Delhi News : ਆਨਲਾਈਨ ਗੇਮਿੰਗ ਬਿਲ ਨੂੰ ਮਿਲੀ ਰਾਸ਼ਟਰਪਤੀ ਦੀ ਮਨਜ਼ੂਰੀ

ਆਨਲਾਈਨ ਗੇਮਿੰਗ ਬਿਲ ਨੂੰ ਮਿਲੀ ਰਾਸ਼ਟਰਪਤੀ ਦੀ ਮਨਜ਼ੂਰੀ

Delhi News in Punjabi : ਰਾਸ਼ਟਰਪਤੀ ਦਰੌਪਦੀ ਮੁਰਮੂ ਨੇ ਆਨਲਾਈਨ ਗੇਮਿੰਗ ਬਾਰੇ ਪ੍ਰਚਾਰ ਅਤੇ ਰੈਗੂਲੇਸ਼ਨ ਬਿਲ ਨੂੰ ਅਪਣੀ ਸਹਿਮਤੀ ਦੇ ਦਿਤੀ ਹੈ। ਇਸ ਐਕਟ ਦਾ ਉਦੇਸ਼ ਈ-ਸਪੋਰਟਸ ਅਤੇ ਆਨਲਾਈਨ ਸੋਸ਼ਲ ਗੇਮਾਂ ਨੂੰ ਉਤਸ਼ਾਹਤ ਕਰਨਾ ਹੈ ਅਤੇ ਨੁਕਸਾਨਦੇਹ ਆਨਲਾਈਨ ਨਕਦੀ ਗੇਮਿੰਗ ਸੇਵਾਵਾਂ, ਇਸ਼ਤਿਹਾਰਾਂ ਅਤੇ ਉਨ੍ਹਾਂ ਨਾਲ ਸਬੰਧਤ ਵਿੱਤੀ ਲੈਣ-ਦੇਣ ਉਤੇ ਰੋਕ ਲਗਾਉਣਾ ਹੈ। 

ਇਸ ਐਕਟ ਵਿਚ ਖੇਤਰ ਦੀ ਤਾਲਮੇਲ ਨੀਤੀ ਸਹਾਇਤਾ, ਰਣਨੀਤਕ ਵਿਕਾਸ ਅਤੇ ਰੈਗੂਲੇਟਰੀ ਨਿਗਰਾਨੀ ਲਈ ਇਕ ਆਨਲਾਈਨ ਗੇਮਿੰਗ ਅਥਾਰਟੀ ਦੀ ਨਿਯੁਕਤੀ ਦਾ ਪ੍ਰਬੰਧ ਵੀ ਹੈ। ਇਸ ਐਕਟ ਦਾ ਉਦੇਸ਼ ਵਿਅਕਤੀਆਂ, ਖਾਸ ਕਰ ਕੇ ਨੌਜੁਆਨਾਂ ਅਤੇ ਕਮਜ਼ੋਰ ਆਬਾਦੀ ਨੂੰ ਅਜਿਹੀਆਂ ਖੇਡਾਂ ਦੇ ਮਾੜੇ ਸਮਾਜਕ, ਆਰਥਕ, ਮਨੋਵਿਗਿਆਨਕ ਅਤੇ ਨਿੱਜਤਾ ਨਾਲ ਸਬੰਧਤ ਪ੍ਰਭਾਵਾਂ ਤੋਂ ਬਚਾਉਣਾ ਹੈ। ਐਕਟ ਵਿਚ ਆਨਲਾਈਨ ਮਨੀ ਗੇਮਾਂ ਦੀ ਪੇਸ਼ਕਸ਼, ਸੰਚਾਲਨ ਜਾਂ ਸਹੂਲਤ ਉਤੇ ਪੂਰੀ ਤਰ੍ਹਾਂ ਪਾਬੰਦੀ ਦਾ ਪ੍ਰਬੰਧ ਵੀ ਹੈ। ਆਨਲਾਈਨ ਮਨੀ ਗੇਮਿੰਗ ਨਾਲ ਜੁੜੇ ਕਾਨੂੰਨ ਦੀ ਉਲੰਘਣਾ ਕਰਨ ਉਤੇ ਤਿੰਨ ਸਾਲ ਤਕ ਦੀ ਕੈਦ ਅਤੇ ਇਕ ਕਰੋੜ ਰੁਪਏ ਤਕ ਦਾ ਜੁਰਮਾਨਾ ਜਾਂ ਦੋਵੇਂ ਦਾ ਪ੍ਰਬੰਧ ਹੈ। 

ਇਸ ਤੋਂ ਇਲਾਵਾ ਰਾਸ਼ਟਰਪਤੀ ਨੇ ਇਨਕਮ ਟੈਕਸ ਐਕਟ 2025, ਟੈਕਸੇਸ਼ਨ ਕਾਨੂੰਨ (ਸੋਧ) ਐਕਟ, 2025, ਇੰਸਟੀਚਿਊਟ ਆਫ ਮੈਨੇਜਮੈਂਟ (ਸੋਧ) ਐਕਟ, 2025, ਮਾਈਨਜ਼ ਐਂਡ ਮਿਨਰਲਜ਼ (ਵਿਕਾਸ ਅਤੇ ਰੈਗੂਲੇਸ਼ਨ) ਸੋਧ ਐਕਟ 2025 ਅਤੇ ਇੰਡੀਅਨ ਪੋਰਟਸ ਐਕਟ, 2025 ਨੂੰ ਵੀ ਅਪਣੀ ਸਹਿਮਤੀ ਦੇ ਦਿਤੀ ਹੈ।  

ਇਨਕਮ ਟੈਕਸ ਐਕਟ 2025 ਦਾ ਉਦੇਸ਼ ਇਨਕਮ ਟੈਕਸ ਨਾਲ ਜੁੜੇ ਕਾਨੂੰਨ ਨੂੰ ਮਜ਼ਬੂਤ ਅਤੇ ਸੋਧਣਾ ਹੈ, ਜਦਕਿ ਕਰਾਧਾਨ ਕਾਨੂੰਨ (ਸੋਧ) ਐਕਟ, 2025 ਆਮਦਨ ਟੈਕਸ ਐਕਟ, 1961 ਵਿਚ ਹੋਰ ਸੋਧ ਕਰੇਗਾ ਅਤੇ ਵਿੱਤ ਐਕਟ, 2025 ਵਿਚ ਸੋਧ ਕਰੇਗਾ। ਇੰਸਟੀਚਿਊਟ ਆਫ ਮੈਨੇਜਮੈਂਟ (ਸੋਧ) ਐਕਟ, 2025 ਅਸਾਮ ਦੇ ਗੁਹਾਟੀ ਵਿਖੇ ਇੰਡੀਅਨ ਇੰਸਟੀਚਿਊਟ ਆਫ ਮੈਨੇਜਮੈਂਟ ਦੀ ਸਥਾਪਨਾ ਦੀ ਕੋਸ਼ਿਸ਼ ਕਰਦਾ ਹੈ ਜੋ ਦੇਸ਼ ਦੇ ਉੱਤਰ-ਪੂਰਬੀ ਖੇਤਰ ਦਾ ਇਕ ਮਹੱਤਵਪੂਰਨ ਕੇਂਦਰ ਹੈ। 

 (For more news apart from  Online Gaming Bill gets Presidential approval News in Punjabi, stay tuned to Rozana Spokesman)