IndiGo ਨੇ ਘਰੇਲੂ ਹਵਾਈ ਅੱਡਿਆਂ ਉਤੇ 717 ਸਲਾਟ ਖਾਲੀ ਕੀਤੇ
ਡੀ.ਜੀ.ਸੀ.ਏ. ਨੇ ਘਟਾਈ ਸੀ ਸਰਦੀਆਂ ਦੀਆਂ ਉਡਾਣਾਂ ਦੀ ਗਿਣਤੀ
ਸ਼ਹਿਰੀ ਹਵਾਬਾਜ਼ੀ ਮੰਤਰਾਲੇ ਨੇ ਹੋਰ ਏਅਰਲਾਈਨਾਂ ਨੂੰ ਖਾਲੀ ਸਲਾਟਾਂ ਲਈ ਅਪਣੀਆਂ ਬੇਨਤੀਆਂ ਪੇਸ਼ ਕਰਨ ਲਈ ਕਿਹਾ
ਮੁੰਬਈ : ਦਸੰਬਰ ਦੇ ਸ਼ੁਰੂ ’ਚ ਵੱਡੇ ਪੱਧਰ ਉਤੇ ਸੰਚਾਲਨ ਵਿਘਨ ਕਾਰਨ ਡੀ.ਜੀ.ਸੀ.ਏ. ਵਲੋਂ ਦੇਸ਼ ਦੀ ਸੱਭ ਤੋਂ ਵੱਡੀ ਏਅਰਲਾਈਨ ਇੰਡੀਗੋ ਦੀਆਂ ਸਰਦ ਰੁੱਤ ਦੀਆਂ ਉਡਾਣਾਂ ’ਚ 10 ਫੀ ਸਦੀ ਦੀ ਕਟੌਤੀ ਕਰਨ ਤੋਂ ਬਾਅਦ, ਇਸ ਨੇ ਵੱਖ-ਵੱਖ ਘਰੇਲੂ ਹਵਾਈ ਅੱਡਿਆਂ ਉਤੇ 700 ਤੋਂ ਵੱਧ ਸਲਾਟ ਖਾਲੀ ਕਰ ਦਿਤੇ ਹਨ।
ਆਮ ਤੌਰ ਉਤੇ, ਸਲਾਟ ਇਕ ਏਅਰਲਾਈਨ ਨੂੰ ਜਹਾਜ਼ ਦੇ ਉਡਾਣ ਭਰਨ ਅਤੇ ਲੈਂਡਿੰਗ ਲਈ ਦਿਤੇ ਗਏ ਇਕ ਖਾਸ ਸਮੇਂ ਦੀ ਮਿਆਦ ਨੂੰ ਕਹਿੰਦੇ ਹਨ। ਸਧਾਰਣ ਸ਼ਬਦਾਂ ’ਚ, ਇਹ ਦਿਤੇ ਸਮੇਂ ਉਤੇ ਉਡਾਣਾਂ ਚਲਾਉਣ ਬਾਰੇ ਹੈ। 717 ਸਲਾਟਾਂ ਵਿਚੋਂ 364 ਛੇ ਪ੍ਰਮੁੱਖ ਮੈਟਰੋ ਹਵਾਈ ਅੱਡਿਆਂ ਦਿੱਲੀ, ਮੁੰਬਈ, ਚੇਨਈ, ਕੋਲਕਾਤਾ, ਬੈਂਗਲੁਰੂ ਅਤੇ ਹੈਦਰਾਬਾਦ ਦੇ ਹਨ। ਸੂਤਰਾਂ ਨੇ ਦਸਿਆ ਕਿ ਇਨ੍ਹਾਂ ਸ਼ਹਿਰਾਂ ਵਿਚੋਂ ਜ਼ਿਆਦਾਤਰ ਖਾਲੀ ਸਲਾਟ ਹੈਦਰਾਬਾਦ ਅਤੇ ਬੈਂਗਲੁਰੂ ਦੇ ਹਨ।
ਸੂਤਰਾਂ ਵਲੋਂ ਦਿਤੇ ਗਏ ਅੰਕੜਿਆਂ ਮੁਤਾਬਕ ਇੰਡੀਗੋ ਵਲੋਂ ਖਾਲੀ ਕੀਤੇ ਗਏ ਸਲਾਟਾਂ ਦੀ ਗਿਣਤੀ ਜਨਵਰੀ-ਮਾਰਚ ਦੀ ਮਿਆਦ ਵਿਚ ਫੈਲੀ ਹੋਈ ਹੈ। ਫ਼ਰਵਰੀ ਲਈ ਸਿਰਫ 43 ਦੇ ਮੁਕਾਬਲੇ ਮਾਰਚ ਲਈ ਕੁਲ 361 ਸਲਾਟ ਖਾਲੀ ਕੀਤੇ ਗਏ ਹਨ, ਅਤੇ ਇਸ ਮਹੀਨੇ, ਖਾਲੀ ਕੀਤੇ ਗਏ ਸਲਾਟਾਂ ਦੀ ਗਿਣਤੀ 361 ਹੈ। ਇਸ ਪਿਛੋਕੜ ਦੇ ਮੱਦੇਨਜ਼ਰ, ਸ਼ਹਿਰੀ ਹਵਾਬਾਜ਼ੀ ਮੰਤਰਾਲੇ ਨੇ ਵੀਰਵਾਰ ਨੂੰ ਹੋਰ ਏਅਰਲਾਈਨਾਂ ਨੂੰ ਇੰਡੀਗੋ ਵਲੋਂ ਖਾਲੀ ਕੀਤੇ ਗਏ ਸਲਾਟਾਂ ਉਤੇ ਘਰੇਲੂ ਉਡਾਣਾਂ ਚਲਾਉਣ ਲਈ ਅਪਣੀਆਂ ਬੇਨਤੀਆਂ ਪੇਸ਼ ਕਰਨ ਲਈ ਕਿਹਾ।
ਇਕ ਸੂਤਰ ਨੇ ਦਸਿਆ ਕਿ ਇੰਡੀਗੋ ਨੇ ਮੰਤਰਾਲੇ ਨੂੰ 717 ਸਲਾਟਾਂ ਦੀ ਸੂਚੀ ਸੌਂਪੀ ਹੈ, ਜਿਸ ਨੂੰ ਪਿਛਲੇ ਸਾਲ ਦਸੰਬਰ ਦੀ ਸ਼ੁਰੂਆਤ ’ਚ ਘਰੇਲੂ ਸਰਦੀਆਂ ਦੇ ਕਾਰਜਕ੍ਰਮ ’ਚ 10 ਫੀ ਸਦੀ ਘਟਾਉਣ ਤੋਂ ਬਾਅਦ ਖਾਲੀ ਕਰ ਦਿਤਾ ਗਿਆ ਹੈ। ਏਅਰਲਾਈਨ, ਜੋ ਆਮ ਤੌਰ ਉਤੇ ਰੋਜ਼ਾਨਾ 2,200 ਤੋਂ ਵੱਧ ਉਡਾਣਾਂ ਚਲਾਉਂਦੀ ਹੈ, ਨੇ ਡਾਇਰੈਕਟੋਰੇਟ ਜਨਰਲ ਆਫ ਸਿਵਲ ਏਵੀਏਸ਼ਨ (ਡੀ.ਜੀ.ਸੀ.ਏ.) ਦੇ ਨਿਰਦੇਸ਼ਾਂ ਤੋਂ ਬਾਅਦ ਸੇਵਾਵਾਂ ਦੀ ਗਿਣਤੀ ਘਟਾ ਦਿਤੀ ਹੈ, ਜਿਸ ਦਾ ਉਦੇਸ਼ ਆਖਰੀ ਮਿੰਟ ਵਿਚ ਰੱਦ ਹੋਣ ਨੂੰ ਰੋਕਣਾ ਅਤੇ ਕਾਰਜਸ਼ੀਲ ਸਥਿਰਤਾ ਨੂੰ ਯਕੀਨੀ ਬਣਾਉਣਾ ਸੀ।