ਨਵੀਂ ਦਿੱਲੀ, 1 ਮਾਰਚ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਅੱਜ ਜਾਰਡਨ ਦੇ ਸ਼ਾਹ ਅਬਦੁੱਲਾ (ਦੂਜੇ) ਨਾਲ ਅਹਿਮ ਦੁਵੱਲੇ ਅਤੇ ਖੇਤਰੀ ਮੁੱਦਿਆਂ 'ਤੇ ਚਰਚਾ ਕੀਤੀ ਅਤੇ ਦੋਹਾਂ ਧਿਰਾਂ ਨੇ ਰਖਿਆ, ਅਤਿਵਾਦ ਵਿਰੁਧ ਸਹਿਯੋਗ, ਸਰਹੱਦੀ ਕਰ ਦੇ ਖੇਤਰ ਵਿਚ ਆਪਸੀ ਸਹਿਯੋਗ ਸਮੇਤ ਇਕ ਦਰਜਨ ਸਮਝੌਤਿਆਂ 'ਤੇ ਹਸਤਾਖਰ ਕੀਤੇ। ਦੋਹਾਂ ਆਗੂਆਂ ਵਿਚਕਾਰ ਦੁਵੱਲੀ ਗੱਲਬਾਤ ਤੋਂ ਪਹਿਲਾਂ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਰਵੀਸ਼ ਕੁਮਾਰ ਨੇ ਕਿਹਾ ਕਿ ਦੋਵੇਂ ਦੇਸ਼ ਰਵਾਇਤੀ ਕਰੀਬੀ ਅਤੇ ਮਜ਼ਬੂਤ ਸਬੰਧਾਂ ਨੂੰ ਗਤੀ ਦੇ ਰਹੇ ਹਨ। ਭਾਰਤ ਤੇ ਜਾਰਡਨ ਨੇ ਰਖਿਆ ਖੇਤਰ ਵਿਚ ਸਹਿਯੋਗ ਲਈ ਸਹਿਮਤੀ ਪੱਤਰ 'ਤੇ ਹਸਤਾਖਰ ਕੀਤੇ ਜਿਨ੍ਹਾਂ ਵਿਚ ਸਿਖਲਾਈ, ਰਖਿਆ ਉਦਯੋਗ, ਅਤਿਵਾਦ ਵਿਰੁਧ ਸਹਿਯੋਗ, ਫ਼ੌਜੀ ਅਧਿਐਨ, ਸਾਈਬਰ ਸੁਰੱਖਿਆ, ਫ਼ੌਜੀ ਇਲਾਜ ਸੇਵਾ ਆਦਿ ਖੇਤਰਾਂ ਵਿਚ ਤਾਲਮੇਲ ਵਧਾਉਣ ਦਾ ਅਹਿਦ ਲਿਆ।