ਭਾਰਤ ਨੇ ਪੁਲਾੜ ਦੇ ਖੇਤਰ ਵਿਚ ਇਕ ਨਵਾਂ ਇਤਿਹਾਸ ਲਿਖਿਆ ਹੈ। ਭਾਰਤੀ ਪੁਲਾੜ ਖੋਜ ਸੰਗਠਨ (ਇਸਰੋ) ਨੇ ਐਤਵਾਰ ਯਾਨੀ ਅੱਜ ਇਕੋ ਸਮੇਂ 7 ਉਪਗ੍ਰਹਿ ਲਾਂਚ ਕੀਤੇ ਹਨ। ਇਨ੍ਹਾਂ ਵਿਚ 1 ਸਵਦੇਸ਼ੀ ਅਤੇ ਸਿੰਗਾਪੁਰ ਦੇ ਛੇ ਉਪਗ੍ਰਹਿ ਸ਼ਾਮਲ ਹਨ। ਇਨ੍ਹਾਂ ਉਪਗ੍ਰਹਿਆਂ ਨੂੰ ਆਂਧਰਾ ਪ੍ਰਦੇਸ਼ ਦੇ ਸ੍ਰੀਹਰੀਕੋਟਾ ਤੋਂ ਪੀਐਸਐਲ-ਸੀ56 ਰਾਕੇਟ ਰਾਹੀਂ ਲਾਂਚ ਕੀਤਾ ਗਿਆ ਸੀ। PSLV-C56 ਨਿਊ ਸਪੇਸ ਇੰਡੀਆ ਲਿਮਟਿਡ ਦਾ ਮਿਸ਼ਨ ਹੈ, ਜੋ ਕਿ ਇਸਰੋ ਦੀ ਵਪਾਰਕ ਸ਼ਾਖਾ ਹੈ।
ਇਹ ਵੀ ਪੜ੍ਹੋ: ਖੰਨਾ ਵਿਖੇ ਵਾਪਰੇ ਸੜਕ ਹਾਦਸੇ ਨੇ ਲਈ ਨੌਜੁਆਨ ਦੀ ਜਾਨ
PSLV-C56 ਰਾਕੇਟ ਨੇ ਸਿੰਗਾਪੁਰ ਦੇ ਧਰਤੀ ਨਿਰੀਖਣ ਉਪਗ੍ਰਹਿ DS-SAR ਅਤੇ 6 ਹੋਰ ਉਪਗ੍ਰਹਿਆਂ ਨੂੰ ਲੈ ਕੇ ਐਤਵਾਰ ਸਵੇਰੇ 6.30 ਵਜੇ ਉਡਾਣ ਭਰੀ। ਇਸ ਮਹੀਨੇ ਬਹੁਤ ਉਡੀਕੇ ਜਾ ਰਹੇ ਚੰਦਰਯਾਨ-3 ਨੂੰ ਲਾਂਚ ਕਰਨ ਤੋਂ ਬਾਅਦ, ਹੁਣ ਇਕ ਮਹੀਨੇ ਦੇ ਅੰਦਰ PSLV-C56 ਲਾਂਚ ਇਸਰੋ ਦੀ ਇਕ ਹੋਰ ਵੱਡੀ ਪ੍ਰਾਪਤੀ ਹੈ। ਇਸ ਤੋਂ ਪਹਿਲਾਂ 14 ਜੁਲਾਈ ਨੂੰ, ਇਸਰੋ ਨੇ ਸ੍ਰੀਹਰੀਕੋਟਾ ਦੇ ਸਤੀਸ਼ ਧਵਨ ਪੁਲਾੜ ਕੇਂਦਰ ਤੋਂ LVM-3 ਲਾਂਚ ਵਾਹਨ ਨੂੰ ਸਫਲਤਾਪੂਰਵਕ ਆਰਬਿਟ ਵਿਚ ਰੱਖਿਆ ਸੀ।
ਇਸ ਸਾਲ ਭਾਰਤੀ ਪੁਲਾੜ ਏਜੰਸੀ ਦਾ ਇਹ ਤੀਜਾ ਵਪਾਰਕ ਮਿਸ਼ਨ ਹੈ। ਇਸਰੋ ਨੇ ਇਸ ਤੋਂ ਪਹਿਲਾਂ ਮਾਰਚ ਵਿਚ ਐਲ.ਵੀ.ਐਮ.-3 ਰਾਕੇਟ ਨਾਲ ਬ੍ਰਿਟੇਨ ਦੇ ਵਨ-ਵੇਵ ਨਾਲ ਜੁੜੇ 36 ਉਪਗ੍ਰਹਿ ਲਾਂਚ ਕੀਤੇ ਸਨ। ਇਸ ਤੋਂ ਬਾਅਦ ਅਪ੍ਰੈਲ ਵਿਚ ਪੀ.ਐਸ.ਐਲ.ਵੀ. ਰਾਕੇਟ ਤੋਂ ਸਿੰਗਾਪੁਰ ਦੇ 2 ਉਪਗ੍ਰਹਿ ਲਾਂਚ ਕੀਤੇ ਗਏ ਸਨ। DS-SAR ਨੂੰ ਸਿੰਗਾਪੁਰ ਦੀ ਰੱਖਿਆ ਵਿਗਿਆਨ ਅਤੇ ਤਕਨਾਲੋਜੀ ਏਜੰਸੀ ਅਤੇ ਸਿੰਗਾਪੁਰ ਦੀ ST ਇੰਜੀਨੀਅਰਿੰਗ ਵਿਚਕਾਰ ਸਾਂਝੇਦਾਰੀ ਦੇ ਤਹਿਤ ਵਿਕਸਿਤ ਕੀਤਾ ਗਿਆ ਹੈ।
ਇਹ ਵੀ ਪੜ੍ਹੋ: ਪੰਜਾਬ, ਹਰਿਆਣਾ ਅਤੇ ਚੰਡੀਗੜ੍ਹ 'ਚ ਭਾਰੀ ਬਾਰਸ਼ ਦੀ ਚੇਤਾਵਨੀ
ਲਾਂਚ ਤੋਂ ਬਾਅਦ, ਇਸ ਸੈਟੇਲਾਈਟ ਦੀ ਵਰਤੋਂ ਸਿੰਗਾਪੁਰ ਸਰਕਾਰ ਦੀਆਂ ਵੱਖ-ਵੱਖ ਏਜੰਸੀਆਂ ਦੀਆਂ ਸੈਟੇਲਾਈਟ ਇਮੇਜਿੰਗ ਲੋੜਾਂ ਲਈ ਕੀਤੀ ਜਾਵੇਗੀ। DS-SAR ਇਜ਼ਰਾਈਲ ਏਰੋਸਪੇਸ ਇੰਡਸਟਰੀਜ਼ ਤੋਂ ਵਿਕਸਤ ਸਿੰਥੈਟਿਕ ਅਪਰਚਰ ਰਡਾਰ (SAR) ਨਾਲ ਫਿੱਟ ਹੈ। ਇਹ ਸੈਟੇਲਾਈਟ ਨੂੰ ਹਰ ਮੌਸਮ ਵਿਚ ਦਿਨ ਅਤੇ ਰਾਤ ਦੀਆਂ ਤਸਵੀਰਾਂ ਲੈਣ ਦੇ ਯੋਗ ਬਣਾਵੇਗਾ।
ਇਹ ਇਸਰੋ ਦੇ ਭਰੋਸੇਯੋਗ ਰਾਕੇਟ ਪੀ.ਐਸ.ਐਲ.ਵੀ. ਦੀ 58ਵੀਂ ਉਡਾਣ ਸੀ ਅਤੇ 'ਕੋਰ ਅਲੋਨ ਕੰਫਿਗਰੇਸ਼ਨ' ਵਾਲੀ 17ਵੀਂ ਉਡਾਣ ਸੀ। ਪੀ.ਐਸ.ਐਲ.ਵੀ. ਰਾਕੇਟ ਨੂੰ ਇਸਰੋ ਦਾ ਵਰਕ ਹਾਰਸ ਕਿਹਾ ਜਾਂਦਾ ਹੈ। ਇਹ ਵਿਸ਼ਾਲ ਰਾਕੇਟ ਧਰਤੀ ਦੇ ਹੇਠਲੇ ਪੰਧ ਵਿਚ ਗ੍ਰਹਿਆਂ ਨੂੰ ਸਫਲਤਾਪੂਰਵਕ ਸਥਾਪਤ ਕਰ ਰਿਹਾ ਹੈ।