ਗਰਮਖਿਆਲੀਆਂ ਪੱਖੀ ਸੰਗਠਨਾਂ ਖਿਲਾਫ਼ NIA ਦੀ ਪਹਿਲੀ ਚਾਰਜਸ਼ੀਟ, PAK ਸਾਜ਼ਿਸ਼ਕਾਰਾਂ ਨਾਲ ਜੁੜੇ 12 ਲੋਕ ਦੋਸ਼ੀ

ਨਵੀਂ ਦਿੱਲੀ - ਨੈਸ਼ਨਲ ਇਨਵੈਸਟੀਗੇਸ਼ਨ ਏਜੰਸੀ (ਐੱਨ.ਆਈ.ਏ.) ਨੇ ਮੰਗਲਵਾਰ ਨੂੰ ਅੱਤਵਾਦੀ-ਗੈਂਗਸਟਰ ਗਠਜੋੜ ਮਾਮਲੇ 'ਚ ਖਾਲਿਸਤਾਨੀ ਸਮਰਥਕ ਸੰਗਠਨਾਂ ਅਤੇ ਪਾਕਿਸਤਾਨ ਸਥਿਤ ਸਾਜ਼ਿਸ਼ਕਰਤਾਵਾਂ ਨਾਲ ਕਥਿਤ ਤੌਰ 'ਤੇ ਸਬੰਧ ਰੱਖਣ ਵਾਲੇ 12 ਲੋਕਾਂ ਖਿਲਾਫ਼ ਚਾਰਜਸ਼ੀਟ ਦਾਇਰ ਕੀਤੀ ਹੈ। 4 ਰਾਜਾਂ ਦੇ 25 ਜ਼ਿਲ੍ਹਿਆਂ ਦੇ 91 ਸਥਾਨਾਂ 'ਤੇ 6 ਮਹੀਨਿਆਂ ਦੀ ਤਲਾਸ਼ੀ ਤੋਂ ਬਾਅਦ ਚਾਰਜਸ਼ੀਟ ਦਾਖਲ ਕੀਤੀ ਗਈ ਹੈ। 

ਲੋਕਾਂ ਨੂੰ ਦਹਿਸ਼ਤ ਕਰਨ, ਪੈਸੇ ਵਸੂਲਣ ਅਤੇ ਸਨਸਨੀ ਫੈਲਾਉਣ ਦੀ ਸਾਜ਼ਿਸ਼ ਤਹਿਤ ਕੁਝ ਸਿਆਸਤਦਾਨਾਂ, ਗਾਇਕਾਂ ਅਤੇ ਕਾਰੋਬਾਰੀਆਂ ਨੂੰ ਸ਼ਾਮਲ ਕਰਨ ਵਾਲੇ ਦਹਿਸ਼ਤੀ ਸਾਜ਼ਿਸ਼ ਅਤੇ ਟਾਰਗੇਟ ਕਿਲਿੰਗ ਦੇ ਮਾਮਲੇ ਵਿਚ 10 ਹੋਰ ਵਿਅਕਤੀ ਅਜੇ ਵੀ ਜਾਂਚ ਅਧੀਨ ਹਨ। ਐਨਆਈਏ ਦੀ ਜਾਂਚ ਵਿਚ ਚਾਰਜਸ਼ੀਟ ਕੀਤੇ ਗਏ ਮੁਲਜ਼ਮਾਂ ਦੇ ਸਬੰਧ ਖਾਲਿਸਤਾਨ ਟਾਈਗਰ ਫੋਰਸ ਅਤੇ ਇਸ ਦੇ ਸੰਚਾਲਕ ਅਰਸ਼ਦੀਪ ਸਿੰਘ ਗਿੱਲ ਉਰਫ ਅਰਸ਼ ਡੱਲਾ, ਇੱਕ ਸੂਚੀਬੱਧ 'ਵਿਅਕਤੀਗਤ ਅੱਤਵਾਦੀ' ਨਾਲ ਹੋਣ ਦਾ ਖੁਲਾਸਾ ਹੋਇਆ ਹੈ। ਦੋਸ਼ੀ ਪਾਕਿਸਤਾਨ ਸਥਿਤ ਸਾਜ਼ਿਸ਼ਕਾਰਾਂ ਦੇ ਸੰਪਰਕ 'ਚ ਰਹਿਣ ਤੋਂ ਇਲਾਵਾ ਕੈਨੇਡਾ ਅਤੇ ਵਿਦੇਸ਼ਾਂ 'ਚ ਸਥਿਤ ਖਾਲਿਸਤਾਨੀਆਂ ਦੇ ਵੀ ਸੰਪਰਕ 'ਚ ਸਨ। 

ਐਨਆਈਏ ਵੱਲੋਂ ਜਾਂਚ ਕੀਤੇ ਜਾ ਰਹੇ ਤਿੰਨ ਦਹਿਸ਼ਤੀ-ਗੈਂਗਸਟਰ ਗਠਜੋੜ ਦੇ ਮਾਮਲਿਆਂ ਵਿਚੋਂ ਇੱਕ ਵਿਚ ਦਾਇਰ ਚਾਰਜਸ਼ੀਟ ਗੈਂਗਸਟਰ-ਅੱਤਵਾਦੀ ਨੈਟਵਰਕ ਦੇ ਨਾਲ-ਨਾਲ ਉਨ੍ਹਾਂ ਦੇ ਫੰਡਿੰਗ ਅਤੇ ਸਹਾਇਤਾ ਦੇ ਬੁਨਿਆਦੀ ਢਾਂਚੇ ਨੂੰ ਖ਼ਤਮ ਕਰਨ ਨਾਲ ਸਬੰਧਤ ਹੈ। ਇਹ ਗੈਂਗ ਟਾਰਗੇਟ ਕਿਲਿੰਗ ਨੂੰ ਅੰਜਾਮ ਦੇਣ ਦੀ ਸਾਜ਼ਿਸ਼ ਰਚ ਰਹੇ ਸਨ ਅਤੇ ਇਨ੍ਹਾਂ ਅਤੇ ਹੋਰ ਅੱਤਵਾਦੀ ਗਤੀਵਿਧੀਆਂ ਨੂੰ ਅੰਜਾਮ ਦੇਣ ਲਈ ਫੰਡ ਵੀ ਇਕੱਠੇ ਕਰ ਰਹੇ ਸਨ।

ਇਨ੍ਹਾਂ 12 ਦੋਸ਼ੀਆਂ ਦੀ ਪਛਾਣ ਅਰਸ਼ ਡੱਲਾ, ਗੌਰਵ ਪਟਿਆਲ, ਸੁਖਪ੍ਰੀਤ ਬੁੱਢਾ, ਕੌਸ਼ਲ ਚੌਧਰੀ, ਅਮਿਤ ਡਾਗਰ, ਨਵੀਨ ਬਾਲੀ, ਛੋਟੂ ਭੱਟ, ਆਸਿਫ ਖਾਨ, ਜੱਗਾ ਤਖਤਮਲ, ਟਿੱਲੂ ਤਾਜਪੁਰੀਆ, ਭੂਪੀ ਰਾਣਾ ਅਤੇ ਸੰਦੀਪ ਬੰਦਰ ਵਜੋਂ ਹੋਈ ਹੈ। ਇਨ੍ਹਾਂ ਦੇ ਪਾਕਿਸਤਾਨ ਸਥਿਤ ਖਾਲਿਸਤਾਨੀ ਪੱਖੀ ਸੰਗਠਨਾਂ ਅਤੇ ਸਾਜ਼ਿਸ਼ਕਾਰਾਂ ਨਾਲ ਸਬੰਧ ਪਾਏ ਗਏ ਸਨ।

ਐਨਆਈਏ ਵੱਲੋਂ ਪੰਜਾਬ, ਹਰਿਆਣਾ, ਉੱਤਰ ਪ੍ਰਦੇਸ਼ ਅਤੇ ਦਿੱਲੀ ਵਿਚ 91 ਥਾਵਾਂ ’ਤੇ 25 ਜ਼ਿਲ੍ਹਿਆਂ ਵਿਚ ਜਾਂਚ ਕੀਤੀ ਗਈ। ਇਨ੍ਹਾਂ 'ਚ ਲੁਧਿਆਣਾ, ਜਲੰਧਰ, ਮੋਹਾਲੀ, ਮੁਕਤਸਰ 'ਚ 6 ਮਹੀਨਿਆਂ ਦੀ ਵਿਆਪਕ ਤਲਾਸ਼ੀ ਅਤੇ ਵੱਖ-ਵੱਖ ਸੰਗਠਿਤ ਅਪਰਾਧ ਸਹਿਯੋਗੀ ਨੈੱਟਵਰਕਾਂ ਦੇ ਕਰੀਬ 100 ਮੈਂਬਰਾਂ ਦੀ ਜਾਂਚ ਤੋਂ ਬਾਅਦ ਉਸ ਖਿਲਾਫ ਚਾਰਜਸ਼ੀਟ ਦਾਇਰ ਕੀਤੀ ਗਈ ਸੀ।

ਪੰਜਾਬ ਵਿਚ ਮੋਗਾ, ਫਿਰੋਜ਼ਪੁਰ, ਬਠਿੰਡਾ, ਸੰਗਰੂਰ, ਪਟਿਆਲਾ, ਹਰਿਆਣਾ ਵਿਚ ਗੁਰੂਗ੍ਰਾਮ, ਸਿਰਸਾ, ਯਮੁਨਾਨਗਰ, ਝੱਜਰ, ਰੋਹਤਕ, ਰੇਵਾੜੀ। ਬਾਹਰੀ ਉੱਤਰੀ, ਉੱਤਰੀ, ਰੋਹਿਣੀ, ਦਵਾਰਕਾ, ਉੱਤਰ-ਪੱਛਮ, ਉੱਤਰ-ਪੂਰਬੀ ਦਿੱਲੀ ਅਤੇ ਬਾਗਪਤ, ਬੁਲੰਦਸ਼ਹਿਰ, ਪੀਲੀਭੀਤ, ਉੱਤਰ ਪ੍ਰਦੇਸ਼ ਦੇ ਗਾਜ਼ੀਆਬਾਦ ਵਿੱਚ ਜਾਂਚ ਕੀਤੀ ਗਈ।

ਇਨ੍ਹਾਂ ਛਾਪਿਆਂ ਅਤੇ ਤਲਾਸ਼ੀ ਦੌਰਾਨ ਕਰੀਬ 20 ਹਥਿਆਰ, 527 ਰੌਂਦ, 195 ਡਿਜ਼ੀਟਲ ਯੰਤਰ, 281 ਦਸਤਾਵੇਜ਼ ਆਦਿ ਜ਼ਬਤ ਕੀਤੇ ਗਏ। ਜਾਂਚ ਦੌਰਾਨ ਹੁਣ ਤੱਕ 7 LOC ਅਤੇ 10 ਗੈਰ-ਜ਼ਮਾਨਤੀ ਵਾਰੰਟ ਜਾਰੀ ਕੀਤੇ ਜਾ ਚੁੱਕੇ ਹਨ। ਧਾਰਾ 25 UA(P) ਐਕਟ ਦੇ ਤਹਿਤ ਤਿੰਨ ਅਚੱਲ ਜਾਇਦਾਦਾਂ ਅਤੇ ਤਿੰਨ ਚੱਲ ਜਾਇਦਾਦਾਂ ਨੂੰ ਕੁਰਕ/ਜ਼ਬਤ ਕੀਤਾ ਗਿਆ ਹੈ।