ਮੁਜ਼ੱਫਰਪੁਰ- ਬਿਹਾਰ ‘ਚ ਕੱਲ੍ਹ ਰਾਤ ਮੋਤੀਪੁਰ ਤੇ ਮੁਜ਼ੱਫਰਪੁਰ ਦੇ ਵਿਚਾਲੇ ਕਰੀਬ 20 ਕਿਲੋਮੀਟਰ ਤੱਕ ਟਾਰਚ ਦੀ ਰੌਸ਼ਨੀ ਵਿੱਚ ਮੰਡੂਆਡੀਹ ਐਕਸਪ੍ਰੈਸ ਦੌਡ਼ਦੀ ਰਹੀ। ਲੋਕੋ ਪਾਇਲਟ (ਡਰਾਈਵਰ) ਨੇ 20 ਤੋਂ 30 ਕਿਲੋਮੀਟਰ ਪ੍ਰਤੀ ਘੰਟਾ ਰਫਤਾਰ ਨਾਲ ਰੇਲ ਗੱਡੀ ਚਲਾਈ।
ਜਾਣਕਾਰੀ ਅਨੁਸਾਰ ਮੋਤੀਪੁਰ ਸਟੇਸ਼ਨ ‘ਤੇ ਮੰਡੂਆਡੀਹ ਐਕਸਪ੍ਰੈਸ ਪੰਜ ਮਿੰਟ ਰੁਕਣ ਪਿੱਛੋਂ ਜਦੋਂ ਚੱਲੀ ਤਾਂ ਇੰਜਣ ਦੀ ਮੇਨ ਲਾਈਟ ਖਰਾਬ ਹੋ ਗਈ। ਗੱਡੀ ਦੇ ਅੱਗੇ ਵਧਣ ‘ਚ ਮੁਸ਼ਕਿਲ ਪੇਸ਼ ਆਉਣ ਲੱਗੀ। ਡਰਾਈਵਰ ਨੇ ਟਰੈਕ ਨਜ਼ਰ ਨਾ ਆਉਣ ਕਾਰਨ ਗੱਡੀ ਰੋਕ ਦਿੱਤੀ। ਲਾਈਟ ਠੀਕ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਨੁਕਸ ਦਾ ਪਤਾ ਨਾ ਲੱਗਾ ਤਾਂ ਡਰਾਈਵਰ ਨੇ ਸਥਾਨਕ ਸਟੇਸ਼ਨ ਮਾਸਟਰ ਨੂੰ ਸੂਚਨਾ ਦਿੱਤੀ ਅਤੇ ਗੱਡੀ ਅੱਗੇ ਲਿਜਾਣ ਤੋਂ ਇਨਕਾਰ ਕਰ ਦਿੱਤਾ। ਉਸ ਨੇ ਦੂਜਾ ਇੰਜਣ ਭੇਜਣ ਦੀ ਮੰਗ ਕੀਤੀ।