿਨ ਫੂਡ ਐਂਡ ਸੇਫਟੀ ਵਿਭਾਗ ਦੀਆਂ ਟੀਮਾਂ ਨੇ ਵੱਖ-ਵੱਖ ਸੁਪਰਮਾਰਕੀਟਾਂ ਵਿਚ ਕਾਰਵਾਈ ਕੀਤੀ। ਇਨ੍ਹਾਂ ਵਿਚੋਂ ਸ਼ਹਿਰ ਦੇ 7 ਡੀ-ਮਾਰਟ ’ਤੇ 2700 ਲੀਟਰ ਤੋਂ ਵੱਧ ਨਕਲੀ ਘਿਓ ਬਰਾਮਦ ਹੋਇਆ। ਅੱਜ ਸ਼ਹਿਰ ਦੇ ਵੱਖ-ਵੱਖ 7 ਸਟੋਰਾਂ 'ਤੇ ਛਾਪੇਮਾਰੀ ਕੀਤੀ ਗਈ।

ਇਸ ਤੋਂ ਪਹਿਲਾਂ ਵੀਰਵਾਰ ਨੂੰ ਮਾਲਵੀਆ ਨਗਰ ਸਥਿਤ ਡੀ-ਮਾਰਟ 'ਚ ਛਾਪੇਮਾਰੀ ਕੀਤੀ ਗਈ ਸੀ। ਇਥੇ 40 ਲੀਟਰ ਸਰਸ ਅਤੇ 450 ਲੀਟਰ ਪ੍ਰੋ ਵੈਦਿਕ ਬ੍ਰਾਂਡ ਦਾ ਘਿਓ ਜ਼ਬਤ ਕੀਤਾ ਗਿਆ। ਫੂਡ ਐਂਡ ਸੇਫਟੀ ਵਿਭਾਗ ਦੇ ਵਧੀਕ ਕਮਿਸ਼ਨਰ ਪੰਕਜ ਓਝਾ ਨੇ ਦਸਿਆ ਕਿ ਟ੍ਰਾਈਟਨ ਮਾਲ ਸਮੇਤ ਲਾਲਕੋਠੀ, ਪ੍ਰਤਾਪਨਗਰ, ਨਰਸਿੰਘਪੁਰਾ, ਝੋਟਵਾੜਾ, ਮਾਨਸਰੋਵਰ ਅਤੇ ਬਿਨਦਾਇਕਾ ਸਥਿਤ ਡੀ-ਮਾਰਟਸ 'ਤੇ ਛਾਪੇਮਾਰੀ ਕੀਤੀ ਗਈ। ਇਥੇ ਸਰਸ ਅਤੇ ਪ੍ਰੋ ਵੈਦਿਕ ਬ੍ਰਾਂਡ ਦਾ ਨਕਲੀ ਘਿਓ ਬਰਾਮਦ ਹੋਇਆ ਹੈ।

ਇਨ੍ਹਾਂ ਵਿਚੋਂ ਟ੍ਰਾਈਟਨ ਮਾਲ ਤੋਂ 200 ਲੀਟਰ, ਲਾਲਕੋਠੀ ਤੋਂ 339 ਲੀਟਰ, ਪ੍ਰਤਾਪਨਗਰ ਤੋਂ 547 ਲੀਟਰ, ਨਰਸਿੰਘਪੁਰਾ ਤੋਂ 480, ਝੋਟਵਾੜਾ ਤੋਂ 400 ਅਤੇ ਮਾਨਸਰੋਵਰ ਸਥਿਤ ਸੁਪਰ ਮਾਰਟ ਤੋਂ 752 ਲੀਟਰ ਘਿਓ ਬਰਾਮਦ ਕੀਤਾ ਗਿਆ ਹੈ। ਉਨ੍ਹਾਂ ਦਸਿਆ ਕਿ ਵਿਭਾਗ ਵੱਲੋਂ ਸੂਬੇ ਦੇ ਹੋਰ ਵੱਡੇ ਸ਼ਹਿਰਾਂ ਤੋਂ ਵੀ ਟੀਮਾਂ ਨੂੰ ਛਾਪੇਮਾਰੀ ਕਰਕੇ ਨਕਲੀ ਘਿਓ ਜ਼ਬਤ ਕਰਨ ਦੇ ਹੁਕਮ ਜਾਰੀ ਕੀਤੇ ਗਏ ਹਨ।