‘ਗੇਮ ਚੇਂਜਰ’ ਹੋਵੇਗੀ ਭਾਰਤ ’ਚ ਬਣੀ ਕੋਰੋਨਾ ਨੇਜ਼ਲ ਵੈਕਸੀਨ, WHO ਦੇ ਵਿਗਿਆਨੀ ਦਾ ਦਾਅਵਾ

Made-in-India Nasal Vaccines Could be Game Changer: WHO Top Scientist on Covid i

ਨਵੀਂ ਦਿੱਲੀ - ਭਾਰਤ ਵਿਚ ਕੋਰੋਨਾ ਮਹਾਮਾਰੀ ਦੀ ਦੂਜੀ ਲਹਿਰ ਦਾ ਕਹਿਰ ਜਾਰੀ ਹੈ। ਤੀਜੀ ਲਹਿਰ ਦੀ ਵੀ ਅਸ਼ੰਕਾ ਜਤਾਈ ਜਾ ਰਹੀ ਹੈ। ਵਿਗਿਆਨੀਆਂ ਨੇ ਚਿੰਤਾ ਪ੍ਰਗਟਾਈ ਹੈ ਕਿ ਤੀਜੀ ਲਹਿਰ ਬੱਚਿਆਂ ਨੂੰ ਆਪਣਾ ਨਿਸ਼ਾਨਾ ਬਣਾ ਸਕਦੀ ਹੈ। ਇਸ ਗੱਲ ਦੀ ਵਧੇਰੇ ਚਿੰਤਾ ਹੈ ਕਿ ਜੇ ਦੁਨੀਆ ਭਰ ਵਿਚ ਤੀਜੀ ਲਹਿਰ ਆ ਗਈ ਤਾਂ ਦੁਨੀਆ ਵਿਚ 12 ਸਾਲ ਤੋਂ ਘੱਟ ਅਤੇ ਭਾਰਤ ਵਿਚ 18 ਸਾਲ ਤੋਂ ਘੱਟ ਦੇ ਵਿਅਕਤੀਆਂ ਲਈ ਵੈਕਸੀਨ ਨਹੀਂ ਹੈ।

ਅਜਿਹੇ ਵਿਚ ਵਿਸ਼ਵ ਸਿਹਤ ਸੰਗਠਨ ਦੀ ਚੀਫ ਵਿਗਿਆਨਕ ਸੌਮਿਆ ਸਵਾਮੀਨਾਥਨ ਨੇ ਕਿਹਾ ਕਿ ਭਾਰਤ ਵਿਚ ਬਣੀ ਕੋਰੋਨਾ ਨੇਜ਼ਲ ਵੈਕਸੀਨ ਬੱਚਿਆਂ ਲਈ ਗੇਮ ਚੇਂਜਰ ਸਿੱਧ ਹੋ ਸਕਦੀ ਹੈ। ਇਸ ਤਰ੍ਹਾਂ ਵੈਕਸੀਨ ਨੱਕ ਜ਼ਰੀਏ ਦਿੱਤੀ ਜਾਂਦੀ ਹੈ। ਕਿਹਾ ਜਾ ਰਿਹਾ ਹੈ ਕਿ ਇਹ ਇੰਜੈਕਸ਼ਨ ਵਾਲੀ ਵੈਕਸੀਨ ਨਾਲੋਂ ਜ਼ਿਆਦਾ ਅਸਰਦਾਰ ਹੈ, ਨਾਲ ਹੀ ਇਸ ਨੂੰ ਲੈਣਾ ਵੀ ਬੇਹੱਦ ਆਸਾਨ ਹੈ।

ਉਨ੍ਹਾਂ ਕਿਹਾ ਕਿ ਅਧਿਆਪਕਾਂ ਦੀ ਵੈਕਸੀਨੇਸ਼ਨ ਬਹੁਤ ਜ਼ਰੂਰੀ ਹੈ। ਬੱਚਿਆਂ ਨੂੰ ਸਕੂਲਾਂ ਵਿਚ ਉਦੋਂ ਹੀ ਭੇਜਿਆ ਜਾਵੇ ਜਦੋਂ ਕਮਿਊਨਿਟੀ ਟਰਾਂਸਮਿਸ਼ਨ ਦਾ ਖਤਰਾ ਘੱਟ ਜਾਵੇ। ਉਨ੍ਹਾਂ ਅੱਗੇ ਕਿਹਾ ਕਿ ਭਾਰਤ ਵਿਚ ਬਣੀ ਕੋਰੋਨਾ ਨੇਜ਼ਲ ਵੈਕਸੀਨ ਬੱਚਿਆਂ ਨੂੰ ਦੇਣੀ ਆਸਾਨ ਵੀ ਰਹੇਗੀ ਅਤੇ ਨਾਲ ਹੀ ਸਾਹਨਲੀ ਵਿਚ ਇਮਊਨਿਟੀ ਵਧਾਏਗੀ।

ਹੈਦਰਾਬਾਦ ਦੀ ਭਾਰਤ ਬਾਇਓਟੈਕ ਕੰਪਨੀ ਨੇ ਨੇਜ਼ਲ ਵੈਕਸੀਨ ਦਾ ਟ੍ਰਾਇਲ ਸ਼ੁਰੂ ਕਰ ਦਿੱਤਾ ਹੈ। ਇਸ ਟੀਕੇ ਜ਼ਰੀਏ ਨੱਕ ਰਾਹੀਂ ਖੁਰਾਕ ਦਿੱਤੀ ਜਾਏਗੀ, ਜੋ ਕੋਰੋਨਾ ਨੂੰ ਮਾਤ ਦੇਣ ਵਿਚ ਕਾਰਗਰ ਸਿੱਧ ਹੋ ਸਕਦੀ ਹੈ। ਕੰਪਨੀ ਅਨੁਸਾਰ, ਸਿਰਫ 4 ਤੁਪਕੇ ਨੇਜ਼ਲ ਸਪਰੇਅ ਦੀ ਜ਼ਰੂਰਤ ਹੋਵੇਗੀ। ਦੋ-ਦੋ ਤੁਪਕੇ ਨੱਕ ਦੇ ਦੋਵੇਂ ਛੇਕ ਵਿਚ ਪਾਏ ਜਾਣਗੇ। ਕਲੀਨਿਕਲ ਟਰਾਇਲਜ਼ ਰਜਿਸਟਰੀ ਦੇ ਅਨੁਸਾਰ, 175 ਵਿਅਕਤੀਆਂ ਨੂੰ ਨੇਜ਼ਲ ਵੈਕਸੀਨ ਦਿੱਤੀ ਗਈ ਹੈ। ਉਹ ਤਿੰਨ ਸਮੂਹਾਂ ਵਿਚ ਵੰਡੇ ਹੋਏ ਹਨ। ਪਹਿਲੇ ਅਤੇ ਦੂਜੇ ਸਮੂਹ ਵਿੱਚ 70 ਵਲੰਟੀਅਰ ਅਤੇ ਤੀਜੇ ਵਿੱਚ 35 ਵਲੰਟੀਅਰ ਹਨ।