ਡਾ. ਆਸ਼ਟ ਵਲੋਂ 'ਬਾਲ ਮਨ ਲਿਖਣ ਦੀਆਂ ਚੁਨੌਤੀਆਂ' ਵਿਸ਼ੇ 'ਤੇ ਪੇਪਰ ਪੇਸ਼

ਨਵੀਂ ਦਿੱਲੀ, 4 ਅਗੱਸਤ (ਸੁਖਰਾਜ ਸਿੰਘ): ਪੰਜਾਬੀ ਯੂਨੀਵਰਸਟੀ ਪਟਿਆਲਾ ਵਿਖੇ ਕਾਰਜਸ਼ੀਲ ਸਾਹਿਤ ਅਕਾਦਮੀ ਅਵਾਰਡੀ ਅਤੇ ਸ਼੍ਰੋਮਣੀ ਪੰਜਾਬੀ ਬਾਲ ਸਾਹਿਤ ਲੇਖਕ ਡਾ. ਦਰਸ਼ਨ ਸਿੰਘ ਆਸ਼ਟ ਵਲੋਂ ਨੈਸ਼ਨਲ ਬੁੱਕ ਟਰੱਸਟ ਇੰਡੀਆ, ਨਵੀਂ ਦਿੱਲੀ ਵਲੋਂ ਮੈਕਸਮੂਲਰ ਰੋਡ 'ਤੇ ਸਥਿਤ ਇੰਡੀਆ ਇੰਟਰਨੈਸ਼ਨਲ ਸੈਂਟਰ ਵਿਖੇ ਬੀਤੇ ਦਿਨੀਂ ਕਰਵਾਏ ਦੋ ਰੋਜ਼ਾ ਕੌਮੀ ਸੈਮੀਨਾਰ ਦੇ ਵਿਸ਼ੇਸ਼ ਸੈਸ਼ਨ 'ਬਾਲ ਮਨ ਲਿਖਣ ਦੀਆਂ ਚੁਨੌਤੀਆਂ' ਵਿਸ਼ੇ 'ਤੇ ਅਪਣਾ ਖੋਜ ਪੇਪਰ ਪੇਸ਼ ਕੀਤਾ ਗਿਆ।
ਡਾ. ਆਸ਼ਟ ਨੇ ਅਪਣੇ ਪਰਚੇ ਵਿਚ ਮੁੱਲਵਾਨ ਨੁਕਤੇ ਸਾਂਝੇ ਕਰਦਿਆਂ ਕਿਹਾ ਕਿ ਬੱਚਿਆਂ ਵਿਚ ਆਪਣੇ ਦੇਸ਼ ਕੌਮ, ਭਾਸ਼ਾ, ਵਿਰਾਸਤ ਅਤੇ ਸੱਭਿਆਚਾਰ ਪ੍ਰਤੀ ਸਨੇਹ ਅਤੇ ਜ਼ਿੰਮੇਵਾਰੀ ਦਾ ਅਹਿਸਾਸ ਪੈਦਾ ਕਰਨ ਲਈ ਉਸ ਨੂੰ ਚੰਗਾ ਸਾਹਿਤ ਮੁਹਈਆ ਕਰਵਾਉਣਾ ਚਾਹੀਦਾ ਹੈ। ਡਾ. ਆਸ਼ਟ ਦੀ ਧਾਰਣਾ ਸੀ ਕਿ ਭਾਰਤ ਵਿਚ ਹੋਰਨਾਂ ਖੇਤਰੀ ਜ਼ੁਬਾਨਾਂ ਦੇ ਨਾਲ-ਨਾਲ ਪੰਜਾਬੀ ਵਿਚ ਲਿਖਿਆ ਗਿਆ ਸਾਹਿਤ ਜਦੋਂ ਤਕ ਬੱਚਿਆਂ ਦੇ ਹੱਥਾਂ ਤਕ ਨਹੀਂ ਪਹੁੰਚੇਗਾ, ਬੱਚੇ ਪੱਛਮੀ ਸਭਿਆਚਾਰ ਪਿੱਛੇ ਲੱਗ ਕੇ ਅਪਣੇ ਵਿਰਸੇ ਨੂੰ ਗੁਆ ਸਕਦੇ ਹਨ। ਇਸ ਲਈ ਮਿਆਰੀ ਬਾਲ ਸਾਹਿਤ ਬੱਚੇ ਦਾ ਸਹੀ ਮਾਰਗ ਦਰਸ਼ਕ ਬਣ ਸਕਦਾ ਹੈ। ਸੋ ਇਸ ਦਿਸ਼ਾ ਵਿਚ ਮਾਤ ਭਾਸ਼ਾ ਅਤੇ ਸਾਹਿਤ ਪ੍ਰਤੀ ਚੇਤਨਾ ਪੈਦਾ ਕਰਨ ਲਈ ਉਸਾਰੂ ਹੰਭਲੇ ਮਾਰਨੇ ਚਾਹੀਦੇ ਹਨ। ਇਸ ਦੌਰਾਨ ਵੱਖ-ਵੱਖ ਸੈਸ਼ਨਾਂ ਵਿਚ ਵੀ ਭਾਰਤੀ ਸਾਹਿਤ ਵਿਚ ਰਾਸ਼ਟਰਵਾਦ ਬਾਰੇ ਚਰਚਾ ਕੀਤੀ ਗਈ।
ਇਸ ਸਮਾਗਮ ਵਿਚ ਗੋਆ ਦੇ ਰਾਜਪਾਲ ਮ੍ਰਿਦਲਾ ਸਿਨਹਾ, ਕੇਂਦਰੀ ਯੂਨੀਵਰਸਿਟੀ, ਧਰਮਸ਼ਾਲਾ (ਹਿਮਾਚਲ ਪ੍ਰਦੇਸ) ਦੇ ਵਾਈਸ ਚਾਂਸਲਰ ਡਾ. ਕੁਲਦੀਪ ਚੰਦ ਅਗਨੀਹੋਤਰੀ, ਟਰੱਸਟ ਦੀ ਡਾਇਰੈਕਟਰ ਡਾ. ਰੀਤਾ ਚੌਧਰੀ ਮੁਖੀ ਬਲਦੇਵ ਭਾਈ ਸ਼ਰਮਾ ਆਦਿ ਮੌਜੂਦ ਸਨ।