Office

ਨਵੀਂ ਦਿੱਲੀ: ਲੌਕਡਾਊਨ ਦੇ ਚਲਦਿਆਂ ਵਰਕ ਫਰਾਮ ਹੋਮ ਦੀ ਸ਼ੁਰੂਆਤ ਹੋਈ ਸੀ ਤੇ ਜ਼ਿਆਦਾਤਰ ਦਫ਼ਤਰਾਂ ਦੇ ਕਰਮਚਾਰੀ ਘਰਾਂ ਤੋਂ ਕੰਮ ਕਰ ਰਹੇ ਸੀ। ਇਸ ਨੂੰ ਲੈ ਕੇ ਹੋਏ ਇਕ ਸਰਵੇ ਵਿਚ ਖੁਲਾਸਾ ਹੋਇਆ ਹੈ ਕਿ ਹੁਣ ਇਹ ਕਰਮਚਾਰੀ ਅਪਣੇ ਦਫ਼ਤਰ ਵਿਚ ਜਾ ਕੇ ਕੰਮ ਕਰਨਾ ਚਾਹੁੰਦੇ ਹਨ। ਕਰਮਚਾਰੀਆਂ ਦਾ ਕਹਿਣਾ ਹੈ ਕਿ ਵਰਕ ਫਰਾਮ ਹੋਮ ਕਾਰਨ ਉਹਨਾਂ ਦੇ ਨਿੱਜੀ ਅਤੇ ਦਫ਼ਤਰੀ ਜੀਵਨ ਵਿਚ ਕੋਈ ਅੰਤਰ ਨਹੀਂ ਬਚਿਆ ਹੈ।

ਇਸ ਦੇ ਚਲਦਿਆਂ ਉਹ ਵਾਪਸ ਅਪਣੇ ਦਫ਼ਤਰ ਵਿਚ ਜਾਣਾ ਚਾਹੁੰਦੇ ਹਨ। ਦਰਅਸਲ ਅਮਰੀਕੀ ਰਿਅਲ ਅਸਟੇਟ ਫਰਮ ਜੇਐਲਐਲ ਨੇ ਕਰਮਚਾਰੀਆਂ ਦੇ ਘਰ ‘ਤੇ ਕੰਮ ਕਰਨ ਨੂੰ ਲੈ ਕੇ ਪੈਦਾ ਹੋਏ ਇਕ ਨਵੇਂ ਮਾਹੌਲ ‘ਤੇ ਸਰਵੇ ਕੀਤਾ ਹੈ। ਇਸ ਸਰਵੇ ਮੁਤਾਬਕ 82 ਫੀਸਦੀ ਭਾਰਤੀ ਲੋਕ ਚਾਹੁੰਦੇ ਹਨ ਕਿ ਉਹ ਜਲਦ ਤੋਂ ਜਲਦ ਦਫ਼ਤਰ ਵਾਪਸ ਜਾਣ। ਸਰਵੇ ਵਿਚ ਸ਼ਾਮਲ ਕੁੱਲ ਲੋਕਾਂ ਵਿਚੋਂ 61 ਫੀਸਦੀ ਲੋਕਾਂ ਨੇ ਕਿਹਾ ਕਿ ਉਹ ਦਫ਼ਤਰ ਵਿਚ ਕੰਮ ਕਰਨਾ ਚਾਹੁੰਦੇ ਹਨ।

ਉੱਥੇ ਹੀ 18 ਫੀਸਦੀ ਲੋਕਾਂ ਨੇ ਕਿਹਾ ਹੈ ਕਿ ਉਹਨਾਂ ਨੂੰ ਘਰ ਵਿਚ ਕੰਮ ਕਰਨ ਵਿਚ ਕੋਈ ਪਰੇਸ਼ਾਨੀ ਮਹਿਸੂਸ ਨਹੀਂ ਹੋ ਰਹੀ ਹੈ। ਸਰਵੇ ਵਿਚ ਪਾਇਆ ਗਿਆ ਕਿ  ‘ਖੇਤਰ ਦੇ 68 ਫੀਸਦੀ ਕਰਮਚਾਰੀ ਘਰ ਤੋਂ ਕੰਮ ਕਰਦੇ ਹਨ, ਜਿਨ੍ਹਾਂ ਵਿਚ 81ਫੀਸਦੀ ਕਰਮਚਾਰੀ ਸਿੰਗਾਪੁਰ ਦੇ ਹਨ’। ਇਸ ਸਰਵੇ ਵਿਚ ਜਿਨ੍ਹਾਂ ਕਰਮਚਾਰੀਆਂ ਨਾਲ ਗੱਲ ਕੀਤੀ ਗਈ, ਉਹਨਾਂ ਵਿਚੋਂ ਕਰੀਬ 66 ਫੀਸਦੀ ਕੋਰੋਨਾ ਸੰਕਟ ਕਾਰਨ ਘਰ ਤੋਂ ਹੀ ਕੰਮ ਕਰ ਰਹੇ ਹਨ।

ਸਰਵੇ ਵਿਚ ਇਕ ਦਿਲਚਸਪ ਗੱਲ ਇਹ ਸਾਹਮਣੇ ਆਈ ਕਿ 54 ਫੀਸਦੀ ਕਰਮਚਾਰੀਆਂ ਨੇ ਮੰਨਿਆ ਹੈ ਕਿ ਜੋ ਚਰਚਾ ਦਫ਼ਤਰ ਦਾ ਮਾਹੌਲ ਵਿਚ ਕੀਤੀ ਜਾਂਦੀ ਹੈ, ਉਸ ਦੀ ਤੁਲਨਾ ਡਿਜ਼ੀਟਲ ਚਰਚਾ ਨਾਲ ਨਹੀਂ ਕੀਤੀ ਜਾ ਸਕਦੀ ਹੈ। ਉਹਨਾਂ ਦਾ ਕਹਿਣਾ ਹੈ ਕਿ ਦਫ਼ਤਰ ਵਿਚ ਆਹਮਣੇ-ਸਾਹਮਣੇ ਹੋਣ ਵਾਲੀ ਚਰਚਾ ਨਾਲ ਬਿਹਤਰ ਨਜੀਤੇ ਨਿਕਲਦੇ ਹਨ।

ਉੱਥੇ ਹੀ 41 ਫੀਸਦੀ ਕਰਮਚਾਰੀਆਂ ਨੇ ਮੰਨਿਆ ਕਿ ਘਰ ਵਿਚ ਕੰਮ ਕਰਨ ਵਿਚ ਦਫ਼ਤਰੀ ਮਾਹੌਲ ਦੀ ਕਮੀ ਹੁੰਦੀ ਹੈ। ਜ਼ਿਕਰਯੋਗ ਹੈ ਕਿ ਇਹ ਸਰਵੇਖਣ ਏਸ਼ੀਆ ਪ੍ਰਸ਼ਾਂਤ ਖੇਤਰ ਦੇ ਪੰਜ ਦੇਸ਼ਾਂ ਦੇ 1,500 ਕਰਮਚਾਰੀਆਂ ਵੱਲੋਂ ਦਿੱਤੀ ਗਈ ਪ੍ਰਤੀਕ੍ਰਿਆ 'ਤੇ ਅਧਾਰਤ ਹੈ।