SP ਨੇ ਜੜਿਆ CM ਦੇ Security ਇੰਚਾਰਜ ਨੂੰ ਥੱਪੜ, ਸਕਿਊਰਿਟੀ ਵਾਲੇ ਨੇ ਮਾਰੀਆਂ ਲੱਤਾਂ 

Himachal Pradesh: CM’s security officers, district cops clash in Kullu

ਨਵੀਂ ਦਿੱਲੀ - ਕੇਂਦਰੀ ਮੰਤਰੀ ਨਿਤਿਨ ਗਡਕਰੀ ਦੀ ਹਿਮਾਚਲ ਪ੍ਰਦੇਸ਼ ਦੇ ਕੁੱਲੂ ਦੀ ਫੇਰੀ ਦੌਰਾਨ ਪੁਲਿਸ ਅਧਿਕਾਰੀ ਭੁੰਤਰ ਏਅਰਪੋਰਟ ਦੇ ਬਾਹਰ ਸੁਰੱਖਿਆ ਪ੍ਰਬੰਧਾਂ ਨੂੰ ਲੈ ਕੇ ਇਕ ਦੂਜੇ ਨਾਲ ਬਹਿਸ ਗਏ। ਵਿਵਾਦ ਇੰਨਾ ਵੱਧ ਗਿਆ ਕਿ ਐਸਪੀ ਕੁੱਲੂ ਗੌਰਵ ਸਿੰਘ ਨੇ ਮੁੱਖ ਮੰਤਰੀ ਦੇ ਸੁਰੱਖਿਆ ਇੰਚਾਰਜ ਅਤੇ ਵਧੀਕ ਐਸਪੀ ਬ੍ਰਿਜੇਸ਼ ਸੂਦ ਨੂੰ ਥੱਪੜ ਮਾਰ ਦਿੱਤਾ। ਇਸ ਦੇ ਜਵਾਬ ਵਿਚ ਮੁੱਖ ਮੰਤਰੀ ਦੀ ਸੁਰੱਖਿਆ ਵਿਚ ਤਾਇਨਾਤ ਕਰਮਚਾਰੀਆਂ ਨੇ ਐਸਪੀ ਨੂੰ ਘੇਰ ਲਿਆ ਅਤੇ ਮੁੱਖ ਮੰਤਰੀ ਦੇ ਪੀਐਸਓ ਬਲਵੰਤ ਸਿੰਘ ਨੇ ਐਸਪੀ ਨੂੰ ਲੱਤਾਂ ਨਾਲ ਮਾਰਿਆ।

ਇਸ ਮਾਮਲੇ ਦੀ ਵੀਡੀਓ ਵੀ ਵਾਇਰਲ ਹੋ ਰਹੀ ਹੈ। ਮੁੱਖ ਮੰਤਰੀ ਦੇ ਨਿਰਦੇਸ਼ਾਂ 'ਤੇ ਕੇਂਦਰੀ ਰੇਂਜ ਮੰਡੀ ਦੇ ਡੀਆਈਜੀ ਮਧੂਸੂਦਨ ਨੇ ਜਾਂਚ ਸ਼ੁਰੂ ਕੀਤੀ। ਇਸ ਦੇ ਨਾਲ ਹੀ ਮਾਮਲੇ ਦੀ ਗੰਭੀਰਤਾ ਨੂੰ ਵੇਖਦਿਆਂ ਡੀਜੀਪੀ ਸੰਜੇ ਕੁੰਡੂ ਵੀ ਕੁੱਲੂ ਤੋਂ ਸ਼ਿਮਲਾ ਲਈ ਰਵਾਨਾ ਹੋ ਗਏ। ਬੁੱਧਵਾਰ ਦੁਪਹਿਰ 2 ਵਜੇ ਤੋਂ ਬਾਅਦ ਕਰੀਬ ਸਾਢੇ ਤਿੰਨ ਵਜੇ ਨਿਤਿਨ ਗਡਕਰੀ ਪੰਜ ਦਿਨਾਂ ਦੇ ਦੌਰੇ 'ਤੇ ਕੁੱਲੂ ਪਹੁੰਚੇ ਸਨ। 

ਮੰਤਰੀ ਨੂੰ ਲੈਣ ਪਹੁੰਚੇ ਮੁੱਖ ਮੰਤਰੀ ਜੈਰਾਮ ਠਾਕੁਰ ਲਾਵ ਲਸ਼ਕਰ ਦੇ ਨਾਲ ਭੁੰਤਰ ਏਅਰਪੋਰਟ ਪਹੁੰਚੇ। ਸੂਤਰਾਂ ਅਨੁਸਾਰ ਪ੍ਰੋਟੋਕਾਲ ਦੇ ਅਨੁਸਾਰ ਗਡਕਰੀ ਦੇ ਵਾਹਨਾਂ ਦੇ ਕਾਫਲੇ ਵਿਚ ਸਿਰਫ ਮੁੱਖ ਮੰਤਰੀ ਦੀ ਗੱਡੀ ਸ਼ਾਮਲ ਕੀਤੀ ਜਾਣੀ ਸੀ ਅਤੇ ਬਾਕੀ ਵਾਹਨ ਕਾਫਲੇ ਦੇ ਮਗਰ ਰਹਿਣੇ ਸਨ, ਪਰ ਵਾਹਨਾਂ ਦੇ ਕਾਫਲੇ ਵਿਚ ਸ਼ਾਮਿਲ ਕਰਨ ਨੂੰ ਲੈ ਕੇ ਐਸਪੀ ਕੁੱਲੂ ਅਤੇ ਐਡੀਸ਼ਨਲ ਐਸਪੀ ਸੀਐਮ ਸੁਰੱਖਿਆ ਵਿਚ ਝਗੜਾ ਹੋ ਗਿਆ। ਮਾਮਲਾ ਇੰਨਾ ਵੱਧ ਗਿਆ ਕਿ ਜਦੋਂ ਕਾਫਲਾ ਇਕ ਜਗ੍ਹਾ 'ਤੇ ਰੁਕਿਆ ਤਾਂ ਐਸਪੀ ਅਤੇ ਐਡੀਸ਼ਨਲ ਐਸਪੀ ਵਿਚਾਲੇ ਝਗੜਾ ਹੋ ਗਿਆ।