ਮਾਂ ਦੀ ਹੱਤਿਆ ਕਰ ਵਾਟਸਐਪ 'ਤੇ ਕਬੂਲਿਆ ਜ਼ੁਰਮ, ਫ਼ਰਾਰ

accepted-crimes-committed-at-whatsapp-by-killing-mother-fleeing

ਉਦੈਪੁਰ : ਰਾਜਸਥਾਨ ਦੇ ਉਦੈਪੁਰ ਵਿਖੇ ਸਥਿਤ ਸ਼ਾਂਤ ਅਤੇ ਛੋਟੇ ਜਿਹੇ ਸ਼ਹਿਰ ਬਾਂਸਵਾੜਾ ਵਿਚ ਰੋਂਗਟੇ ਖੜੇ ਕਰ ਦੇਣ ਵਾਲੀ ਇੱਕ ਘਟਨਾ ਸਾਹਮਣੇ ਆਈ। ਇੱਥੇ ਇਕ 18 ਸਾਲ ਦੇ ਮੁੰਡੇ ਨੇ ਆਪਣੀ ਮਾਂ ਦੀ ਹੱਤਿਆ ਕਰ ਦਿੱਤੀ ਅਤੇ ਫਿਰ ਗਾਇਬ ਹੋ ਗਿਆ। ਇਹੋ ਹੀ ਨਹੀਂ, ਉਸਨੇ ਖੁਦ ਇੱਕ ਵਾਟਸਐਪ ਗਰੁੱਪ ਤੇ ਇਸ ਘਟਨਾ ਦੀ ਜਾਣਕਾਰੀ ਦਿੱਤੀ ਹੈ ਅਤੇ ਆਪਣਾ ਜ਼ੁਰਮ ਕਬੂਲਿਆ ਹੈ। ਘਟਨਾ ਤੋਂ ਬਾਅਦ ਪੁਲਿਸ ਵਿਵੇਕ ਪਾਂਚਾਲ ਨਾਮ ਦੇ ਇਸ ਯੂਵਕ ਨੂੰ ਫੜਨ ਦੀ ਕੋਸ਼ਿਸ਼ਾਂ ਵਿੱਚ ਜੁੱਟ ਗਈ ਹੈ।

ਉਸਨੇ ਗਰੁੱਪ ਵਿੱਚ ਐਤਵਾਰ ਰਾਤ ਨੂੰ ਕਿਤੇ ਗਏ ਮੈਸੇਜ ਵਿਚ ਇਹ ਵੀ ਲਿਖਿਆ ਕਿ ਉਹ ਖੁਦ ਵੀ ਖੁਦਕੁਸ਼ੀ ਕਰਨ ਜਾ ਰਿਹਾ ਹੈ। ਉਸਨੇ ਲਿਖਿਆ ਕਿ ਮੇਰੀ ਲਾਸ਼ ਕਲ ਜੀਮਨ ਬ੍ਰਿਜ ਤੇ ਮਿਲੇਗੀ। ਹਾਲਾਂਕਿ ਤਾਜ਼ਾ ਜਾਣਕਾਰੀ ਮੁਤਾਬਕ ਉਹ ਹਾਲੇ ਵੀ ਗਾਇਬ ਹੈ। ਪੁਲਿਸ ਤੁਰੰਤ ਮਹਿਲਾ ਦੇਵ ਕੰਨਿਆ ਦੀ ਖਾਂਡੂ ਕੋਲੋਨੀ ਵਿਖੇ ਪੁੱਜੀ। ਉਥੇ ਮਹਿਲਾ ਦੀ ਲਾਸ਼ ਖੂਨ ਨਾਲ ਸੰਨੀ ਹੋਈ ਮਿਲੀ। ਮੁੱਢਲੀ ਜਾਂਚ ਵਿਚ ਅਧਿਕਾਰੀਆਂ ਵੱਲੋਂ ਕੰਧਾਂ ਤੇ ਖੂਨ ਪਾਇਆ ਜਿਸਤੋਂ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਦੋਸ਼ੀ ਨੇ ਪਹਿਲਾਂ ਮਹਿਲਾ ਦੇ ਸਿਰ ਤੇ ਜ਼ੋਰਦਾਰ ਵਾਰ ਕੀਤਾ ਹੋਵੇਗਾ।

ਲਾਸ਼ ਦਾ ਚਿਹਰਾ ਵੀ ਬੁਰੀ ਹਾਲਤ ਵਿਚ ਸੀ। ਜਿਸਤੋਂ ਅਪਰਾਧ ਦੀ ਬਰਬਰਤਾ ਦਾ ਸਹਿਜੇ ਹੀ ਪਤਾ ਲਗਦਾ ਹੈ। ਦਸਿਆ ਗਿਆ ਹੈ ਕਿ ਵਿਵੇਕ ਦੋ ਭਰਾਵਾਂ ਵਿਚੋਂ ਛੋਟਾ ਸੀ ਅਤੇ ਜਬਲਪੁਰ ਵਿਚ ਆਪਣੇ ਪਿਤਾ ਨਾਲ ਕੰਮ ਕਰਦਾ ਸੀ। ਉਹ ਗਣੇਸ਼ ਚਤੁਰਥੀ ਲਈ ਘਰ ਆਇਆ ਹੋਇਆ ਸੀ। ਉਸਦਾ ਵੱਡਾ ਭਰਾ ਕੁਵੈਤ ਵਿਚ ਕੰਮ ਕਰਦਾ ਹੈ ਅਤੇ ਵਿਵੇਕ ਉਸਦੇ ਕੋਲ ਜਾਣਾ ਚਾਹੁੰਦਾ ਸੀ। ਕੋਤਵਾਲੀ ਪੁਲਿਸ ਸਟੇਸ਼ਨ ਦੇ ਹਾਊਸ ਅਫਸਰ ਦਿਲੀਪ ਦਾਨ ਨੇ ਦਸਿਆ ਕਿ ਮੈਸੇਜ ਦੇ ਆਧਾਰ ਤੇ ਪੁਲਿਸ ਵਿਵੇਕ ਨੂੰ ਹੀ ਉਸਦੀ ਮਾਂ ਦੀ ਹੱਤਿਆ ਲਈ ਜਿੰਮੇਵਾਰ ਮੰਨ ਰਹੀ ਹੈ।