ਬੱਚੇ ਨੂੰ ਲੜਕੀ ਸਾਬਤ ਕਰਨ ਲਈ ਝੋਲਾਛਾਪ ਡਾਕਟਰ ਨੇ ਬੱਚੇ ਦਾ ਗੁਪਤ ਅੰਗ ਕੱਟਿਆ

To prove child to be a girl, doctor snapped new born child 's private organs

ਚਤਰਾ (ਝਾਰਖੰਡ): ਝਾਰਖੰਡ ਦੇ ਚਤਰਾ ਜ਼ਿਲ੍ਹੇ ਦੇ ਇਕ ਹਸਪਤਾਲ ਵਿਚ ਇਕ ਝੋਲਾਛਾਪ ਡਾਕਟਰ ਨੇ ਨਵਜੰਮੇ ਬੱਚੇ ਦੇ ਗੁਪਤ ਅੰਗ ਨੂੰ ਕਥਿਤ ਤੌਰ 'ਤੇ ਕੱਟ ਦਿਤਾ ਤਾਕਿ ਉਸ ਦੀ ਅਲਟਰਾਸਾਊਂਡ ਰਿਪੋਰਟ ਦੇ ਹਿਸਾਬ ਨਾਲ ਔਰਤ ਦੇ ਗਰਭ ਵਿਚ ਲੜਕੀ ਹੋਣ ਦੀ ਗੱਲ ਸਹੀ ਸਾਬਤ ਹੋ ਸਕੇ। ਨਵਜੰਮੇ ਬੱਚੇ ਦਾ ਗੁਪਤ ਅੰਗ ਕੱਟੇ ਜਾਣ ਦੀ ਵਜ੍ਹਾ ਨਾਲ ਉਸ ਦੀ ਮੌਤ ਹੋ ਗਈ। 

ਨਵਜੰਮੇ ਬੱਚੇ ਦੇ ਪਿਤਾ ਅਨਿਲ ਪਾਂਡਾ ਮੁਤਾਬਕ ਉਨ੍ਹਾਂ ਦੀ ਪਤਨੀ ਅੱਠ ਮਹੀਨੇ ਦੀ ਗਰਭਵਤੀ ਸੀ ਅਤੇ ਮੰਗਲਵਾਰ ਰਾਤ ਦਰਦ ਹੋਣ ਤੋਂ ਬਾਅਦ ਉਸ ਨੂੰ ਇਟਖੋਰੀ ਪੁਲਿਸ ਥਾਣਾ ਖੇਤਰ ਤਹਿਤ ਆਉਣ ਵਾਲੇ ਨਰਸਿੰਗ ਹੋਮ ਲਿਆਂਦਾ ਗਿਆ। ਇਹ ਨਰਸਿੰਗ ਹੋਮ ਅਰੁਣ ਕੁਮਾਰ ਨਾਂਅ ਦਾ ਵਿਅਕਤੀ ਚਲਾਉਂਦਾ ਹੈ। ਜਾਂਚ ਤੋਂ ਬਾਅਦ ਅਰੁਣ ਕੁਮਾਰ ਨੇ ਅਨੁਜ ਕੁਮਾਰ ਵਲੋਂ ਚਲਾਏ ਜਾ ਰਹੇ ਦੂਜੇ ਹਸਪਤਾਲ ਵਿਚ ਰੈਫ਼ਰ ਕਰ ਦਿਤਾ, ਜਿੱਥੇ ਉਹ ਭਰਤੀ ਸੀ। 

 

ਜ਼ਿਲ੍ਹਾ ਸਿਵਲ ਸਰਜਨ ਐਸਪੀ ਸਿੰਘ ਨੇ ਦਸਿਆ ਕਿ ਪ੍ਰਸ਼ਾਸਨ ਨੇ ਅਰੁਣ ਕੁਮਾਰ ਅਤੇ ਅਨੁਜ ਕੁਮਾਰ ਨੂੰ ਉਨ੍ਹਾਂ ਵਲੋਂ ਗ਼ੈਰਕਾਨੂੰਨੀ ਤਰੀਕੇ ਨਾਲ ਚਲਾਏ ਜਾ ਰਹੇ ਕਲੀਨਿਕਾਂ ਨੂੰ ਬੰਦ ਕਰਨ ਦਾ ਨੋਟਿਸ ਦਿਤਾ ਹੈ। ਸਿੰਘ ਨੇ ਦਸਿਆ ਕਿ ਕਲੀਨਿਕਾਂ ਵਿਚ ਅਲਟਰਾਸਾਊਂਡ ਮਸ਼ੀਨਾਂ ਲੱਗੀਆਂ ਹੋਈਆਂ ਸਨ, ਜਿੱਥੇ ਗੁਪਤ ਤਰੀਕੇ ਨਾਲ ਲਿੰਗ ਨਿਰਧਾਰਨ ਟੈਸਟ ਕੀਤਾ ਜਾਂਦਾ ਸੀ। ਉਨ੍ਹਾਂ ਦਸਿਆ ਕਿ ਕਲੀਨਿਕਾਂ ਨੂੰ ਸੀਲ ਕਰ ਦਿਤਾ ਗਿਆ ਹੈ।