ਨਵੀਂ ਦਿੱਲੀ, 8 ਮਾਰਚ : ਪੰਜਾਬ ਨੈਸ਼ਨਲ ਬੈਂਕ ਘਪਲਾ, ਕਾਵੇਰੀ ਮੁੱਦਾ, ਆਂਧਰਾ ਲਈ ਪੈਕੇਜ ਅਤੇ ਹੋਰ ਮੁੱਦਿਆਂ ਕਾਰਨ ਅੱਜ ਚੌਥੇ ਦਿਨ ਵੀ ਲੋਕ ਸਭਾ ਵਿਚ ਰੌਲਾ-ਰੱਪਾ ਪਿਆ ਤੇ ਲੋਕ ਸਭਾ ਦੀ ਕਾਰਵਾਈ ਇਕ ਵਾਰ ਮੁਲਤਵੀ ਕੀਤੇ ਜਾਣ ਮਗਰੋਂ ਦਿਨ ਭਰ ਲਈ ਮੁਲਤਵੀ ਕਰ ਦਿਤੀ ਗਈ।ਲੋਕ ਸਭਾ ਵਿਚ ਕਾਂਗਰਸ ਅਤੇ ਹੋਰ ਵਿਰੋਧੀ ਪਾਰਟੀਆਂ ਦੇ ਮੈਂਬਰਾਂ ਨੇ ਜੰਮ ਕੇ ਹੰਗਾਮਾ ਕੀਤਾ। ਰਾਜ ਸਭਾ ਵਿਚ ਉਕਤ ਮੁੱਦਿਆਂ 'ਤੇ ਰੌਲਾ ਪੈਂਦਾ ਰਿਹਾ। ਬੈਂਕ ਘਪਲੇ ਕਾਰਨ ਕਾਂਗਰਸ ਮੈਂਬਰਾਂ ਸਮੇਤ ਕਈ ਮੈਂਬਰ ਲੋਕ ਸਭਾ ਸਪੀਕਰ ਦੀ ਕੁਰਸੀ ਅੱਗੇ ਪਹੁੰਚ ਗਏ ਅਤੇ ਨਾਹਰੇਬਾਜ਼ੀ ਕਰਨ ਲੱਗੇ। ਤੇਲਗੂ ਦੇਸਮ ਪਾਰਟੀ ਦੇ ਮੈਂਬਰਾਂ ਨੇ ਆਂਧਰਾ ਲਈ ਪੈਕੇਜ ਦੀ ਮੰਗ ਕਰਦਿਆਂ ਹੰਗਾਮਾ ਕੀਤਾ। ਉਹ ਵੀ ਸਪੀਕਰ ਦੀ ਕੁਰਸੀ ਅੱਗੇ ਪਹੁੰਚ ਕੇ ਨਾਹਰੇ ਲਾਉਂਦੇ ਰਹੇ। ਉਨ੍ਹਾਂ ਦੇ ਹੱਥਾਂ ਵਿਚ ਤਖ਼ਤੀਆਂ ਸਨ ਜਿਨ੍ਹਾਂ ਉਤੇ 'ਸਾਨੂੰ ਇਨਸਾਫ਼ ਚਾਹੀਦਾ ਹੈ' ਦੇ ਨਾਹਰੇ ਲਿਖੇ ਹੋਏ ਸਨ।
ਅੰਨਾਡੀਐਮਕੇ ਦੇ ਮੈਂਬਰਾਂ ਨੇ ਕਾਵੇਰੀ ਜਲ ਪ੍ਰਬੰਧਨ ਬੋਰਡ ਦੇ ਗਠਨ ਲਈ ਹੰਗਾਮਾ ਕੀਤਾ ਅਤੇ ਕੁਰਸੀ ਅੱਗੇ ਜਾ ਕੇ ਨਾਹਰੇਬਾਜ਼ੀ ਕੀਤੀ। ਤੇਲੰਗਾਨਾ ਰਾਸ਼ਟਰੀ ਸਮਿਤੀ ਦੇ ਮੈਂਬਰਾਂ ਨੇ ਰਾਜ ਵਿਚ ਰਾਖਵਾਂਕਰਨ ਕੋਟੇ ਵਿਚ ਵਾਧੇ ਲਈ ਰੌਲਾ-ਰੱਪਾ ਪਾਇਆ। ਸਪੀਕਰ ਨੇ ਮੈਂਬਰਾਂ ਨੂੰ ਸ਼ਾਂਤ ਰਹਿਣ ਦੀ ਅਪੀਲ ਕੀਤੀ ਪਰ ਕੋਈ ਅਸਰ ਨਾ ਹੋਇਆ। ਆਖ਼ਰ ਉਨ੍ਹਾਂ ਸਦਨ ਦੀ ਕਾਰਵਾਈ ਦੁਪਹਿਰ 12 ਵਜੇ ਤਕ ਰੋਕ ਦਿਤੀ ਤੇ ਜਦ ਦੁਬਾਰਾ ਕਾਰਵਾਈ ਸ਼ੁਰੂ ਹੋਣ 'ਤੇ ਰੌਲਾ ਪੈਂਦਾ ਰਿਹਾ ਤਾਂ ਕਾਰਵਾਈ ਦਿਨ ਭਰ ਲਈ ਰੋਕ ਦਿਤੀ ਗਈ। ਸਦਨ ਵਿਚ ਅੱਜ ਤੇਲਗੂ ਦੇਸਮ ਪਾਰਟੀ ਦੇ ਮੈਂਬਰ ਅਤੇ ਕੇਂਦਰੀ ਮੰਤਰੀ ਅਸ਼ੋਕ ਗਜਪਤੀ ਮੌਜੂਦ ਨਹੀਂ ਸਨ ਜਦਕਿ ਲੋਕ ਸਭਾ ਵਿਚ ਉਨ੍ਹਾਂ ਦੇ ਮਹਿਕਮੇ ਨਾਲ ਜੁੜਿਆ ਸਵਾਲ ਸੂਚੀਬੱਧ ਸੀ।ਪਾਰਟੀ ਦੇ ਦੂਜੇ ਮੰਤਰੀ ਵਾਈ ਐਸ ਚੌਧਰੀ ਸਦਨ ਵਿਚ ਮੌਜੂਦ ਸਨ। (ਏਜੰਸੀ)