ਦਿੱਲੀ ਸਥਿਤ ‘ਸਹਿਮਤ’ ਨੇ ਕੇਰਲ ’ਚ ਕਲਾਕ੍ਰਿਤੀਆਂ ਦੀ ਭੰਨਤੋੜ ਦੀ ਨਿੰਦਾ ਕੀਤੀ 

ਦਿੱਲੀ ਸਥਿਤ ‘ਸਹਿਮਤ’ ਨੇ ਕੇਰਲ ’ਚ ਕਲਾਕ੍ਰਿਤੀਆਂ ਦੀ ਭੰਨਤੋੜ ਦੀ ਨਿੰਦਾ ਕੀਤੀ 

ਕੋਚੀ/ਨਵੀਂ ਦਿੱਲੀ : ਦਿੱਲੀ ਸਥਿਤ ਇਕ ਸਭਿਆਚਾਰਕ  ਸੰਗਠਨ ‘ਸਹਿਮਤ’ ਨੇ ਇੱਥੇ ਦਰਬਾਰ ਹਾਲ ਆਰਟ ਗੈਲਰੀ ’ਚ ਅਲਜੀਰੀਆਈ-ਫਰਾਂਸੀਸੀ ਕਲਾਕਾਰ ਹਨਨ ਬੇਨੰਮਾਰ ਦੀ ਕਲਾਕ੍ਰਿਤੀ ਦੀ ਹਾਲ ਹੀ ’ਚ ਕੀਤੀ ਗਈ ਭੰਨਤੋੜ ਦੀ ਨਿੰਦਾ ਕੀਤੀ ਹੈ। ਸਫਦਰ ਹਾਸ਼ਮੀ ਮੈਮੋਰੀਅਲ ਟਰੱਸਟ (ਸਹਿਮਤ) ਨੇ ਇਕ ਬਿਆਨ ਵਿਚ ਕਿਹਾ ਕਿ ਕਲਾ ਉਤੇ ਪਹਿਲਾਂ ਆਮ ਤੌਰ ਉਤੇ  ਹਿੰਦੂ ਸੱਜੇਪੱਖੀ ਤਾਕਤਾਂ ਵਲੋਂ ਹਮਲੇ ਹੁੰਦੇ ਸਨ, ਪਰ ਇਹ ਘਟਨਾ ਹੈਰਾਨ ਕਰਨ ਵਾਲੀ ਸੀ ਕਿਉਂਕਿ ਇਹ ਇਕ ਕਲਾਕਾਰ ਨੇ ਕੀਤਾ ਸੀ ਅਤੇ ਉਹ ਵੀ ਕੇਰਲ ਵਿਚ ਜੋ ਅਪਣੇ  ਸਹਿਣਸ਼ੀਲ ਅਤੇ ਪ੍ਰਗਤੀਸ਼ੀਲ ਸਭਿਆਚਾਰ ਲਈ ਜਾਣਿਆ ਜਾਂਦਾ ਹੈ। 

ਬਿਆਨ ਅਨੁਸਾਰ, ‘‘ਇਸ ਤੋਂ ਇਲਾਵਾ, ਇਹ ਕੋਚੀ-ਮੁਜ਼ੀਰਿਸ ਬਿਏਨੇਲ, ਜੋ ਕਿ ਇਕ  ਕੌਮਾਂਤਰੀ  ਮੀਲ ਪੱਥਰ ਬਣ ਗਿਆ ਹੈ, ਦਸੰਬਰ 2025 ਵਿਚ ਖੁੱਲ੍ਹਣ ਤੋਂ ਠੀਕ ਪਹਿਲਾਂ ਹੋਇਆ ਹੈ। ਸਭਿਆਚਾਰ ਉਤੇ  ਇਸ ਕਿਸਮ ਦੇ ਹਮਲੇ ਪਿਛਲੇ ਕੁੱਝ  ਸਾਲਾਂ ਵਿਚ ਆਮ ਹੋ ਗਏ ਹਨ ਅਤੇ ਨਫ਼ਰਤ ਨਾਲ ਭਰੀ ਸਿਆਸੀ ਬਿਆਨਬਾਜ਼ੀ ਰਾਹੀਂ ਉਤਸ਼ਾਹਤ ਕੀਤੇ ਗਏ ਹਨ। ਇਸ ਦਾ ਹਰ ਕੀਮਤ ਉਤੇ  ਵਿਰੋਧ ਕੀਤਾ ਜਾਣਾ ਚਾਹੀਦਾ ਹੈ।’’

‘ਸਹਿਮਤ’ ਨੇ ਮੰਗ ਕੀਤੀ ਹੈ ਕਿ ਭੰਨਤੋੜ ਕਰਨ ਵਾਲਿਆਂ ਵਿਰੁਧ  ਕਾਰਵਾਈ ਕੀਤੀ ਜਾਵੇ ਅਤੇ ਉਨ੍ਹਾਂ ਨੂੰ ਇਸ ਤੋਂ ਬਚਣ ਦੀ ਇਜਾਜ਼ਤ ਨਹੀਂ ਦਿਤੀ  ਜਾਣੀ ਚਾਹੀਦੀ। ਇਸ ਵਿਚ ਇਹ ਵੀ ਕਿਹਾ ਗਿਆ ਹੈ ਕਿ ਭੰਨਤੋੜ ਕਰਨ ਵਾਲਾ ਕਲਾਕਾਰ ‘ਕਾਫ਼ੀ ਬੇਸ਼ਰਮ ਸੀ ਕਿ ਉਸ ਨੇ ਤਬਾਹੀ ਦੀ ਵੀਡੀਉ  ਟੇਪ ਕਰਨ ਅਤੇ ਫਿਰ ਇਸ ਨੂੰ ਸੋਸ਼ਲ ਮੀਡੀਆ ਉਤੇ ਪੋਸਟ ਕਰ ਦਿਤਾ।’ ਓਸਲੋ ਅਧਾਰਤ ਬੇਨਾਮਾਰ ਦੀ ਕਲਾਕਾਰੀ ਦੀ ਇਸ ਆਧਾਰ ਉਤੇ  ਭੰਨਤੋੜ ਕੀਤੀ ਗਈ ਸੀ ਕਿ ਇਸ ਵਿਚ ‘ਜ਼ੁਬਾਨੀ ਅਸ਼ਲੀਲਤਾ’ ਸੀ। ਵੀਰਵਾਰ ਨੂੰ ਬੇਨਾਮਾਰ ਨੇ ਵੀ ਭੰਨਤੋੜ ਦੀ ਨਿੰਦਾ ਕੀਤੀ। ਕੇਰਲ ਦੇ ਕਲਾਕਾਰ ਪੀ.ਐਚ. ਹੋਚੀਮੈਨ ਨੇ ਬੁਧਵਾਰ  ਨੂੰ ਦਰਬਾਰ ਹਾਲ ਆਰਟ ਗੈਲਰੀ ਵਿਖੇ ਚੱਲ ਰਹੀ ਪ੍ਰਦਰਸ਼ਨੀ ‘ਵਿਛੜਿਆ ਭੂਗੋਲ’ ਦਾ ਹਿੱਸਾ ਬਣੇ ‘ਗੋ ਈਟ ਯੂਅਰ ਡੈਡੀ’ ਸਿਰਲੇਖ ਵਾਲੇ ਛੇ ਪ੍ਰਿੰਟਿਡ ਲਿਨੋਕੱਟ ਕੰਮਾਂ ਨੂੰ ਢਾਹ ਦਿਤਾ ਸੀ। ਉਸ ਨੇ  ਇਸ ਕੰਮ ਨੂੰ ਫੇਸਬੁੱਕ ਉਤੇ  ਲਾਈਵ ਸਟ੍ਰੀਮ ਕੀਤਾ ਸੀ, ਦਾਅਵਾ ਕੀਤਾ ਸੀ ਕਿ ਕੰਮ ਅਸ਼ਲੀਲ ਸਨ।