file photo

ਨਵੀਂ ਦਿੱਲੀ : ਭਾਰੀ ਕਰਜ਼ ਹੇਠ ਦੱਬੀ ਸਰਕਾਰੀ ਮਾਲਕੀ ਵਾਲੀ ਹਵਾਬਾਜ਼ੀ ਕੰਪਨੀ ਏਅਰ ਇੰਡੀਆ ਦੀਆਂ ਵਿੱਤੀ ਮੁਸ਼ਕਲਾਂ ਘਟਣ ਦੇ ਅਸਾਰ ਮੱਧਮ ਹੁੰਦੇ ਜਾ ਰਹੇ ਹਨ। ਹੁਣ ਹਾਲਾਤ ਅਜਿਹੇ ਬਣਦੇ ਜਾ ਰਹੇ ਹਨ ਕਿ ਕੰਪਨੀ ਨੂੰ ਚੱਲਦਾ ਰੱਖਣਾ ਨਾਮੁਮਕਿਨ ਬਣ ਗਿਆ ਹੈ। ਕੰਪਨੀ ਦੇ ਮੌਜੂਦਾ ਵਿੱਤੀ ਹਾਲਾਤਾਂ ਬਾਰੇ ਸ਼ਹਿਰੀ ਸਿਵਲ ਹਵਾਬਾਜ਼ੀ ਮੰਤਰੀ ਹਰਦੀਪ ਸਿੰਘ ਪੁਰੀ ਦਾ ਕਹਿਣਾ ਹੈ ਕਿ ਏਅਰ ਇੰਡੀਆ ਨੂੰ ਵੇਚਣ ਦੀ ਪ੍ਰਕਿਰਿਆ ਚੱਲ ਰਹੀ ਹੈ। ਕੰਪਨੀ ਨੂੰ ਨਿੱਜੀ ਹੱਥਾਂ 'ਚ ਦੇਣ ਤੋਂ ਇਲਾਵਾ ਹੁਣ ਕੋਈ ਰਸਤਾ ਨਹੀਂ ਬਚਿਆ। ਕਿਉਂਕਿ ਕੰਪਨੀ ਸਿਰ ਬਹੁਤ ਜ਼ਿਆਦਾ ਕਰਜ਼ਾ ਹੋਣ ਕਾਰਨ ਹੁਣ ਟੈਕਸਦਾਤਿਆਂ ਦੇ ਪੈਸੇ ਦੇ ਸਹੀ ਇਸਤੇਮਾਲ ਦਾ ਸੰਕਟ ਖੜ੍ਹਾ ਹੋ ਗਿਆ ਹੈ।

ਦੱਸ ਦਈਏ ਕਿ ਸੰਸਦ ਦੇ ਸਰਦ ਰੁੱਤ ਸੈਸ਼ਨ ਦੌਰਾਨ ਸਰਕਾਰ ਨੇ ਸਾਫ਼ ਕਰ ਦਿਤਾ ਸੀ ਕਿ ਵਿੱਤੀ ਸੰਕਟ ਨਾਲ ਜੂਝ ਰਹੀ ਏਅਰ ਇੰਡੀਆ ਨੂੰ ਕੋਈ ਖ਼ਰੀਦਦਾਰ ਨਾ ਮਿਲਣ ਦੀ ਸੂਰਤ 'ਚ ਇਸ ਨੂੰ ਬੰਦ ਕਰਨਾ ਪੈ ਸਕਦਾ ਹੈ। ਕੰਪਨੀ ਹੁਣ ਅਜਿਹੀ ਹਾਲਤ 'ਚ ਪਹੁੰਚ ਚੁੱਕੀ ਹੈ ਕਿ ਇਸ ਨੂੰ ਛੋਟੇ ਛੋਟੇ ਵਿੱਤੀ ਠੁੰਮਣਿਆਂ ਸਹਾਰੇ ਚੱਲਦਾ ਰੱਖਣਾ ਮੁਮਕਿਨ ਨਹੀਂ ਜਾਪ ਰਿਹਾ।

ਹਰਦੀਪ ਸਿੰਘ ਪੁਰੀ ਦਾ ਕਹਿਣਾ ਹੈ ਕਿ ਏਅਰ ਇੰਡੀਆ ਇਕ ਕੌਮੀ ਪ੍ਰਾਪਰਟੀ ਹੈ। ਇਹ ਮਹਾਰਾਜਾ ਬਰਾਡ ਦੇ ਤੌਰ 'ਤੇ ਦੁਨੀਆ ਭਰ 'ਚ ਜਾਣੀ ਜਾਂਦੀ ਹੈ। ਇਸ ਦਾ ਸੇਫ਼ਟੀ ਰਿਕਾਰਡ ਤੇ ਰੇਪੂਟੇਸ਼ਨ ਬਹੁਤ ਵਧੀਆ ਹੈ। ਪਰ ਹੁਣ ਏਅਰ ਇੰਡੀਆ ਬਹੁਤ ਜ਼ਿਆਦਾ ਕਰਜ਼ੇ ਦੀ ਮਾਰ ਹੇਠ ਆ ਚੁੱਕੀ ਹੈ ਜਿਸ ਕਾਰਨ ਇਸ ਨੂੰ ਚੱਲਦਾ ਰੱਖਣਾ ਮੁਸ਼ਕਲ ਹੁੰਦਾ ਜਾ ਰਿਹਾ ਹੈ।

ਵਿੱਤੀ ਹਾਲਾਤਾਂ ਦੇ ਮੱਦੇਨਜ਼ਰ ਹੁਣ ਇਸ ਦਾ ਨਿੱਜੀਕਰਣ ਕਰਨ ਤੋਂ ਇਲਾਵਾ ਕੋਈ ਰਸਤਾ ਨਹੀਂ ਬਚਿਆ। 2 ਸਾਲ ਪਹਿਲਾਂ ਇਸ ਸਬੰਧੀ ਕਦਮ ਚੁੱਕੇ ਗਏ ਸਨ। ਭਾਵੇਂ ਇਸ 'ਚ ਸਫ਼ਲਤਾ ਨਹੀਂ ਮਿਲੀ, ਫਿਰ ਵੀ ਪਿਛਲੇ ਤਜਰਬੇ ਤੋਂ ਸੇਧ ਲੈਂਦਿਆਂ ਲੋੜੀਂਦੇ ਕਦਮ ਚੁੱਕੇ ਜਾ ਰਹੇ ਹਨ।

ਉਨ੍ਹਾਂ ਕਿਹਾ ਕਿ ਈਓਆਈ ਜਾਰੀ ਕਰਨ ਤੋਂ ਬਾਅਦ ਇਸ ਲਈ ਖ਼ਰੀਦਦਾਰ ਦੀ ਤਲਾਸ਼ ਕੀਤੀ ਜਾਵੇਗੀ। ਅਸੀਂ ਚਾਹੁੰਦੇ ਹਾਂ ਕਿ ਇਸ ਨੂੰ ਕੋਈ ਸਵਦੇਸ਼ੀ ਕੰਪਨੀ ਹੀ ਖਰੀਦੇ। ਫਿਰ ਵੀ ਏਅਰ ਇੰਡੀਆ ਦੇ ਨਿਜੀਕਰਣ ਦੀ ਪ੍ਰਕਿਰਿਆ ਜਾਰੀ ਹੈ। ਹਾਲ ਦੀ ਘੜੀ ਇਸ ਦੇ ਨਿੱਜੀਕਰਣ ਦੀ ਸਮਾਂ ਸੀਮਾ ਤਹਿ ਕਰਨਾ ਮੁਸ਼ਕਲ ਹੈ।