Asaduddin Owaisi: ਦਿੱਲੀ 'ਚ ਓਵੈਸੀ ਦੇ ਘਰ ਬਾਹਰ ਚਿਪਕਾਏ ਗਏ ਇਜ਼ਰਾਇਲ ਪੱਖੀ ਪੋਸਟਰ; ਸੁੱਟੀ ਗਈ ਕਾਲੀ ਸਿਆਹੀ
ਪੋਸਟਰਾਂ 'ਤੇ 'ਭਾਰਤ ਮਾਤਾ ਕੀ ਜੈ', 'ਮੈਂ ਇਜ਼ਰਾਈਲ ਦੇ ਨਾਲ ਹਾਂ' ਅਤੇ 'ਓਵੈਸੀ ਨੂੰ ਸਸਪੈਂਡ ਕੀਤਾ ਜਾਣਾ ਚਾਹੀਦਾ ਹੈ' ਵਰਗੇ ਨਾਅਰੇ ਲਿਖੇ ਹੋਏ ਸਨ।
Asaduddin Owaisi: ਪੰਜ ਲੋਕਾਂ ਦੇ ਇਕ ਸਮੂਹ ਨੇ ਵੀਰਵਾਰ ਸ਼ਾਮ ਨੂੰ ਦਿੱਲੀ ਵਿਚ ਆਲ ਇੰਡੀਆ ਮਜਲਿਸ-ਏ-ਇਤੇਹਾਦੁਲ ਮੁਸਲਿਮੀਨ (ਏਆਈਐਮਆਈਐਮ) ਦੇ ਮੁਖੀ ਅਸਦੁਦੀਨ ਓਵੈਸੀ ਦੇ ਘਰ ਦੇ ਬਾਹਰ ਪੋਸਟਰ ਚਿਪਕਾਏ, ਜਿਸ ਵਿਚ ਉਨ੍ਹਾਂ ਨੂੰ ਲੋਕ ਸਭਾ ਤੋਂ ਮੁਅੱਤਲ ਕਰਨ ਦੀ ਮੰਗ ਕੀਤੀ ਗਈ। ਅਧਿਕਾਰੀਆਂ ਨੇ ਇਹ ਜਾਣਕਾਰੀ ਦਿਤੀ।
ਇਕ ਪੁਲਿਸ ਅਧਿਕਾਰੀ ਮੁਤਾਬਕ ਮੱਧ ਦਿੱਲੀ 'ਚ 34 ਅਸ਼ੋਕ ਰੋਡ ਸਥਿਤ ਓਵੈਸੀ ਦੀ ਰਿਹਾਇਸ਼ 'ਤੇ ਚਾਰ ਤੋਂ ਪੰਜ ਲੋਕ ਪਹੁੰਚੇ ਅਤੇ ਰਾਤ ਕਰੀਬ 9 ਵਜੇ ਘਰ ਦੇ ਪ੍ਰਵੇਸ਼ ਦੁਆਰ ਅਤੇ ਕੰਧ 'ਤੇ ਤਿੰਨ ਪੋਸਟਰ ਚਿਪਕਾਏ। ਪੋਸਟਰਾਂ 'ਤੇ 'ਭਾਰਤ ਮਾਤਾ ਕੀ ਜੈ', 'ਮੈਂ ਇਜ਼ਰਾਈਲ ਦੇ ਨਾਲ ਹਾਂ' ਅਤੇ 'ਓਵੈਸੀ ਨੂੰ ਸਸਪੈਂਡ ਕੀਤਾ ਜਾਣਾ ਚਾਹੀਦਾ ਹੈ' ਵਰਗੇ ਨਾਅਰੇ ਲਿਖੇ ਹੋਏ ਸਨ।
ਇਸ ਘਟਨਾ ਦੀ ਇਕ ਕਥਿਤ ਵੀਡੀਉ ਇੰਟਰਨੈਟ 'ਤੇ ਸਾਹਮਣੇ ਆਈ ਹੈ ਜਿਸ ਵਿਚ ਇਕ ਵਿਅਕਤੀ ਨੇ ਕਿਹਾ ਕਿ ਦੇਸ਼ ਦੇ ਨੌਜਵਾਨਾਂ ਨੂੰ ਉਸ ਨੇਤਾ ਵਿਰੁਧ ਇੱਕਜੁੱਟ ਹੋ ਜਾਣਾ ਚਾਹੀਦਾ ਹੈ ਜੋ 'ਭਾਰਤ ਮਾਤਾ ਦੀ ਜੈ' ਨਹੀਂ ਬੋਲਦਾ। ਹਾਲਾਂਕਿ ਦਿੱਲੀ ਪੁਲਿਸ ਨੇ ਮੌਕੇ 'ਤੇ ਪਹੁੰਚ ਕੇ ਪੋਸਟਰ ਹਟਾ ਦਿਤੇ। ਇਕ ਅਧਿਕਾਰੀ ਨੇ ਦਸਿਆ ਕਿ ਜਿਨ੍ਹਾਂ ਲੋਕਾਂ ਨੇ ਪੋਸਟਰ ਲਗਾਏ ਸਨ, ਉਹ ਉਦੋਂ ਤਕ ਉੱਥੋਂ ਚਲੇ ਗਏ ਸਨ।
ਇਕ ਪੁਲਿਸ ਅਧਿਕਾਰੀ ਨੇ ਦਸਿਆ ਕਿ ਉਹ ਲੋਕਾਂ ਦੀ ਪਛਾਣ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ ਅਤੇ ਉਨ੍ਹਾਂ ਵਿਰੁਧ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ। ਹੋਰ ਸੰਸਦ ਮੈਂਬਰਾਂ ਨੇ ਮੰਗਲਵਾਰ ਨੂੰ ਲੋਕ ਸਭਾ ਮੈਂਬਰ ਵਜੋਂ ਸਹੁੰ ਚੁੱਕਣ ਸਮੇਂ ਓਵੈਸੀ ਦੇ "ਜੈ ਫਲਸਤੀਨ" ਕਹਿਣ 'ਤੇ ਇਤਰਾਜ਼ ਜਤਾਇਆ ਸੀ।
ਓਵੈਸੀ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ 'ਐਕਸ' 'ਤੇ ਪੋਸਟ ਕਰਦੇ ਹੋਏ ਕਿਹਾ, ''ਕੁਝ 'ਅਣਪਛਾਤੇ ਬਦਮਾਸ਼ਾਂ' ਨੇ ਅੱਜ ਮੇਰੇ ਘਰ 'ਤੇ ਕਾਲੀ ਸਿਆਹੀ ਨਾਲ ਹਮਲਾ ਕੀਤਾ। ਹੁਣ ਮੈਂ ਗਿਣਤੀ ਹੀ ਭੁੱਲ ਚੁੱਕਾ ਹਾਂ ਕਿ ਦਿੱਲੀ ਵਿਚ ਮੇਰੀ ਰਿਹਾਇਸ਼ ਨੂੰ ਕਿੰਨੀ ਵਾਰ ਨਿਸ਼ਾਨਾ ਬਣਾਇਆ ਗਿਆ ਸੀ। ਜਦੋਂ ਮੈਂ ਦਿੱਲੀ ਪੁਲਿਸ ਦੇ ਅਧਿਕਾਰੀਆਂ ਨੂੰ ਪੁੱਛਿਆ ਕਿ ਇਹ ਸੱਭ ਉਨ੍ਹਾਂ ਦੇ ਨੱਕ ਹੇਠ ਕਿਵੇਂ ਹੋ ਰਿਹਾ ਹੈ, ਤਾਂ ਉਹ ਬੇਵੱਸ ਹੋ ਕੇ ਖੜ੍ਹੇ ਰਹੇ”।
ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਅਤੇ ਲੋਕ ਸਭਾ ਸਪੀਕਰ ਓਮ ਬਿਰਲਾ ਨੂੰ ਅਪਣੀ ਪੋਸਟ ਵਿਚ ਟੈਗ ਕਰਦੇ ਹੋਏ ਓਵੈਸੀ ਨੇ ਕਿਹਾ, “ਇਹ ਤੁਹਾਡੀ ਮੌਜੂਦਗੀ ਵਿਚ ਹੋ ਰਿਹਾ ਹੈ। ਕਿਰਪਾ ਕਰਕੇ ਸਾਨੂੰ ਦੱਸੋ ਕਿ ਸੰਸਦ ਮੈਂਬਰਾਂ ਦੀ ਸੁਰੱਖਿਆ ਦੀ ਗਰੰਟੀ ਹੋਵੇਗੀ ਜਾਂ ਨਹੀਂ”।
ਉਨ੍ਹਾਂ ਅੱਗੇ ਲਿਖਿਆ, “ਮੈਂ ਦੋ ਪੈਸੇ ਦੇ ਗੁੰਡਿਆਂ ਨੂੰ ਕਹਿਣਾ ਚਾਹੁੰਦਾ ਹਾਂ ਜੋ ਮੇਰੇ ਘਰ ਨੂੰ ਨਿਸ਼ਾਨਾ ਬਣਾਉਂਦੇ ਹਨ: ਮੈਂ ਇਸ ਤੋਂ ਡਰਦਾ ਨਹੀਂ ਹਾਂ। ਸਾਵਰਕਰ ਵਰਗੀਆਂ ਕਾਇਰਤਾ ਭਰੀਆਂ ਕਾਰਵਾਈਆਂ ਬੰਦ ਕਰੋ ਅਤੇ ਮੇਰਾ ਸਾਹਮਣਾ ਕਰਨ ਲਈ ਹਿੰਮਤ ਜੁਟਾਓ। ਸਿਆਹੀ ਸੁੱਟ ਕੇ ਜਾਂ ਪੱਥਰ ਸੁੱਟ ਕੇ ਭੱਜੋ ਨਾ”।
(For more Punjabi news apart from Asaduddin Owaisi Alleges His Delhi Residence Vandalised, stay tuned to Rozana Spokesman)