ਮੈਂ ਨਾੜੀ ਵੇਖ ਕੇ ਮੰਤਰਾਂ ਨਾਲ ਇਲਾਜ ਕਰ ਸਕਦਾ ਹਾਂ : ਸ਼ਿਵ ਸੈਨਾ ਸੰਸਦ ਮੈਂਬਰ

ਔਰੰਗਾਬਾਦ : ਸ਼ਿਵ ਸੈਨਾ ਸੰਸਦ ਮੈਂਬਰ ਚੰਦਰਕਾਂਤ ਖੈਰੇ ਨੇ ਦਾਅਵਾ ਕੀਤਾ ਹੈ ਕਿ ਉਹ ਲੋਕਾਂ ਦੀ ਨਾੜੀ ਵੇਖ ਕੇ, ਮੰਤਰਾਂ ਤੇ ਵਿਭੂਤੀ ਜ਼ਰੀਏ ਉਨ੍ਹਾਂ ਦੀ ਬੀਮਾਰੀ ਦਾ ਇਲਾਜ ਕਰ ਸਕਦਾ ਹੈ। ਔਰੰਗਾਬਾਦ ਤੋਂ ਲੋਕ ਸਭਾ ਮੈਂਬਰ ਖੈਰੇ ਨੇ ਕਲ ਰਾਸ਼ਟਰੀ ਸਿਹਤ ਮਿਸ਼ਨ ਦੇ ਸਮਾਗਮ ਦੌਰਾਨ ਡਾਕਟਰਾਂ ਦੀ ਮੌਜੂਦਗੀ ਵਿਚ ਇਹ ਦਾਅਵਾ ਕੀਤਾ। ਪ੍ਰੋਗਰਾਮ ਸਥਾਨਕ ਸਰਕਾਰੀ ਕਾਲਜ ਅਤੇ ਹਸਪਤਾਲ ਵਿਚ ਹੋਇਆ ਸੀ। ਸੰਸਦ ਮੈਂਬਰ ਨੇ ਦਾਅਵਾ ਕੀਤਾ ਕਿ ਉਸ ਨੇ ਕਈ ਲੋਕਾਂ ਨੂੰ ਮੰਤਰਾਂ ਅਤੇ ਵਿਭੂਤੀ ਨਾਲ ਠੀਕ ਕੀਤਾ ਹੈ।

ਇਹ ਵਿਭੂਤੀ ਖਾਣ ਲਈ ਜਾਂ ਉਸ ਦੀ ਪੁੜੀ ਸਿਰਹਾਣੇ ਹੇਠਾਂ ਰੱਖਣ ਲਈ ਦਿਤੀ ਜਾਂਦੀ ਹੈ। ਖੈਰੇ ਨੇ ਕਿਹਾ ਕਿ ਉਸ ਨੇ ਭਾਜਪਾ ਦੇ ਸੀਨੀਅਰ ਆਗੂ ਪ੍ਰਮੋਦ ਮਹਾਜਨ ਨੂੰ ਗੋਲੀ ਵੱਜਣ ਮਗਰੋਂ ਉਨ੍ਹਾਂ ਦੇ ਬੇਟੇ ਰਾਹੁਲ ਮਹਾਜਨ ਨੂੰ ਵੀ ਵਿਭੂਤੀ ਦਿਤੀ ਸੀ ਪਰ ਹਸਪਤਾਲ ਵਿਚ ਮਹਾਜਨ ਦੇ ਕਮਰੇ ਦੇ ਬਾਹਰ ਜ਼ਿਆਦਾ ਸੁਰੱÎਖਿਆ ਹੋਣ ਕਾਰਨ ਕੋਈ ਵੀ ਅੰਦਰ ਨਾ ਜਾ ਸਕਿਆ। ਉਨ੍ਹਾਂ ਇਸ ਨੂੰ ਅਪਣੀ ਇਕਮਾਤਰ ਨਾਕਾਮੀ ਦਸਿਆ।

ਮਹਾਜਨ ਦੀ 2006 ਵਿਚ ਹਸਪਤਾਲ ਵਿਚ ਮੌਤ ਹੋ ਗਈ ਸੀ। ਇਕ ਹੋਰ ਘਟਨਾ ਦਾ ਜ਼ਿਕਰ ਕਰਦਿਆਂ ਖੈਰੇ ਨੇ ਕਿਹਾ, 'ਇਕ ਪਾਰਟੀ ਕਾਰਕੁਨ ਦੀ ਪਤਨੀ ਹਾਦਸੇ ਵਿਚ ਜ਼ਖ਼ਮੀ ਹੋ ਗਈ ਸੀ। ਮੈਂ ਉਸ ਦੀ ਧੜਕਣ ਮਹਿਸੂਸ ਕੀਤੀ ਅਤੇ ਮੰਤਰ ਪੜ੍ਹੇ, ਉਸ ਨੇ ਅਪਣੀਆਂ ਅੱਖਾਂ ਖੋਲ੍ਹ ਲਈਆਂ ਅਤੇ ਕੁੱਝ ਹੀ ਦਿਨਾਂ ਵਿਚ ਰਾਜ਼ੀ ਹੋ ਗਈ।' ਇਸ ਸੰਸਦ ਮੈਂਬਰ ਨੇ ਮਰਾਠਾਵਾੜਾ ਯੂਨੀਵਰਸਿਟੀ ਤੋਂ ਸਾਇੰਸ ਦੀ ਡਿਗਰੀ ਕੀਤੀ ਹੋਈ ਹੈ।  (ਏਜੰਸੀ)