ਬੈਂਗਲੁਰੂ: ਕਰਨਾਟਕ ਦੇ ਹੁਬਲੀ ਰੇਲਵੇ ਸਟੇਸ਼ਨ ਉਤੇ ਧਮਾਕਾ ਹੋਇਆ ਹੈ, ਜਿਸ ਵਿਚ ਇਕ ਵਿਅਕਤੀ ਜ਼ਖ਼ਮੀ ਹੋ ਗਿਆ ਹੈ। ਇਹ ਧਮਾਕਾ ਇਕ ਬਾਕਸ ਵਿਚ ਹੋਇਆ ਹੈ, ਜਿਸ ਨੂੰ ਜਖ਼ਮੀ ਹੋਇਆ ਵਿਅਕਤੀ ਲਿਜਾ ਰਿਹਾ ਸੀ। ਹੁਬਲੀ ਰੇਲਵੇ ਸਟੇਸ਼ਨ ਉਤੇ ਹੋਏ ਧਾਕੇ ਤੋਂ ਬਾਅਦ ਦੌੜ-ਭੱਜ ਮਚ ਗਈ। ਹਾਲਾਂਕਿ, ਹੁਣ ਤੱਕ ਇਹ ਜਾਣਕਾਰੀ ਨਹੀਂ ਮਿਲ ਰਹੀ ਕਿ ਧਮਾਕੇ ਦਾ ਕਾਰਨ ਕੀ ਸੀ।

ਦੱਸ ਦਈਏ ਕਿ ਹੁਬਲੀ ਰੇਲਵੇ ਸਟੇਸ਼ਨ ਇਕ ਵੱਡਾ ਜੰਕਸ਼ਨ ਹੈ ਅਤੇ ਇਹ ਦੱਖਣੀ ਪੱਛਮੀ ਰੇਲਵੇ ਜੋਨ ਦਾ ਹੈੱਡ ਹੈ। ਧਮਾਕੇ ਤੋਂ ਬਾਅਦ ਘਟਨਾ ਸਥਾਨ ਉਤੇ ਪਹੁੰਚੀ ਪੁਲਿਸ ਨੇ ਦੱਸਿਆ ਕਿ ਧਮਾਕਾ ਜ਼ਿਆਦਾ ਦਮਦਾਰ ਸੀ, ਇਸ ਵਿਚ ਇਕ ਵਿਅਕਤੀ ਜਖ਼ਮੀ ਹੋ ਗਿਆ ਹੈ। ਇਸ ਤੋਂ ਇਲਾਵਾ ਕੁਝ ਕੱਚ ਵੀ ਧਮਾਕੇ ਦੇ ਕਾਰਨ ਟੁੱਟ ਗਿਆ ਹੈ।

ਅਚਾਨਕ ਹੋਏ ਇਸ ਧਮਾਕੇ ਤੋਂ ਬਾਅਦ ਰੇਲਵੇ ਸਟੇਸ਼ਨ ਉਤੇ ਕਾਫ਼ੀ ਦਹਿਸ਼ਤ ਦਾ ਮਾਹੌਲ ਬਣ ਗਿਆ ਸੀ। ਤੁਰੰਤ ਘਟਨਾ ਸਥਾਨ ਉਤੇ ਰੇਲਵੇ ਪੁਲਿਸ ਅਤੇ ਉੱਚ ਅਧਿਕਾਰੀ ਪਹੁੰਚੇ। ਪੂਰੇ ਸਟੇਸ਼ਨ ਨੂੰ ਖਾਲੀ ਕਰਵਾ ਦਿੱਤਾ ਗਿਆ ਅਤੇ ਜਾਂਚ ਕੀਤੀ ਗਈ। ਪੁਲਿਸ ਨੇ ਦੱਸਿਆ ਕਿ ਜਖ਼ਮੀ ਵਿਅਕਤੀ ਨੂੰ ਹਸਪਤਾਲ ਵਿਚ ਭਰਤੀ ਕਰਵਾਇਆ ਗਿਆ ਹੈ।