ਚੰਡੀਗੜ੍ਹ: ਨਵੇਂ ਸਾਲ ਦੀ ਆਮਦ 'ਤੇ ਦੇਸ਼ ਦੇ ਉੱਤਰੀ ਹਿਸਿਆਂ ਵਿਚ ਠੰਢ ਅਤੇ ਕੋਹਰੇ ਨੇ ਅਪਣਾ ਰੰਗ ਵਿਖਾਉਣਾ ਸ਼ੁਰੂ ਕਰ ਦਿਤਾ ਹੈ। ਕੋਹਰੇ ਦਾ ਅਸਰ ਸੜਕੀ ਆਵਾਜਾਈ 'ਤੇ ਕਾਫ਼ੀ ਪਿਆ ਹੈ। ਮੌਸਮ ਵਿਭਾਗ ਮੁਤਾਬਕ ਅਗਲੇ ਦੋ-ਤਿੰਨ ਮੌਸਮ ਇਸੇ ਤਰ੍ਹਾਂ ਰਹਿ ਸਕਦਾ ਹੈ। ਸੰਘਣੇ ਕੋਹਰੇ ਕਾਰਨ ਰਸਤਾ ਸਾਫ਼ ਨਾ ਦਿਸਣ ਕਰ ਕੇ ਅੱਜ ਸਵੇਰੇ ਦਿੱਲੀ ਹਵਾਈ ਅੱਡੇ 'ਤੇ 300 ਤੋਂ ਵੱਧ ਉਡਾਣਾਂ ਵਿਚ ਦੇਰ ਹੋਈ ਅਤੇ ਅੱਠ ਉਡਾਣਾਂ ਰੱਦ ਕਰ ਦਿਤੀਆਂ ਗਈਆਂ। ਸੜਕਾਂ 'ਤੇ ਵੀ ਆਵਾਜਾਈ ਕਾਫ਼ੀ ਮੱਠੀ ਚਾਲ ਚੱਲੀ। ਨਵੇਂ ਸਾਲ ਕਾਰਨ ਉਂਜ ਵੀ ਸੜਕਾਂ 'ਤੇ ਆਵਾਜਾਈ ਅਤੇ ਬਾਜ਼ਾਰਾਂ ਵਿਚ ਭੀੜ ਘੱਟ ਦਿਸੀ। ਪੰਜਾਬ ਅਤੇ ਹਰਿਆਣਾ ਵਿਚ ਆਮ ਜਨਜੀਵਨ ਕਾਫ਼ੀ ਪ੍ਰਭਾਵਤ ਰਿਹਾ।
ਹਰਿਆਣਾ ਵਿਚ ਹਿਸਾਰ ਦਾ ਘੱਟੋ ਘੱਟ ਤਾਪਮਾਨ ਆਮ ਨਾਲੋਂ ਪੰਜ ਡਿਗਰੀ ਸੈਲਸੀਅਸ ਹੇਠਾਂ 1.6 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ। ਅਧਿਕਾਰੀਆਂ ਨੇ ਦਸਿਆ ਕਿ ਕਲ ਰਾਤ ਸ਼ਹਿਰ ਵਿਚ ਇਸ ਮੌਸਮ ਦੀ ਸੱਭ ਤੋਂ ਸਰਦ ਰਾਤ ਰਹੀ। ਨਾਰਨੌਲ ਦਾ ਘੱਟੋ ਘੱਟ ਤਾਪਮਾਨ 3.6 ਡਿਗਰੀ ਸੈਲਸੀਅਸ, ਸਿਰਸਾ ਦਾ 5.8 ਡਿਗਰੀ ਸੈਲਸੀਅਸ, ਕਰਨਾਲ ਦਾ 8.4 ਡਿਗਰੀ ਸੈਲਸੀਅਸ ਅਤੇ ਭਿਵਾਨੀ ਦਾ 7.4 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ।