IAS ਜੋੜੇ ਨੂੰ ਕੁੱਤੇ ਨੂੰ ਸਟੇਡੀਅਮ 'ਚ ਘੁਮਾਉਣਾ ਪਿਆ ਮਹਿੰਗਾ, ਦੋਵਾਂ ਦਾ ਹੋਇਆ ਤਬਾਦਲਾ

IAS couple transferred

 

ਨਵੀਂ ਦਿੱਲੀ : ਰਾਜਧਾਨੀ ਦਿੱਲੀ ਦੇ ਤਿਆਗਰਾਜ ਸਟੇਡੀਅਮ 'ਚ ਖਿਡਾਰੀਆਂ ਨੂੰ ਘਰ ਭੇਜ ਕੇ ਕੁੱਤੇ ਨੂੰ ਘੁੰਮਾਉਣ ਆਏ ਆਈਏਐਸ  ਜੋੜੇ ਦੀਆਂ ਮੁਸ਼ਕਿਲਾਂ ਵਧ ਗਈਆਂ ਹਨ।  ਐਮਐਚਏ ਨੇ ਵੀਰਵਾਰ ਦੇਰ ਰਾਤ ਆਈਏਐਸ ਸੰਜੀਵ ਖੀਰਵਾਰ ਅਤੇ ਉਨ੍ਹਾਂ ਦੀ ਪਤਨੀ ਰਿੰਕੂ ਦੁੱਗਾ ਦਾ ਤਬਾਦਲਾ ਕਰ ਦਿੱਤਾ। ਖੀਰਵਾਰ ਨੂੰ ਲੱਦਾਖ ਭੇਜਿਆ ਗਿਆ ਹੈ, ਜਦੋਂ ਕਿ ਦੁੱਗਾ ਨੂੰ ਅਰੁਣਾਚਲ ਵਿਚ ਤਾਇਨਾਤ ਕੀਤਾ ਗਿਆ ਹੈ। ਲੱਦਾਖ ਤੋਂ ਅਰੁਣਾਚਲ ਦੀ ਦੂਰੀ ਲਗਭਗ 3,100 ਕਿਲੋਮੀਟਰ ਹੈ।

 

ਸੰਜੀਵ 1994 ਬੈਚ ਦੇ ਆਈਏਐਸ ਅਧਿਕਾਰੀ ਹਨ, ਜੋ ਇਸ ਸਮੇਂ ਦਿੱਲੀ ਵਿੱਚ ਮਾਲ ਕਮਿਸ਼ਨਰ ਵਜੋਂ ਤਾਇਨਾਤ ਸਨ। ਮਾਮਲਾ ਸਾਹਮਣੇ ਆਉਣ ਤੋਂ ਬਾਅਦ ਦੇਰ ਰਾਤ ਆਈਏਐਸ ਜੋੜੇ 'ਤੇ ਕਾਰਵਾਈ ਕੀਤੀ ਗਈ। ਇਸ ਮਾਮਲੇ ਦਾ ਨੋਟਿਸ ਲੈਂਦਿਆਂ ਗ੍ਰਹਿ ਮੰਤਰਾਲੇ ਨੇ ਦਿੱਲੀ ਦੇ ਮੁੱਖ ਸਕੱਤਰ ਤੋਂ ਮਾਮਲੇ ਦੀ ਰਿਪੋਰਟ ਮੰਗੀ ਸੀ। ਮੁੱਖ ਸਕੱਤਰ ਨੇ ਆਪਣੀ ਰਿਪੋਰਟ ਮੰਤਰਾਲੇ ਨੂੰ ਸੌਂਪ ਦਿੱਤੀ, ਜਿਸ ਤੋਂ ਬਾਅਦ ਸਰਕਾਰ ਨੇ ਆਈਏਐਸ ਜੋੜੇ ਖ਼ਿਲਾਫ਼ ਕਾਰਵਾਈ ਕੀਤੀ ਹੈ।

 

 

ਭਾਰਤ ਸਰਕਾਰ ਦੇ ਅੰਡਰ ਸੈਕਟਰੀ ਰਾਕੇਸ਼ ਕੁਮਾਰ ਸਿੰਘ ਨੇ ਆਈਏਐਸ ਜੋੜੇ ਨੂੰ ਤੁਰੰਤ ਪ੍ਰਭਾਵ ਨਾਲ ਤਬਾਦਲੇ ਕੀਤੇ ਰਾਜਾਂ ਵਿੱਚ ਸ਼ਾਮਲ ਹੋਣ ਦੇ ਹੁਕਮ ਦਿੱਤੇ ਹਨ। ਸੰਜੀਵ ਖੀਰਵਾਰ ਨੇ ਪੂਰੀ ਘਟਨਾ 'ਤੇ ਸਪੱਸ਼ਟੀਕਰਨ ਦਿੱਤਾ ਹੈ। ਉਸ ਨੇ ਕਿਹਾ ਹੈ, 'ਮੇਰੇ ਕਾਰਨ ਅਭਿਆਸ ਰੋਕਣ ਦੀ ਗੱਲ ਬੇਬੁਨਿਆਦ ਹੈ।

ਮੈਂ ਆਪਣੇ ਕੁੱਤੇ ਨਾਲ ਟਰੈਕ 'ਤੇ ਘੱਟ ਹੀ ਜਾਂਦਾ ਹਾਂ। ਮੈਂ ਉਦੋਂ ਹੀ ਜਾਂਦਾ ਹਾਂ ਜਦੋਂ ਕੋਈ ਖਿਡਾਰੀ ਨਹੀਂ ਹੁੰਦਾ। ਕਦੇ ਕਿਸੇ ਖਿਡਾਰੀ ਨੂੰ ਸਟੇਡੀਅਮ ਛੱਡਣ ਲਈ ਨਹੀਂ ਕਿਹਾ। ਮੈਂ ਕੁੱਤੇ ਨੂੰ ਵੀ ਉਦੋਂ ਹੀ ਟ੍ਰੈਕ 'ਤੇ ਛੱਡਦਾ ਹਾਂ ਜਦੋਂ ਕੋਈ ਨਾ ਹੋਵੇ। ਜੇਕਰ ਇਹ ਇਤਰਾਜ਼ਯੋਗ ਹੈ ਤਾਂ ਮੈਂ ਇਸਨੂੰ ਬੰਦ ਕਰ ਦੇਵਾਂਗਾ।