ਦਿੱਲੀ ਦੀ ਇਕ ਅਦਾਲਤ ਨੇ ਏਅਰਸੈੱਲ-ਮੈਕਸਿਸ ਮਾਮਲੇ ਵਿਚ ਕਾਰਤੀ ਚਿਦੰਬਰਮ ਦੀ ਗ੍ਰਿਫ਼ਤਾਰੀ 'ਤੇ 16 ਅਪ੍ਰੈਲ ਤਕ ਰੋਕ ਲਗਾ ਦਿਤੀ ਹੈ। ਕੇਂਦਰੀ ਜਾਂਚ ਬਿਉਰੋ (ਸੀ.ਬੀ.ਆਈ.) ਅਤੇ ਇਨਫ਼ੋਰਸਮੈਂਟ ਡਾਇਰੈਕਟੋਰੇਟ (ਈ.ਡੀ.) ਨੇ ਇਹ ਮਾਮਲਾ 2 ਜੀ ਸਪੈਕਟ੍ਰਮ ਵੰਡ ਘੁਟਾਲੇ ਨਾਂਲ ਜੁੜੇ ਮਾਮਲਿਆਂ ਵਿਚ ਦਰਜ ਕੀਤਾ ਹੈ।ਵਿਸ਼ੇਸ਼ ਜੱਜ ਓ.ਪੀ. ਸੈਣੀ ਨੇ ਜਾਂਚ ਏਜੰਸੀਆਂ ਨੂੰ ਕਾਰਤੀ ਵਲੋਂ ਦਾਇਰ ਕੀਤੀ ਅਗਾਊਂ ਜ਼ਮਾਨਤ ਪਟੀਸ਼ਨ 'ਤੇ ਤਿੰਨ ਹਫ਼ਤੇ ਵਿਚ ਵਿਸਥਾਰਤ ਜਵਾਬ ਦੇਣ ਨੂੰ ਕਿਹਾ। ਖਚਾਖਚ ਭਰੀ ਅਦਾਲਤ ਵਿਚ ਸੁਣਾਏ ਗਏ ਫ਼ੈਸਲੇ ਵਿਚ ਅਦਾਲਤ ਨੇ ਇਹ ਵੀ ਕਿਹਾ ਕਿ ਕਾਰਤੀ ਬਿਨਾਂ ਉਸ ਦੀ ਇਜਾਜ਼ਤ ਦੇ ਦੇਸ਼ ਛੱਡ ਕੇ ਨਹੀਂ ਜਾ ਸਕਦਾ। ਕਾਰਤੀ ਨੂੰ ਹਾਈ ਕੋਰਟ ਨੇ ਆਈ.ਐਨ.ਐਕਸ ਮੀਡੀਆ ਮਾਮਲੇ ਵਿਚ ਕਲ ਜ਼ਮਾਨਤ ਦੇ ਦਿਤੀ ਹੈ।
ਸੀ.ਬੀ.ਆਈ. ਦੇ ਇਸ ਮਾਮਲੇ ਵਿਚ ਜਿਰ੍ਹਾ ਕਰਦਿਆਂ ਕਾਰਤੀ ਦੇ ਵਕੀਲ ਕਪਿਲ ਸਿੱਬਲ ਨੇ ਕਿਹਾ, ''ਏਅਰਸੈੱਲ-ਮੈਕਸਿਸ ਮਾਮਲਿਆਂ ਵਿਚ ਕਾਰਤੀ ਵਿਰੁਧ ਨਾ ਤਾਂ ਕੋਈ ਦੋਸ਼ ਹੈ ਅਤੇ ਨਾ ਹੀ ਇਸ ਗੱਲ ਦੇ ਸਬੂਤ ਹਨ ਕਿ ਉਹ ਐਫ਼.ਆਈ.ਪੀ.ਬੀ. ਦੇ ਅਧਿਕਾਰੀਆਂ ਨੂੰ ਜਾਣਦੇ ਸਨ।''ਈ.ਡੀ. ਮਾਮਲੇ ਵਿਚ ਕਾਰਤੀ ਵਲੋਂ ਪੇਸ਼ ਵਕੀਲ ਗੋਪਾਲ ਸੁਬਰਾਮਣਿਅਮ ਨੇ ਕਿਹਾ ਕਿ ਕਾਰਤੀ ਨੇ ਹੋਰ ਮਾਮਲਿਆਂ ਵਿਚ ਵੀ ਸਹਿਯੋਗ ਕੀਤਾ ਹੈ ਅਤੇ ਇਸ ਗੱਲ ਦਾ ਸਵਾਲ ਹੀ ਨਹੀਂ ਪੈਦਾ ਹੁੰਦਾ ਕਿ ਉਹ ਦੇਸ਼ ਛੱਡ ਕੇ ਭੱਜ ਜਾਵੇਗਾ ਜਾਂ ਸਬੂਤਾਂ ਨਾਲ ਛੇੜਛਾੜ ਕਰੇਗਾ।ਇਸ ਦੌਰਾਨ ਕਾਰਤੀ ਦੇ ਪਿਤਾ ਸਾਬਕਾ ਵਿੱਤ ਮੰਤਰੀ ਪੀ. ਚਿਦੰਬਰਮ ਅਤੇ ਉਨ੍ਹਾਂ ਦੀ ਪਤਨੀ ਨਲਿਨੀ ਚਿਦੰਬਰਮ ਵੀ ਵਕੀਲਾਂ ਵਾਲੀ ਕਾਲੀ ਪੁਸ਼ਾਕ ਪਾ ਕੇ ਅਦਾਲਤ ਵਿਚ ਮੌਜੂਦ ਸਨ। (ਪੀ.ਟੀ.ਆਈ.)