ਰਾਜਸਥਾਨ ਦੇ ਸਕੂਲਾਂ ’ਚ 6 ਦਸੰਬਰ ਨੂੰ ‘ਸ਼ੌਰਿਆ ਦਿਵਸ’ ਮਨਾਉਣ ਦਾ ਹੁਕਮ, ਆਲੋਚਨਾ ਮਗਰੋਂ ਰੱਦ 

ਸਿੱਖਿਆ ਮੰਤਰੀ ਮਦਨ ਦਿਲਾਵਰ ਨੇ ਕਿਹਾ ਕਿ ਇਮਤਿਹਾਨ ਚੱਲ ਰਹੇ ਹਨ ਇਸ ਲਈ ਕੈਂਪਸ ਵਿਚ ਕੋਈ ਹੋਰ ਗਤੀਵਿਧੀਆਂ ਜਾਂ ਸਮਾਗਮ ਕਰਵਾਉਣਾ ਸੰਭਵ ਨਹੀਂ ਹੈ।

ਜੈਪੁਰ : ਰਾਜਸਥਾਨ ਦੇ ਸਾਰੇ ਸਕੂਲਾਂ ਨੂੰ 6 ਦਸੰਬਰ ਨੂੰ ‘ਸ਼ੌਰਿਆ ਦਿਵਸ’ ਮਨਾਉਣ ਦਾ ਵਿਵਾਦਪੂਰਨ ਹੁਕਮ ਸਰਕਾਰ ਨੇ ਐਤਵਾਰ ਨੂੰ ਵਾਪਸ ਲੈ ਲਿਆ। ਇਸ ਦਿਨ 1992 ’ਚ ਬਾਬਰੀ ਮਸਜਿਦ ਢਾਹੀ ਗਈ ਸੀ। 

ਜਦੋਂ ਇਹ ਹੁਕਮ ਵਾਪਸ ਲਿਆ ਗਿਆ, ਸਕੂਲ ਸਿੱਖਿਆ ਮੰਤਰੀ ਮਦਨ ਦਿਲਾਵਰ ਅਤੇ ਸੈਕੰਡਰੀ ਬੋਰਡ ਸਿੱਖਿਆ ਦੇ ਡਾਇਰੈਕਟਰ ਸੀਤਾਰਾਮ ਜਾਟ ਦੇ ਬਿਆਨਾਂ ਵਿਚ ਇਕ ਵਿਰੋਧਾਭਾਸ ਸਾਹਮਣੇ ਆਇਆ। ਦਿਲਾਵਰ ਨੇ ਕਿਹਾ ਕਿ ਇਮਤਿਹਾਨ ਚੱਲ ਰਹੇ ਹਨ ਇਸ ਲਈ ਕੈਂਪਸ ਵਿਚ ਕੋਈ ਹੋਰ ਗਤੀਵਿਧੀਆਂ ਜਾਂ ਸਮਾਗਮ ਕਰਵਾਉਣਾ ਸੰਭਵ ਨਹੀਂ ਹੈ, ਜਦੋਂਕਿ ਜਾਟ ਨੇ ਕਿਹਾ ਕਿ ਉਨ੍ਹਾਂ ਵਲੋਂ ਅਜਿਹਾ ਕੋਈ ਹੁਕਮ ਜਾਰੀ ਨਹੀਂ ਕੀਤਾ ਗਿਆ ਹੈ। 

ਸਨਿਚਰਵਾਰ ਰਾਤ ਨੂੰ ਇਕ ਅਧਿਕਾਰਤ ਵਟਸਐਪ ਸਮੂਹ ਉਤੇ ਜਾਰੀ ਕੀਤੇ ਗਏ ਹੁਕਮ ਨੂੰ ਐਤਵਾਰ ਸਵੇਰੇ ‘ਨਾਟਾਲਣਯੋਗ ਹਾਲਾਤ’ ਦਾ ਹਵਾਲਾ ਦਿੰਦੇ ਹੋਏ ਵਾਪਸ ਲਿਆ ਗਿਆ। ਵਿਭਾਗ ਮੁਤਾਬਕ ਸਕੂਲਾਂ ’ਚ 5 ਦਸੰਬਰ ਅਤੇ 6 ਦਸੰਬਰ ਨੂੰ ਇਮਤਿਹਾਨ ਹੋਣਗੇ। 

ਸੀਤਾਰਾਮ ਜਾਟ ਨੇ ਕਿਹਾ, ‘‘ਸਕੂਲਾਂ ਨੂੰ ਅਜਿਹੇ ਕੋਈ ਹੁਕਮ ਜਾਰੀ ਨਹੀਂ ਕੀਤੇ ਗਏ ਹਨ। ਮੈਨੂੰ ਨਹੀਂ ਪਤਾ ਕਿ ਇਹ ਕਿਵੇਂ ਪ੍ਰਸਾਰਿਤ ਕੀਤਾ ਜਾ ਰਿਹਾ ਹੈ।’’ ਉਨ੍ਹਾਂ ਇਹ ਵੀ ਕਿਹਾ ਕਿ ਇਸ ਤੋਂ ਪਹਿਲਾਂ ਵੀ ਇਸੇ ਮਾਮਲੇ ਵਿਚ ਸੋਸ਼ਲ ਮੀਡੀਆ ਉਤੇ ਇਕ ਹੁਕਮ ਪ੍ਰਸਾਰਿਤ ਹੋਇਆ ਸੀ ਅਤੇ ਵਿਭਾਗ ਨੇ 5 ਨਵੰਬਰ ਨੂੰ ਇਸ ਨੂੰ ਰੱਦ ਕਰ ਦਿਤਾ ਸੀ।