ਅਟਲ ਸੁਰੰਗ 'ਚ ਕਾਰ ਰੋਕ ਕੇ ਨੱਚਣ ਵਾਲੇ ਸੈਲਾਨੀਆਂ ਖਿਲਾਫ਼ ਮਾਮਲਾ ਦਰਜ, 8 ਗ੍ਰਿਫ਼ਤਾਰ 

ਹਾਲ ਹੀ ਵਿਚ ਅਟਲ ਸੁਰੰਗ ਵਿਚੋਂ ਲੰਘਦਿਆਂ, ਕੁਝ ਲੋਕ ਆਪਣੀ ਕਾਰ ਤੋਂ ਹੇਠਾਂ ਉਤਰ ਗਏ ਅਤੇ ਮੋਬਾਈਲ ਤੋਂ ਤਸਵੀਰਾਂ ਅਤੇ ਵੀਡੀਓਜ਼ ਦੀ ਸ਼ੂਟਿੰਗ ਕਰਨ ਲੱਗ ਪਏ। ਕੁਝ ਲੋਕਾਂ ਨੇ ਤਾਂ ਸੁਰੰਗ ਵਿਚ ਨੱਚਣਾ ਵੀ ਸ਼ੁਰੂ ਕਰ ਦਿੱਤਾ ਜਿਸ ਨਾਲ ਟਰੈਫਿਕ ਜਾਮ ਹੋ ਗਿਆ। ਇਸ ਘਟਨਾ ਦੀ ਵੀਡੀਓ ਸੋਸ਼ਲ ਮੀਡੀਆ 'ਤੇ ਬਹੁਤ ਵਾਇਰਲ ਹੋ ਰਹੀ ਹੈ। ਸੁਰੰਗ ਜਾਮ ਹੋਣ ਕਰ ਕੇ ਕੁਝ ਲੋਕਾਂ ਨੇ ਹਿਮਾਚਲ ਪ੍ਰਦੇਸ਼ ਪੁਲਿਸ ਨੂੰ ਸ਼ਿਕਾਇਤ ਕੀਤੀ, ਜਿਸ ਤੋਂ ਬਾਅਦ ਸੱਤ ਸੈਲਾਨੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਅਤੇ ਤਿੰਨ ਕਾਰਾਂ ਨੂੰ ਜ਼ਬਤ ਵੀ ਕਰ ਲਿਆ ਗਿਆ। 

ਹਾਲਾਂਕਿ ਕੁਝ ਸਮੇਂ ਬਾਅਦ ਪੁਲਿਸ ਨੇ ਆਵਾਜਾਈ ਜਾਮ ਨੂੰ ਕੰਟਰੋਲ ਕਰ ਦਿੱਤਾ ਅਤੇ ਅਜਿਹੀ ਸਥਿਤੀ ਪੈਦਾ ਕਰਨ ਵਾਲੇ ਸੈਲਾਨੀਆਂ ਵਿਰੁੱਧ ਕਾਰਵਾਈ ਕੀਤੀ। ਪੁਲਿਸ ਸੁਪਰਡੈਂਟ ਕੁੱਲੂ ਗੌਰਵ ਸਿੰਘ ਨੇ ਦੱਸਿਆ ਕਿ ਹੁਣ ਤੱਕ ਇਸ ਮਾਮਲੇ 'ਚ 8 ਸੈਲਾਨੀਆਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਮਾਮਲੇ 'ਚ ਪੁਲਿਸ ਨੇ ਸੰਦੀਪ (27), ਸਿਮਰਨ ਸਿੰਘ (25), ਰਿਤਿਕ ਗੋਇਲ (20), ਹਰਪ੍ਰੀਤ ਸਿੰਘ (21), ਰਵੀਨ ਮੰਗਲ (19), ਸ਼ਿਵਮ ਸਿੰਗਲ (19), ਰਿਸ਼ਵ ਗੁਪਤਾ (19), ਰਜਨੀਸ਼ (21) ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਇਹ ਸਾਰੇ ਨਰੇਲਾ ਦਿੱਲੀ ਦੇ ਰਹਿਣ ਵਾਲੇ ਹਨ।