ਸਪਾਈਸ ਜੈੱਟ ਪਾਇਲਟਾਂ ਨੂੰ ਨਹੀਂ ਦੇਵੇਗੀ ਅਪ੍ਰੈਲ-ਮਈ ਦੀ ਤਨਖ਼ਾਹ

ਨਵੀਂ ਦਿੱਲੀ, 29 ਅਪ੍ਰੈਲ: ਨਿਜੀ ਜਹਾਜ਼ ਕੰਪਨੀ ਸਪਾਈਸਜੈੱਟ ਨੇ ਅਪਣੇ ਪਾਇਲਟਾਂ ਨੂੰ ਬੁਧਵਾਰ ਨੂੰ ਸੂਚਨਾ ਦਿਤੀ ਕਿ ਅਪ੍ਰੈਲ-ਮਈ ਲਈ ਉਨ੍ਹਾਂ ਨੂੰ ਕੋਈ ਤਨਖ਼ਾਹ ਨਹੀਂ ਮਿਲੇਗੀ। ਜਦਕਿ ਕਾਰਗੋ ਜਹਾਜ਼ਾਂ ਨੂੰ ਆਪਰੇਟ ਕਰ ਰਹੇ ਪਾਇਲਟਾਂ ਨੂੰ ਵੀ ਉਡਾਣ ਦੇ ਘੰਟਿਆਂ ਦੇ ਆਧਾਰ 'ਤੇ ਭੁਗਤਾਨ ਕੀਤਾ ਜਾਵੇਗਾ। ਕੰਪਨੀ ਦੇ ਮੁੱਖ ਜਹਾਜ਼ ਆਪਰੇਟਿੰਗ ਅਧਿਕਾਰੀ ਗੁਰਚਰਨ ਅਰੋੜਾ ਨੇ ਪਾਇਲਟਾਂ ਨੂੰ ਈ-ਮੇਲ ਕਰ ਕੇ ਇਹ ਜਾਣਕਾਰੀ ਦਿਤੀ।

ਉਨ੍ਹਾਂ ਨੇ ਲਿਖਿਆ ਕਿ ਮੌਜੂਦਾ ਸਮੇਂ ਵਿਚ ਸਾਡੇ 16 ਫ਼ੀ ਸਦੀ ਅਤੇ 20 ਫ਼ੀ ਸਦੀ ਪਾਇਲਟ ਹੀ ਉਡਾਣ ਭਰ ਰਹੇ ਹਨ। ਉਨ੍ਹਾਂ ਕਿਹਾ, “ਅਸੀਂ ਅਪਣੇ ਪੰਜ ਕਾਰਗੋ ਜਹਾਜ਼ਾਂ ਅਤੇ ਯਾਤਰੀ ਜਹਾਜ਼ਾਂ ਤੋਂ ਮਾਲ ਢੁਆਈ (ਕਾਰਗੋ ਆਨ ਸੀਟ) ਕਰ ਕੇ ਇਹ ਉਡਾਣਾਂ ਭਰ ਰਹੇ ਹਾਂ।'' ਸਪਾਈਸ ਜੈੱਟ ਦੇ ਬੇੜੇ ਵਿਚ 116 ਯਾਤਰੀ ਜਹਾਜ਼ ਅਤੇ ਪੰਜ ਕਾਰਗੋ ਜਹਾਜ਼ ਸ਼ਾਮਲ ਹਨ। ਕੋਰੋਨਾ ਵਾਇਰਸ ਨੂੰ ਫੈਲਣ ਤੋਂ ਰੋਕਣ ਲਈ ਦੇਸ਼ ਭਰ ਵਿਚ 25 ਮਾਰਚ ਤੋਂ ਤਾਲਾਬੰਦੀ ਹੈ, ਜਿਸ ਕਰ ਕੇ ਸਾਰੇ ਵਪਾਰਕ ਯਾਤਰੀ ਜਹਾਜ਼ਾਂ ਦੇ ਉਡਾਣ ਭਰਨ 'ਤੇ ਰੋਕ ਹੈ।

ਅਰੋੜਾ ਨੇ ਇਹ ਵੀ ਕਿਹਾ ਕਿ ਪਾਇਲਟਾਂ ਨੂੰ ਅਪ੍ਰੈਲ-ਮਈ 2020 ਲਈ ਕੋਈ ਤਨਖ਼ਾਹ ਨਹੀਂ ਮਿਲੇਗੀ ਅਤੇ ਜੋ ਪਾਇਲਟ ਕਾਰਗੋ ਜਹਾਜ਼ਾਂ ਦੀ ਉਡਾਣ ਭਰ ਰਹੇ ਹਨ, ਉਨ੍ਹਾਂ ਨੂੰ ਉਡਾਣ ਦੇ ਘੰਟਿਆਂ ਦੇ ਹਿਸਾਬ ਨਾਲ ਤਨਖ਼ਾਹ ਮਿਲੇਗੀ। ਉਨ੍ਹਾਂ ਕਿਹਾ ਕਿ ਆਉਣ ਵਾਲੇ ਹਫ਼ਤਿਆਂ ਵਿਚ ਉਹ ਅਪਣੇ ਜਹਾਜ਼ਾਂ ਦੀ ਆਪਰੇਟਿੰਗ 50 ਫ਼ੀ ਸਦੀ ਤਕ ਅਤੇ ਉਡਾਣ ਭਰਨ ਵਾਲੇ ਪਾਇਲਟਾਂ ਦੀ ਗਿਣਤੀ 100 ਫ਼ੀ ਸਦੀ ਤਕ ਕਰਾਂਗੇ। (ਪੀਟੀਆਈ)