ਸੰਗਮ ਵਿਚ ਡੁਬਕੀ ਨਾਲ ਪਾਪ ਨਹੀਂ ਧੋਤੇ ਜਾਣੇ : ਮਾਇਆਵਤੀ
ਬਹੁਜਨ ਸਮਾਜ ਪਾਰਟੀ ਦੀ ਮੁਖੀ ਮਾਇਆਵਤੀ ਨੇ ਅੱਜ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ‘ ਤੇ ਸੱਜਰਾ ਹੱਲਾ ਬੋਲਦਿਆਂ ਕਿਹਾ ਕਿ ਉਹ ਸੰਗਮ ਵਿਚ ਜਿੰਨੀਆ ਮਰਜ਼ੀ ਡੁਬਕੀਆਂ ...
ਲਖਨਊ : ਬਹੁਜਨ ਸਮਾਜ ਪਾਰਟੀ ਦੀ ਮੁਖੀ ਮਾਇਆਵਤੀ ਨੇ ਅੱਜ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ‘ਤੇ ਸੱਜਰਾ ਹੱਲਾ ਬੋਲਦਿਆਂ ਕਿਹਾ ਕਿ ਉਹ ਸੰਗਮ ਵਿਚ ਜਿੰਨੀਆ ਮਰਜ਼ੀ ਡੁਬਕੀਆਂ ਮਾਰ ਲੈਣ ਪਰ ਇਸ ਨਾਲ ਉਨ੍ਹਾਂ ਦੇ ਪਾਪ ਨਹੀ ਧੋਤੇ ਜਾਣਗੇ। ਬਸਪਾ ਮੁਖੀ ਨੇ ਟਵੀਟ ਕਰਦਿਆਂ ਕਿਹਾ ਕਿ ਭਾਜਪਾ ਨੇ ਨੋਟਬੰਦੀ ਤੇ ਜੀਐਸਟੀ ਨਾਲ ਲੋਕਾਂ ਦਾ ਜਿਹੜਾ ਜਿਊਣਾ ਦੁਸ਼ਵਾਰ ਕੀਤਾ ਸੀ, ਉਸ ਨੂੰ ਲੋਕਾਂ ਕਦੇ ਨਹੀ ਭੁਲਣਗੇ।
ਕੇਂਦਰ ਦੀ ਪ੍ਰਧਾਨ ਮੰਤਰੀ ਕਿਸਾਨ ਨਿਧੀ ਯੋਜਨਾ ਨੂੰ ਭੰਡਦਿਆਂ ਬਸਪਾ ਸੁਪਰੀਮੋ ਨੇ ਕਿਹਾ ਕਿ 500 ਰੁਪਏ ਮਹੀਨਾ ਕਿਰਤੀਆਂ ਲਈ ਤਾਂ ਹਿਤਕਾਰੀ ਹੋ ਸਕਦਾ ਹੈ, ਪਰ ਕਿਸਾਨਾਂ ਲਈ ਨਹੀਂ ਜਿਨਾਂ ਨੇ ਆਪਣੀਆਂ ਫਸਲਾਂ ਲਈ ਲਾਹੇਵੰਦੇ ਭਾਅ ਦੀ ਦਰਕਾਰ ਹੈ। ਮੋਦੀ ਨੇ ਲੰਘੇ ਦਿਨ ਅਲਾਹਬਾਦ ਵਿਚ ਗੰਗਾ,ਯਮਨਾ ਤੇ ਸਰਸਵਤੀ ਨਦੀਆਂ ਦੇ ਸੰਗਮ ਵਾਲੀ ਥਾਂ ਡੁਬਕੀ ਲਾਉਣ ਮਗਰੋਂ ਸ਼ਫਾਈ ਕਰਮਚਾਰੀਆਂ ਨਾਲ ਮੁਲਾਕਾਤ ਕੀਤੀ ਸੀ।
ਇਸ ਦੌਰਾਨ ਬਸਪਾ ਤੇ ਸਪਾ ਨੇ ਅੱਜ ਐਲਾਨ ਕੀਤਾ ਕਿ ਦੋਵੇਂ ਪਾਰਟੀਆਂ ਮੱਧ ਪ੍ਰਦੇਸ਼ ਤੇ ਉਤਰਾਖੰਡ ਵਿਚ ਆਗਾਮੀ ਲੋਕ ਸਭਾ ਚੋਣਾਂ ਮਿਲ ਕੇ ਲੜਨਗੇ। ਇਸ ਚੋਣ ਗੱਠਜੋੜ ਤਹਿਤ ਸਮਾਜਵਾਦੀ ਪਾਰਟੀ ਜਿੱਥੇ ਮੱਧ ਪ੍ਰਦੇਸ਼ ਦੀਆਂ ਤਿੰਨ ਸੀਟਾਂ-ਬਾਲਾਘਾਟ,ਟੀਕਮਗੜ੍ਹ ਤੇ ਖਜੁਰਾਹੋਂ ਅਤੇ ਉਤਰਾਖੰਡ ਦੀ ਇਕ ਸੀਟ ਗੜਵਾਲ (ਪੋੜੀ) ਤੋਂ ਚੋਣ ਲੜੇਗੀ, ਉਥੇ ਬਸਪਾ ਬਾਕੀ ਰਹਿੰਦੀਆਂ ਸਾਰੀ ਸੀਟਾਂ ‘ਤੇ ਆਪਣੇ ਉਮੀਦਵਾਰ ਖੜ੍ਹੇ ਕਰੇਗੀ।
ਮੱਧ ਪ੍ਰਦੇਸ਼ ਦੇ ਉਤਰਾਖੰਡ ਵਿਚ ਲੋਕ ਸਭਾ ਦੀਆਂ ਕ੍ਰਮਵਾਰ 29 ਤੇ 5 ਸੀਟਾਂ ਹਨ। ਕਾਬਿਲੇਗੌਰ ਹੈ ਕਿ ਉਤਰਾਖੰਡ ਤੇ ਮੱਧਪ੍ਰਦੇਸ਼ ਵਿਚ ਚੋਣ ਗੱਠਜੋੜ ਕੀਤੇ ਜਾਣ ਤੋਂ ਪਹਿਲਾਂ ਬਸਪਾ ਤੇ ਸਪਾ ਉਤਰ ਪ੍ਰਦੇਸ਼ ਵਿਚ ਵੀ ਮਿਲ ਕੇ ਲੋਕ ਸਭਾ ਚੋਣਾਂ ਲੜਨ ਦਾ ਐਲਾਨ ਕਰ ਚੁੱਕੇ ਹਨ। -ਪੀਟੀਆਈ