ਕੀ ਇਹਨਾਂ ਬੈਕਾਂ 'ਚ ਤਾਂ ਨਹੀਂ ਤੁਹਾਡਾ ਖਾਤਾ, ਘੱਟ ਚੁੱਕੀਆਂ ਹਨ ਵਿਆਜ ਦਰਾਂ

ਨਵੀਂ ਦਿੱਲੀ- ਪੰਜਾਬ ਨੈਸ਼ਨਲ ਬੈਂਕ (ਪੀ.ਐੱਨ.ਬੀ.) ਅਤੇ ਐੱਚ.ਡੀ.ਐੱਫ.ਸੀ. ਬੈਂਕ ਨੇ ਅੱਜ 50 ਲੱਖ ਰੁਪਏ ਤੱਕ ਦੀ ਜਮ੍ਹਾਂ ਵਾਲੇ ਬੱਚਤ ਬੈਂਕ ਖਾਤੇ ‘ਤੇ ਵਿਆਜ ਦਰ ਅੱਧਾ ਫ਼ੀਸਦੀ ਘਟਾ ਕੇ 3.5 ਫ਼ੀਸਦੀ ਕਰ ਦਿੱਤੀ। ਇਸ ਤੋਂ ਇਲਾਵਾ ਪੀ.ਐੱਨ.ਬੀ. ਨੇ ਵੱਖ-ਵੱਖ ਮਚਿਓਰਿਟੀ ਮਿਆਦ ਦੀਆਂ 1 ਕਰੋੜ ਰੁਪਏ ਤੋਂ ਘੱਟ ਦੀ ਐੱਫ. ਡੀਜ਼ ‘ਤੇ ਵੀ ਵਿਆਜ਼ ਦਰਾਂ ‘ਚ 0.15 ਤੋਂ 0.40 ਫ਼ੀਸਦੀ ਕਟੌਤੀ ਦਾ ਐਲਾਨ ਕੀਤਾ ਹੈ। ਨਵੀਆਂ ਵਿਆਜ ਦਰਾਂ 19 ਅਗਸਤ ਤੋਂ ਲਾਗੂ ਹੋਣਗੀਆਂ। ਐੱਚ. ਡੀ. ਐੱਫ. ਸੀ. ਬੈਂਕ ਨੇ ਆਪਣੇ ਇਕ ਬਿਆਨ ‘ਚ ਕਿਹਾ ਕਿ ਇਸ ਸੋਧ ਤੋਂ ਬਾਅਦ ਬੱਚਤ ਖਾਤਿਆਂ ‘ਚ 50 ਲੱਖ ਰੁਪਏ ਜਾਂ ਜਿਆਦਾ ਦੀ ਰਾਸ਼ੀ ਰੱਖਣ ਵਾਲੇ ਗਾਹਕਾਂ ਨੂੰ 4 ਫ਼ੀਸਦੀ ਦਾ ਵਿਆਜ ਮਿਲਦਾ ਰਹੇਗਾ। ਉਥੇ ਹੀ ਅਜਿਹੇ ਗਾਹਕ ਜਿਨ੍ਹਾਂ ਦੇ ਖਾਤਿਆਂ ‘ਚ 50 ਲੱਖ ਰੁਪਏ ਤੋਂ ਘੱਟ ਦੀ ਜਮ੍ਹਾਂ ਹੈ ਉਨ੍ਹਾਂ ਨੂੰ 3.50 ਫ਼ੀਸਦੀ ਵਿਆਜ ਮਿਲੇਗਾ।